Сулаймон Давлатзода, раиси Кумитаи дин, танзими анъана ва ҷашну маросими назди Ҳукумати кишвар имрӯз зимни нишасти хабарии ин ниҳод гуфт, ки соли 2023 Кумита дар асоси 340 дархост 1927 номгӯй адабиёти динӣ, 11 500 адад варақа, инчунин 50587 адад сабтҳои видеоӣ ва аудиоиро мавриди таҳлил ва ташхиси давлатии диншиносӣ қарор додааст.

Ба гуфти раиси ниҳоди мазкур аз теъдоди адабиётҳои динии ташхисшуда ба 205 дархост бинобар мавҷуд будани нишонаҳои ифротгароӣ хулосаи манфӣ ва ба 135 дархост хулосаи мусбат дода шудааст.

- 205 дархосте, ки хулосаи рад гирифт, он навору садо ва китобу варақаҳое буданд, ки мардум дар интернет ва шабакаҳои иҷтимоӣ пайдо намуда, барои мутолиа ва гӯш кардани онҳо ба мо муроҷиат карданд. Ва аз сабабе, ки дар онҳо хусусияти ифротгароӣ дида мешуд, мо ба онҳо ҷавоби рад додем, - гуфт Сулаймон Давлатзода.

Дар гузашта дар шабакаҳои иҷтимоӣ аз камфаъол будани кормандони Кумитаи мазкур ва Шурои уламои кишвар вобаста ба ташхиси чунин маводҳо танқидҳо дида мешуд. Аммо имсол ба фарқ аз солҳои гузашта дар ин маврид омор оварда шуд.