1 апрел. Санае ки ҳисобида шуда рӯзи беандӯҳӣ, беғамӣ. Санае ки хонда шуда рӯзи ханда. Дар ин рӯз бештар ниёзманд мешавем онҳоеро, ки муҷиби хушиҳоямон шаванду омили хандаҳоямон. Бешак, ҳаҷвнигоронанд онҳо. Нишотбахшу сурурбахши мо. Ин санаву ин рӯз моро ҳам бурд ба сайёҳати дун-ёи бонуе пурзарофат. Ӯро қалб беғашу мелод дар рӯзи ҳаҷв. Гулбаҳор Ғаффорова аст ин бонуи зодаи рӯзи ханда ва бо лаёқати арзанда. Кӯтоҳсуҳбати телефоние доштем ҳамроҳаш ва гуфтем чанд ҳарфе бобати кору рӯзгори чеҳраи тобони гурӯҳи ҳаҷвии “Хандинкамон”.

ГУЛБАҲОРИ ҲАҶВ

- Таҷлили зодрӯзи як ҳаҷвнигор дар рӯзи ханда чӣ гуна аст? Чун аксаран банди барномаҳои ҳунариед дар ин рӯз?

- Бале, зодрӯзам фақат дар саҳна ё роҳу меҳмонхонаҳо таҷлил мешавад. Шояд аз ин қариб чил соли умрам танҳо бист солашро бо хонавода истиқбол гирифта бошам.

- Ин санаро ҳамчун рӯзи ханда ё гуфтани дурӯғ меҳисобанд. Дар тақвими рӯзгори шумо чӣ унвон дорад ин рӯз?

- Рӯзи худам, рӯзи ханда.

- Яъне, дурӯғ ҳеҷ гоҳе наметавонад омили ханда бошад?

- Шухиро бо дурӯғ якҷоя кардан лозим нест. Инҳо аз ҳамдигар фарқи калон доранд. Ҳазл бояд танҳо боиси ханда бошад, бидуни ранҷонидани нафаре.

- Чаро маҳз ҳаҷвнигор шудед?

- Шояд таъсири рӯзи таввалуд бошад. Фикр мекунам ман ҳаҷвро не ҳаҷв маро интихоб кардааст.

- Шурӯи шӯх буданҳою майл доштанҳо ба ҳаҷв аз кӯдакиҳо буд?

- Вақте волидонам аввалин бор ҳунарнамоии маро дар як озмуни мактабӣ диданд, ҳайрон монданд. Чунки дар хонаю кӯча духтари ором будам. Он замон дар синфи панҷум таҳсил мекардам ва қариб дар ҳама номинатсияи он озмун иштирок карда будам.

ГУЛБАҲОРИ “ХАНДИНКАМОН”

- Ҷое мегӯед агар Муқимҷон Абдуфаттоев падари гурӯҳи ҳаҷвии “Хандинкамон” бошад, ман модари ин гурӯҳам. Пас оғози таъсиси чунин як гурӯҳи ҳаҷвӣ аз куҷост?

- Бо Муқимҷон дар дастаи “Ҳозирҷавобон”-и донишгоҳ аъзо будем. Он вақт бештар бо забони русӣ саҳнаҳо пешниҳод мекардем. Баъдан фикр кардему ба хулосае омадем, ки бо пайдо кардани вақти холӣ саҳнаҳо бо забони тоҷикӣ омода карда, пешниҳод месозем. Сипас, Театр-студияи “Хандинкамон”-ро таъсис дода, дигар аъзоёни гурӯҳро аз ҳар ҷое ба кор гирифтем.

- Як муддат аъзоёни “Хандинкамон” парешон шуданд ва шумо ҳам онро тарк карда будед. Аммо дубора баргаштед ба ин гурӯҳ. Дар суҳбате мегӯед, аъзои хеле фаъоли гурӯҳ Сулаймон Саидғозиевро ҳам ҳатман бармегардонед. Дар ҳоле, ки ӯ гуфта буд дигар ба сафи ҳунармандони “Хандинкамон” намепайвандад. Вале дар охирин барномаи ҳунарии “Хандинкамон” дар шаҳри Хуҷанд мо Сулаймонро ҳам рӯи саҳна дидем. Пас муваффақ шудед дар расидан ба ин мақсад?

- Ман гуфта будам, ки ӯро бармегардонам ва ба ин қавлам вафо кардам. Тамоми санъати суханвариамро истифода карда, ҳамроҳаш ҳамсуҳбат шудам, дилашро ба даст оварда, ӯро барои баргаштанаш розӣ кунондам. Ҳар ҳунарманди ин гурӯҳ мухлиси худро дорад ва яке ҷойи якеро гирифта наметавонад. Мухлисони мо ҳам аз ин сарҷамъии мо бисёр хурсанд шуданд. Чунки дар барномаҳои қаблӣ ҳатман аз набудани дигар аъзоёни гурӯҳ мегуфтанд ва хоҳиш мекарданд, ки дубора ҳамагӣ якҷо шавем.

- Воқеан, дар қатори “Хандинкамон” бештари гурӯҳҳои ҳаҷвии мо низ пароканда шуданд. Сабаби аслии ин парешониҳо чист?

- Сабаби рафтани ман аз ин гурӯҳ оиладор шуданам буд. Хос-там аввал зиндагии шахсиамро созам, баъдан ба саҳна баргардам. Сулаймон Саидғозиев барои барқарор кардани саломатии худ рафта буд. Ҳамин гуна бо ҳар сабабе мо рафтем ва фикр мекунам дигар гурӯҳҳо низ шояд ҳамин гуна парешон шуда бошанд. Дар баъзе гурӯҳҳо ҳамдигарфаҳмӣ миёни аъзоён аз байн меравад, ки ин бисёр бад аст. Зеро кори гурӯҳӣ ҳамеша муттаҳидиро талаб мекунад.

- Соли қабл Театр-студияи “Хандинкамон” 20 сола шуд. Оё ин ҳама сол ин гурӯҳи ҳаҷвӣ ба ҳадафе ки дошт, тавонист расад?

- Муҳим ки мо мухлис пайдо кардем ва онҳо то ҳол моро пайгирӣ мекунанд. Саҳнаҳои ҳаҷвии моро тамошо мекунанд, барояшон писанд меояд, таъсир ҳам мегузорад. Чунки мо бештар кӯшиш мекунем, саҳнаҳоямон тарбиявӣ бошанд ва тавассути ҳаҷву зарофат мардумро ба роҳи дуруст роҳнамоӣ кунем. Ҳадафҳои дигар ҳоло боз дар пешанд.

- Муқимҷон Абдуфаттоев роҳбари гурӯҳи ҳаҷвии “Хандинкамон” дар суҳбате гуфта буд, ки ният дорад, ҷавонони лаёқатманди ҳар гӯшаву канори кишварро ҷамъ оварад...

- Ҳоло ҳам дар ин фикр ҳастем. Рӯзи якуми апрел мехос-тем ҳамин гуна озмуне доир кунем ва ҳаҷвнигоронро аз тамоми Тоҷикистон новобаста аз синну сол ҷамъ оварем. Беҳтаринҳоро ба ҳар гурӯҳи ҳаҷвие, ки ба маҳали зисташон наздик аст, тақсим кунем. Ё аз онҳо як гурӯҳи дигареро ташкил созем. Мутаассифона, фурсат нашуд. Аммо ба зудиҳо ин озмунро доир мекунем.

- Бахшида ба рӯзи ханда Театр-студияи “Хандинкамон” барномаи консертиеро пешниҳод кард дар шаҳри Хуҷанд. Чаро ин барнома ба тамошобинони душанбегӣ намоиш дода нашуд?

- Баъди моҳи шарифи Рамазон ҳатман ин барномаро дар пойтахт намоиш хоҳем дод.

ГУЛБАҲОРИ РӮЗГОР

- Имрӯзҳо фазои телевизионҳои мо холӣ аз ҳаҷв аст. Шумо аз ҷониби онҳо даъватҳо доред барои пешниҳоди саҳнаҳо?

- Бале, даъват мешавем. Аммо баъзан ба хотири маблағ наметавонем иштирок кунем. Чунки аз Хуҷанд то Душанбе омадану дар пойтахт мондан, харҷи зиёдро талаб мекунад. Ба ҳар ҳол бо даст додани имкон кӯшиш мекунем, ҳатман иштирок кунем.

- “Хандинкамон” бо иҷрои кадом талаботҳо саҳнаҳои ҳаҷвиро омода мекунад?

- Кӯшиш мекунем бештар камбудиҳои ҷомеаро бигӯем. Аммо ҳар ҳарфу суханро донис-таю санҷида бояд гуфт. Чунки як сухан метавонад дорои чанд маънӣ бошад ва онро ҳар кас ҳар навъ фаҳмад. Барои хандонидан наметавон ҳар чизе дар сар омад, онро гуфт. Ҳаҷв бояд таҳқиру масхара надошта бошад.

- Аксари саҳнаҳои шумо бо муаллифии Муҳимҷон Абдуфаттоев омода мешавад. Пас, дуруст аст, ки барои ҳаҷви тоҷик ҳаҷвнависон хеле каманд?

- Бале, барои мо баъзеҳо пешниҳод мекунанд, аммо ҷавобгӯи талабот нестанд.

- Қарор буд дар фоҷиаи мазҳакавие бо коргардонии Муҳиддини Музаффар нақш офаред...

- Бале, ҳамин гуна ният дош-тем. Аммо то ҳол сабт накардаем.

- Фоҷиаҳои рӯзгори шумо ҳам кам нестанд. Ин ҳолатҳо то чӣ ҳад таъсиргузоранд барои як ҳаҷвнигор?

- Пастию баландиҳои зиндагӣ барои мо ҳам таъсири зиёд мерасонад. Аммо фарқияти ҳунарманд аз дигарон ҳамон аст, ки ӯ ин дардҳоро хуб пинҳон карда метавонад ва дар чӣ ҳолате набошад, кӯшиш мекунад, то рисолати касбиашро иҷро кунад.

- Пас дар рӯзгор хандидаед бештар ё гиристаед?

- Бештар хандидаам. Шукр.

Сайёра ШУКУРЗОДА, “ҶТ”