Бо мақсади баланд бардоштани сатҳу сифат ва фарҳанги хизматрасонӣ ба сокинону меҳмонони пойтахт, шаҳрдорӣ ҳамасола корҳои зиёдеро роҳандозӣ менамояд. Яке аз иқдомҳои наҷиби роҳбарияти шаҳри Душанбе ин гузаштан ба пардохти электронӣ (Citycard) дар хатсайрҳои дохилишаҳрӣ - автобус ва троллейбусҳо мебошад. Кортҳои электронӣ барои истифодаи доимӣ дар автобус ва троллейбус пешбинӣ шудааст. Сокинони шаҳри Душанбе ва дигар меҳмононе, ки аз дигар давлатҳо ва ё дигар шаҳру ноҳияҳо ба шаҳри Душанбе ворид мешаванд ва аз воситаи нақлиёти ҷамъиятӣ истифода мебаранд, метавонанд, ки корти пардохти сафарро аз ронандагони воситаҳои нақлиёт, марказҳои фурӯш дар истгоҳҳо ва терминалҳои Expess Pay, ки дар истгоҳҳо ва ҷойҳои ҷамъиятӣ насб карда шудааст, дастрас кунанд. Барои санҷиши пардохти роҳкиро корти нақлиётии мусофир ба терминали дар дастдоштаи назорати наздик карда мешавад. Ҳангоми тавассути корти электронӣ пардохт шудани роҳкиро дар хатсайри рафтаистода мусофир ҳамчун пардохткунандаи роҳкиро ба қайд гирифта шуда, дар экрани терминали назоратчӣ маълумот оид ба гузариши назорат нишон дода мешавад. Ҳангоми аз ҷониби мусофир ба қайд нагирифтани корти электронӣ дар воситаҳои нақлиёт дар хатсайри саворшудаи мусофир терминали назоратчӣ дар экрани худ маълумотро оид ба пардохт нагардидани ҳаққи роҳкиро нишон медиҳад. Арзиши корт 10 сомониро ташкил медиҳад, ки аз ин 4 сомонӣ дар тавозуни корт ҳамчун масрафнашаванда боқӣ мемонад. Тавозуни кортро ба воситаи терминалҳои Express Pay пур карда, арзиши сафар баробари арзиши муайяннамудаи хатсайр мебошад. Муҳлати истифодабарии корт 3 солро ташкил медиҳад. Ин иқдом аз моҳи июн сар карда дар нақлиётҳои мусофиркаши ҷамъиятии якчанд хатсайр ба таври ҳатмӣ ҷорӣ карда шуда, дар ҳар як хатсайр волонтёрҳои Кумитаи кор бо ҷавонон ва варзиши назди Ҳукумати ҷумҳурӣ мусофиронро қабул ва гусел мекунанд.

Албатта, табиист, ки ҳар иқдоми наве, ки ҷорӣ мешавад, дар аввал як кам мушкил ва барои мардум ғайриодӣ менамояд. Ҳол он ки ҳама ташаббусҳое, ки роҳандозӣ мешаванд, ба нафъу фоидаи мардум мебошанд. Тавре волонтёрони Кумитаи кор бо ҷавонон ва варзиш қайд карданд, ҳангоме ки мусофирони бекортро ба автобус дохил шудан намемонем, онҳо рӯй турш карда, норозигӣ баён мекунанд ва мегӯянд, ки “барои як бор нишастан корт харем?”: “Чуноне мушоҳида кардем, ҳар нафареро, ки бори аввал барои аз кортҳои электронӣ истифода кардан хоҳиш мекунем, ба мо норозигии хешро баён мекунанд. Ҳатто суханҳои пасту баланд низ мегӯянду ин иқдомро як саргардонии зиёдатӣ мешуморанд. Аммо баъди як ё ду маротиба истифода кардани корт, аз худ намудани тарзи истифодаи он, бе мушкилӣ истифода намудан аз нақлиёти ҷамъиятӣ хурсанд мешванду ба роҳбарияти шаҳр сипос мегӯянд. Бе муҳобот худ чандин маротиба шоҳиди ин ҳол шудам,”-гуфт дар суҳбат ба мо яке аз волонтёрон.

Ҷобир Низомов намояндаи Хадамоти тоҷикнақлиётхадамотрасон чунин қайд намуд, ки: “Низоми мазкур бо мақсади содагардонии раванди пардохти роҳкиро дар воситаҳои нақлиёти автомобилии истифодаи умум роҳандозӣ гардида, амалӣ намудани он як қатор бартариятҳо дорад. Аз ҷумла, зиёдшавии даромади корхонаҳои мусофиркашонӣ, ба иқтисодиёти расмӣ фаро гирифтани ҳамаи маблағҳои гардиш, ҳалли баҳсҳо оид ба бозпасгирии бақияпулиҳо, баланд бардоштани сатҳу сифати хизматрасонӣ, танзим ва назорати реҷаи гардиши воситаҳои нақлиётро дар бар мегирад. Албатта, оғози ҳамаи кор мушкилӣ дорад. Хадамоти тоҷикнақлиётхадамотрасон дар ҳамбастагӣ бо ҳукумати шаҳри Душанбе кӯшиш карда истодаем, ки мушкилиҳои ҷойдоштаро дар ояндаи наздик бартараф намоем”.

Нафароне, ки аз дигар шаҳру ноҳияҳои ҷумҳурӣ ба шаҳри Душанбе ворид мешаванд, дар марҳилаи аввал метавонанд бо ҳуҷҷати тасдиқнамудаи худ дар ҳудуди шаҳр аз имтиёзҳо истифода намоянд. Дар оянда тартиботи дахлдор барои истифодабарии кортҳои электронии имтиёзнок, барои меҳмонони шаҳри Душанбе дар асоси қонунгузории амалкунанда омода карда мешавад. Шахсони имтиёзнок корти электронии пардохтро метавонанд аз марказҳои пешниҳоди дастгирии иҷтимоӣ дастрас намоянд: “Рӯзҳои наздик дар тамоми хатсайрҳои мусофиркаш нафарони синнашон аз 75 боло метавонанд, ки аз корти ройгон истифода намоянд. Инчунин, дар макотиби шаҳр кортҳои имтиёзнок ҷорӣ карда мешавад, ки тамоми донишҷӯён имкони аз он озодона истифода бурдан доранд. Аз сабаби набудани мутахассис оид ба терминалҳои пардохт дар истгоҳҳо ва инчунин роҳҳои марказии шаҳр, ки дар ҳолати азнавсозӣ қарор дорад, чунин пардохт танҳо дар ду хатсайр ба таври ҳатмӣ ҷорӣ карда шудааст. Аммо дар рӯзҳои наздик бошад, баъди бартараф шудани камбудиҳо дар хатсайри автобусҳои 37,18, 1 ин низом ба таври ҳатмӣ ҷорӣ карда мешавад,” - мегӯяд Ҷ. Низомов.

Чунин шакли пардохт дар кишварҳои хориҷа, мисли Русия ва Қазоқистон солҳост мавриди истифода мебошад. Пойтахти азизи мо бо шарофати Истиқлолияти давлатӣ рӯ ба шукуфоӣ ниҳода, имрӯзҳо ҳамқадами дигар шаҳрҳои пешрафта шуда истодааст. Ба низоми корти электронӣ гузаштани нақлиётҳои ҷамъиятӣ яке аз нишонаҳои он аст. Ин иқдом аз тарафи сокинони шаҳр ба хубӣ пазируфта шуда, миёни мардум ва дар шабакаҳои интернетӣ дастгирии ҳамаҷониба ёфт.

Тахмина Давлатова, сокини шаҳри Душанбе мегӯяд: “Дар кишвари мо ҳамлу нақли мусофирон тавассути “Сити- корт” ба роҳ монда шуд. Ин яке аз беҳтарин иқдомот ва ғамхории ҳукумати шаҳр нисбат ба сокинони он мебошад. Қаблан вақте ки мо субҳ ба кор рафтанӣ мешудем, вақти зиёдамон дар интизори хатсайрҳо мегузашт ва дар ҳар истгоҳҳо 10 - 15 дақиқаи дигар ба ҳамлу нақли мусофирон сарф мешуд. Тамбашавии дар роҳ аз ҳад зиёд ба чашм мерасид, ки ин яке аз сабабҳои ба кор дер мондани мо ва ба дарс дер ҳозиршавии донишҷӯён мешуд. Аз вақте ки пардохт тариқи корти электронӣ ба роҳ монда шуд, ин мушкилиҳо кам ба чашм мерасанд. Дигар, хуб шуд, ки ба ин васила пулчинакҳо низ аз нақлиётҳо гирифта шуданд”. Дар баробари Тахмина ҳар яке сокини пойтахт, ки аз корти электронӣ истифода менамояд, аз ин иқдом ҷонбидорӣ намуда, доир ба он назари нек доранд. Аз ҷумла Ҳусейн Нарзуллоев сокини ноҳияи Исмоили Сомонии шаҳри Душанбе мегӯяд: “Ҳамқадами замона будан, талаботи он аст. Вақте ки пардохти роҳкиро аз ҷониби ҳар як шахс буд, ҳамарӯза дар нақлиёти мусофиркаш нофаҳмӣ байни мусофир ва пулчинҳо ба миён меомад. Ин вазъ ба табъи дигари мусофирон таъсири манфии худро нарасонда намемонд. Пардохт тавассути корти электронӣ як пешравӣ ва аз ҳамқадам будани ҷомеаи мо бо замон ва стандарти ҷаҳонӣ дарак медиҳад”.

Умед бар он мебандем, ки сокинони пойтахт ва меҳмонони аз шаҳру навоҳӣ иқдоми мазкурро ҳамаҷониба дастгирӣ намуда, барои боз ҳам ба як шаҳри пешрафта табдил додани пойтахти маҳбубамон – шаҳри Душанбе саҳм мегузоранд.