Аз оғози қарни ХХ инсоният чандин пандемияро аз сар гузарондааст. Аз ҳама сахттарини он зукоме буд, ки солҳои 1918 – 1920 паҳн гардида, бештар аз 20 миллион нафарро дучори марг намуд. “Зукоми испанӣ” дар натиҷаи вируси H1N1 ба вуҷуд омад. Аз ин зуком 20 то 40 дарсади аҳолии рӯи Замин зарар дид. Пандемия Испания, Швейтсария, Португалия, Сербия, Юнон, Англия, Олмон, Дания, кишварҳои Скандинавия, Африқои Шимолӣ ва дигар давлатҳоро фаро гирифта буд.

Ҳангоми пандемияи соли 1957 (“Зукоми осиёӣ”) ва соли 1968 (“Зукоми ҳонконгӣ”) бештар аз 1,5 миллион одам фавтид ва зарари иқтисодӣ қариб 32 миллиард долларро ташкил дод.

Солҳои 2002 – 2003 дар бархе аз кишварҳои Осиёи Ҷанубу Шарқӣ пневмонияи атипич паҳн гардид, ки хисороти ҷонию молии зиёдро дар бар дошт.

Моҳи апрели соли 2009 ҳолати ба вируси нав H1N1 (зукоми хук) гирифтор шудани одамон ба қайд гирифта шуд. Аз ин зуком беш аз 2600 нафар фавтид.

Охири декабри соли 2019 ҳукуматдорони чинӣ аз пайдоиши пневмонияи сохташ номаълум дар шаҳри Ухан хабар доданд.
11 марти соли 2020 Созмони умумиҷаҳонии тандурустӣ пандемияи нави коронавирусро эълон намуд.

Алҳол ин беморӣ дар бештар аз 200 кишвари дунё ба қайд гирифта шудааст.

Мақсад: бояд донем, ки инсонҳо таҷрибаи “ғолибият” бар вирусҳоро доранд, руҳафтода набошем, зиндагӣ давом хоҳад дошт. Танҳо аз эҳтиёт кор гирем. Боқӣ ҳамааш хуб мешавад.