Китоби “Барбоси ман”-и Нуруллоҳи Ориф, шоир ва корманди рӯзномаи “Ҷавонони Тоҷикистон” дар озмуни ҷумҳуриявии “Китоби сол -2021”, ки он бо ташаббуси Вазорати фарҳанги Ҷумҳурии Тоҷикистон гузаронида шуд, дар номинаи “асарҳои назми бачагона” сазовори ҷойи сеюм гардида, бо диплом ва мукофотпулӣ қадрдонӣ шуд.

Маросими ҷамъбастии озмуни ҷумҳуриявии “Китоби сол -2021” 17 декабр дар Театри давлатии академии драмавии ба номи А. Лоҳутӣ бо иштироки ҳайати ҳакамон, иштирокдорон ва ғолибони озмун, шоирону нависандагон ва алоқамандони китоб доир гардид.

Дар оғози маросим муовини вазири фарҳанги Ҷумҳурии Тоҷикистон Сафарзода Давлат Шариф ҳозиринро хайрамақдам гуфта, аз ҷумла иброз дошт, ки бо иқдомот ва дастгирии ҳамаҷонибаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фазои маънавии Тоҷикистони соҳибистиқлол барои рушди китобу китобхонӣ пайваста беҳтару хубтар мегардад.

Ёдовар мешавем, ки озмуни мазкур аз рӯи шаш номинатсия доир шуда, дар он 41 довталаб китобҳои худро барои иштирок дар озмун пешниҳод карда буданд ва беҳтаринҳо дар номинаҳои гуногун қадрдонӣ шуданд.

“ҶТ”