Имрӯз дар қисмҳои ҳарбии 051052, 051055 ва 051064-и Гвардияи миллии Ҷумҳурии Тоҷикистон Дилноза Аҳмадзода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади баланд бардоштани ҳисси ватандӯстӣ ва худшиносиву худогоҳии сарбозон ва иштироки фаъолона дар Рӯзи интихоботи Президенти Ҷумҳурии Тоҷикистон бо сарбозону афсарон мулоқот намуданд.

Номбурда зимни мулоқот иброз намуд, ки “иштироки ҳар яки шумо дар интихоботи Президентӣ ва раъйи шумо барои интихоби сарвари кишвар зарур аст. Ман бо боварии комил гуфта метавонам, ки шумо барои интихоби Президенти ояндаи кишвар омода ҳастед ва ба номзади арзандаи хеш овоз медиҳед”.

Дар фарҷоми мулоқот аз ҷониби Дилноза Аҳмадзода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои китобхонаи Гвардияи миллӣ китоби “Забони миллат –ҳастии миллат” туҳфа карда шуд. Инчунин миёни сарбозон аксияи “Ширкат дар интихобот масъулияти ҳар як фард аст!” гузаронида шуда, ба онҳо варақаҳои иттилоотӣ вобаста ба интихоботи президентӣ тақсим гардид.