Имрӯз дар Кумитаи миллии олимпии кишвар бо ташаббуси Кумитаи кор бо ҷавонон ва варзиши назди Ҳукумати ҷумҳурӣ, бахшида ба 70 – солагии қабули Эъломияи ҳуқуқи инсон ва Рӯзи ҷавонони Тоҷикистон дар мавзӯи “Ҳимояи давлатии ҳуқуқ ва озодиҳои инсон ва шаҳрванд дар Ҷумҳурии Тоҷикистон” мизи мудаввар доир гардид.

Аҳмадзода Дилноза, муовини раиси Кумитаи кор бо ҷавонон ва варзиш, чорабиниро ифтитоҳ бахшида, иброз дошт, ки “Эъломияи ҳуқуқи башар, ки аз тарафи Созмони Милали Муттаҳид қабул шудааст, ба масъалаи инсон ва мақоми он дар ҷомеа диққати ҷиддӣ додааст. Дар моддаи 1 эъломия зикр гардидааст, ки тамоми одамон аз лиҳози шаъну шараф ва ҳуқуқҳо баробар ба дунё омадаанд”.

Дар идома доир ба нақши эъломия суханронӣ сурат гирифта, аз ҷумла гуфта шуд, ки аз қабули Эъломияи умумии ҳуқуқи башар 70 сол пур мешавад. Эъломияи мазкур нахустин санади таърихиест, ки тамоми кишварҳои ҷаҳон, аз ҷумла Тоҷикистон, онро эътироф намудаанд. Мақсад аз таҳияи ин санади ҷаҳонӣ ҳифз ва ҳимояи ҳуқуқҳои инсон буда, дар он масоили ҳуқуқ ба ҳаёт, таҳсил, озодии баён ва дигар ҳуқуқҳои инсон дарҷ гардидаанд.