Чанде пеш дар Ваколатдор оид ба ҳуқуқи инсон дар Ҷумҳурии Тоҷикистон, барои муаррифии лоиҳаи «Стратегияи фаъолияти Ваколатдор оид ба ҳуқуқи кӯдак дар Ҷумҳурии Тоҷикистон барои солҳои 2018-2020» бо иштироки намояндагони мақомоти давлатӣ, созмонҳои байналмилалӣ, ташкилотҳои ҷамъиятӣ ва воситаҳои ахбори омма мизи мудаввар доир гардид.

Раҷабмо Ҳабибуллозода, муовини Ваколатдор оид ба ҳуқуқи инсон дар Ҷумҳурии Тоҷикистон, Ваколатдор оид ба ҳуқуқи кӯдак зимни суҳбат зикр кард, ки дар низоми мақомоти давлатӣ бо ташаббус ва ибтикори Пешвои миллат таъсис додани ниҳоди миллии ҳифзи ҳуқуқҳои кӯдак, Ваколатдор оид ба ҳуқуқи кӯдак дар самти таъмини эҳтиром, риоя ва ҳифзи ҳуқуқҳои кӯдак пешравии назаррас аст. Таҳияи лоиҳаи мазкур бо мақсади боз ҳам ташаккул додани фаъолияти ин мақомот ва риояи ҳуқуқу озодиҳои кӯдак нигаронида шуда, ба самти ҳуқуқи кӯдакони маъюб ва бо таҳсилоти босифат фаро гирифтани онҳо нигаронида шудааст.

Гуфта шуд, ки амалишавии Стратегияи мазкур дар таҳкими ҳуқуқу озодиҳои кӯдак дар ҷумҳурӣ ва иҷрои ӯҳдадориҳои байналмилалии Тоҷикистон дар самти ҳуқуқи кӯдак мусоидат хоҳад кард. Ин стратегия аз муқаддима ва 2 боб иборат буда, ҷиҳати иҷрои вазифаҳои зикршуда ва нақшаи амал барои солҳои 2018-2020 тарҳрезӣ шуда, дар он чорабиниҳои мушаххас барои соли 2018 ҷой дода шудааст.
Дар охир миёни намояндагони мақомоти давлатӣ, ҷомеаи шаҳрвандӣ, ташкилотҳои байналмилалӣ ва намояндагони ВАО гуфтугузор сурат гирифта, барои мукаммалгардонии лоиҳа тавсияҳо пешниҳод гардид.

Хуршед ХОВАРӢ, “ҶТ”