Имрӯз аз рӯзи бенишон ғайб задани Муҳсини Ибодуллои 15-сола дар шаҳри Леваканти вилояти Хатлон 5 рӯз сипарӣ мешавад ва волидону наздиконаш бо ҳамроҳии мақомоти дахлдор ӯро ҷӯстуҷӯ доранд.

Ба иттилои масъулин аз ШВКД-и шаҳри Левакант Муҳсини Ибодулло, сокини кӯчаи Сомонӣ 8-и шаҳри Левакант рӯзи 22-юми январи соли равон аз хонаи истиқоматияшон берун баромада, ба самти номаълум рафтааст. Ҳарчанд овозаҳо дар бораи сабабҳои ғайб задан ва ҳолати онрӯзаи Муҳсин дар миёни мардуми шаҳр зиёд шуда истодааст, вале бо иддаои Мирзо Азизов, масъули бахши ҳифзи ҳуқуқи кӯдаки ҳукумати шаҳри Левакант бо гузашти 5 рӯз ҳанӯз аниқ нест, ки сабаби аслии ба вуқуъ пайвастани ин ҳодиса чист ва наврас ба куҷо рафтааст, касе дақиқан намедонад.

Дар рӯзи аввали ҳодиса як ҷавон, ки ҳамсояашон аст, акси Муҳсинро гирифта дар рӯйи он матни кӯтоҳе ба мазмуни дархости кӯмак дар ёфтани Муҳсин навишта тариқи барномаи “Имо” нашр мекунад. Баъдан ин акс аз тарафи садҳо нафар корбарони шабакаҳои иҷтимоӣ ва мессенҷерҳо бознашр мешавад. Вале ҳеҷ нафаре аз аз дидани Муҳсин хабаре намедиҳад.

Дар ин баробар мақомоти ҳифзи ҳуқуқуи шаҳри Левакант акси Муҳсинро бо маълумот дар бораи шахсият ва гум шуданаш нашр карда, ба дасти толибилмони муассисаҳои таълимӣ ва шаҳрвандоне, ки ихтиёран барои ёфтани Муҳсин кӯмак кардан мехоҳанд тақсим кардааст. Ҳамзамон ба 16 шаҳру ноҳияи вилояти Хатлон дар ин бора мактуб ирсол гардидааст ва Муҳсинро аллакай дар он ҷойҳо низ кофта истодаанд. Парвиза Исоева, модари Муҳсин дар суҳбат бо мо гуфт, ки ҳама ҳайронанд, ки чаро чунин шудааст ва мисле, ки писарашро “касе аз боло омода, бардошта бурд”.

Бо вуҷуди оне, ки аз Телевизиони вилоятии “Хатлон” ба ин оила гуфтаанд, ки дар ҷустуҷуйи писарашон кӯмакашон мекунанд, вале падари хонавода Ибодулло Одинаев бо писари калонаш Муҳин ва дигар наздикон дар кӯҳҳо ва гирду атрофи деҳаҳо, дарёҳои шаҳри Левакант Муҳсинро мекобанд. Парвиза Исоева бо умедворӣ аз он, ки дар ҷустуҷӯйи писараш Муҳсин кӯмаки бештар мебинад, ба тамоми мақомоти дахлдор, аз ҷумла ВКД, Кумитаи амнияти миллӣ ва мардуми Тоҷикистон муроҷиат карда, талаби ҳамроҳӣ намуд.

Муҳсини Ибодулло дар мактаб аз фаъолон буд. Ӯ 10 бобу 100 моддаи Конститутсияи Тоҷикистонро азёд медонист. Ба гуфти модари Муҳсин бародараш Муҳин Одинаев барояш нашри англисии Конститутсияро оварда буд ва ӯ аллакай барои азёд кардани Конститутсия бо забони англисӣ оғоз карда буд.
Масъулини мақомоти ҳифзи ҳуқуқи шаҳр дар робита ба ин қазия изҳор доштанд, ки мо ҳама қувваи кориямонро ҳоло ба ҳамин кор сафарбар намудаанд. Дар сурати ба даст омадани ҳар натиҷае иттилоъ хоҳанд дод. Вале дар ин кор дастгирии тамоми ҷомеаи шаҳрвандӣ ба онҳо кӯмаки хуб карда метавонад.