ҶОМЕА
Душанбе 06 Феврал 2023 07:24
8804
Дар ҷомеаи имрӯза бонувон баробари мардон барои пешрафти зиндагии хеш дар талошанд. Имрӯзҳо миёни касбҳои мардонаву занона фарқгузориҳои ҷиддӣ ба назар намерасад. Барои мисол дар баробари бонувон имрӯзҳо аз миёни мардон низ метавонем беҳтарин ошпазҳо, дӯзандаҳо ва тарроҳони либосро пайдо кунем. Миёни занон нафарони зиёд пайдо мешаванд, ки ба қавле касбҳои мардона доранд. Яке аз чунин нафарон Мавзуна Сангинова, сокини 29-солаи шаҳри Бӯстони вилояти Суғд аст. Ӯ ба таъмири сабукравҳо машғул мебошад. Ӯ ба ин кор пас аз хатми Омӯзишгоҳи касбӣ-техникии №44-и шаҳри Хуҷанд шуруъ намудааст.

ТАҲСИЛ БАЪДИ 8 СОЛИ ТАВАҚҚУФ

Мавзуна баъди хатми мактаби миёна ба шавҳар баромада, ҳамроҳ бо шавҳараш ба муҳоҷирати меҳнатӣ меравад. Аммо зиндагӣ дар кишвари бегона барои ӯ душвор меафтаду баъди соҳиби ду фарзанд шудан, ба ватан бармегардад.

Чуноне ки худаш қисса кард, ӯ дар оилаи устои мошин ба воя расидааст. Аз хурдӣ ба падараш барои таъмири мошинҳо ёрӣ мерасонд. Ҳамин тавр, дар қалбаш нисбат ин касб шавқу рағбати зиёде пайдо шуд. Ҳамин буд, ки баъди 8 соли хатми мактаби миёна соли 2020 ба Омӯзишгоҳи касбӣ-техникии шаҳри Хуҷанд ҳуҷҷат супорида, ҳамроҳ бо 29 нафар мардон таҳсил мекунад. Давоми таҳсил ин бонуи ҷавон касби челонгариро ба пуррагӣ аз худ намуда, омӯзишгоҳро бо муваффақият хатм кард.

ҒОЛИБ ШУДАН ДАР ГРАНТИ ПРЕЗИДЕНТӢ

Соли 2021 Мавзуна ғолиби Гранти президентӣ бо маблағи 40 ҳазор сомонӣ гардид. Чанд сол боз аз ҷониби Кумитаи кор бо занон ва оилаи назди Ҳукумати Ҷумҳурии Тоҷикистон озмуни Гранти президентӣ махсус барои бонувони соҳибкор гузаронида мешавад. Соли 2021 Мавзуна низ ба озмуни мазкур ҳуҷҷатҳо барои кушодани устохонаи таъмири мошинҳо дар шаҳри Хуҷандро пешниҳод намуд ва хушбахтона ӯро дастгирӣ намуданд.

- Чанд сол боз орзу доштам, ки як корхонаи хурди таъмири мошинҳо кушода, ба мардум хизматрасонӣ кунам. Ҳамин тавр, орзуи ман имрӯз амалӣ гашт, рӯзи 7-уми июни соли равон лоиҳаамро муаррифӣ намуда, устохонаамро ифтитоҳ кардам, -гуфт Мавзуна.

Ӯ то соҳиби маблағ ва корхона гаштанаш ба мушкилиҳои зиёд дучор шуд. Аммо сабр ва иродаи шикастнопазираш боис шуд, ки ба мақсадаш расад.

Ӯ баъди ғолиб омадан дар озмун ва соҳиби маблағи муайян гаштан, дар шаҳри Бӯстони вилояти Суғд корхонаи мошинсозии худро кушода, ба кор оғоз кард.

- Бархе аз сокинон ба кори ман боварӣ надоштанд ва ҳатто мегуфтанд, ки зан бояд кори занонаро иҷро намояд, на кори мардона. Аммо ман пайваста меҳнат карда, саъю кӯшиш намудам, ки муваффақ шаваму ба мардум хизмат кунам,-нақл мекунад ҳамсуҳбати мо.

Аз рӯзе, ки ӯ корхонаи худро кушод, давоми рӯз ба се муштарӣ хизмат кард. Ӯ муҳаррик, қисмҳои ҳаракаткунанда, тахшиси техникии мошинҳоро таъмир карда, ба ронандагон месупорад. Давоми чанд рӯзи фаъолияташ ронандаҳо ба кори ӯ баҳои баланд доданд.

Акмалхоҷа Атохоҷаев, ки дар корхонаи ҶСП “Сервис Баҳром” ҳамчун устои номдор зиёда аз 30 сол боз ба мардум хизмат мекунад, дар рафти суҳбат гуфт, ки Мавзуна шогирди ӯ буда, бениҳоят духтари чолоку доно аст.

- Ҳангоми таъмири мошин маҳорати баланд нишон медиҳад. Касбашро бисёр дӯст медорад. Ӯ ягона бону аст, ки касби мардонаро ба худ интихоб намудааст. –гуфт устоди Мавзуна.

ИСТЕЪДОДИ ХУДОДОД Ё ОРЗУИ КӮДАКӢ

Ба таъкиди Мавзуна, шахсоне, ки соҳиби касбу ҳунар мешаванд, ҳама ӯро истеъдоди Худодод мегӯянд. Аммо боз орзую шавқу рағбати кас набошад, ҳаргиз муваффақ намешавӣ. Барои ҳунарманд шудан, доимо бояд дар талош бошиву дониши лозимаро мустаҳкам намоӣ.

НАЗАРИ ДИГАРОН

- Дар аввал атрофиён маро тарафдорӣ намекарданд, аммо бо мурури замон ба ман офарин хонданд. Фикр мекунам, имрӯз дар ҳама соҳаҳо занону бонувон фаъолияти хуб нишон медиҳанд. Ман ҳам ҳамчун зан-модар мехоҳам дар ҷодаи интихобнамудаам фаъолияти хуб нишон дода, зиндагиамро беҳтару хубтар кунам, - гуфт ӯ.

Гарчанде бархе аз наздиконаш ба ӯ норозигӣ баён мекарданд, модараш ҳамеша ӯро тарафдорӣ мекард. Онҳо фикр мекарданд, ки ӯ аз уҳдаи ин кор намебарояд ва онҳоро низ нороҳат мекунад. Аммо ин бонуи таъмиргари мошинҳо ҳаргиз фикрҳои онҳоро қабул намекард ва доимо таъкид менамуд, ки ӯ бояд як корхонаи хурди худро боз кунаду сафи бонувонро дар ин соҳа зиёд намояд.

- Ҳаргиз аз нигоҳи дигарон нороҳат нашавед, ҳамеша ба пеш ҳаракат кунед, то пирӯз гардед,-хитоб мекунад Мавзуна.

МУШКИЛӢ ВА ФОИДА АЗ КОР

Ба андешаи ӯ ҳама кор мушкилӣ дорад. Чуноне ки табиб одами беморро муоҷила мекунад, устои мошин низ заҳмат мекашад. Усто шудан низ мушкил аст. То мушкилии мошинро пайдо кардан, таъмиргар бисёр заҳмат мекашад. Пеш аз ҳама бояд оромтабиат бошӣ, муносибати хуб дошта бошӣ. Ӯ мегӯяд: “Агар лозим бошад, бо автомобил муошират мекунам. Мехоҳам мисли одам забон дошта бошаду бо ман суҳбат кунад. Барои ҳамин ҳар касб дар навбати худ мушкилии худро дорад”.

- Бо кушодани нуқтаи таъмири мошинҳо ҳама таҷҳизоти наву замонавиро харидорӣ намудам. Ҳамин аст, ки бо мизоҷонам бе мушкилӣ хизматрасонӣ мекунам.

Ба гуфтаи Мавзуна ӯ то ҳол ба мизоҷони худ нархномаро пешниҳод накардааст. Ӯ мехоҳад зудтар ҳамчун таъмиргари мошин машҳур шавад ва ба мардум бе мушкилӣ хизматрасонӣ кунад.

Мавзуна омодааст, ки бонувонро аз касби доштаи худ огоҳ кунад. Гарчанде коргоҳаш хурд ҳам бошад, аммо ӯ мехоҳад шогирд гирад. “Мехоҳам ҷавонон вақти худро беҳуда нагузаронида, касб омӯзанд. Аз ҷавонию фаҳмиши худ истифода карда, барои беҳтар кардани сатҳи зиндагии худ ба илмомӯзию касбомӯзӣ машғул шаванд”, - мегӯяд ӯ.

- Бисёр мехоҳам, ки ҷавондухтаронро низ ба ин касби дош-таам ҷалб кунам. Зеро дар доштани касб ҷинсият муҳим нест. Муҳим он аст, ки дӯстдор касб бошему ба мардум хизмат кунем, - гуфт дар фарҷоми суҳбат Мавзуна.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 1 2 3 4 5

Феврал 2023 c.