Зане, ки интизоми намунавӣ дораду аз ҷониби хонавода дастгирии хуб меёбад, доимо дар зиндагӣ муваффақ мегардад. Чун ба ҳамаи мо маълум аст, ки то ба муваффақиятҳо ноил гаштан ва мавқеи муайян пайдо намудан, кас ба мушкилиҳо дучор мегардад. Аммо зани тоҷик ба ҳамаи ин мушкилиҳо нигоҳ накарда, ҳамеша дар талош аст, то муваффақ шавад.

Дилафрӯз Хоникбоева аз зумраи тоҷикдухтароне мебошад, ки имрӯз дар дастаи Президенти ИМА Ҷо Байден ба ҳайси муаллими калон, мушовир оид ба масъалаҳои сиёсӣ, ба нақшагирӣ ва омӯзиш дар USAID- агентии ИМА оид ба рушди байналмилалӣ фаъолият дорад.

Ӯ соли 1995 дар синни 7-солагӣ ҳамроҳи волидон ба Амрико рафта, таҳсилашро дар он ҷо оғоз намуд. Модараш ҳоло дар шабакаи маъруфи CNN кор мекунад ва падараш корманди ширкати маъруфи “Боинг” аст.
“Албатта, рӯзҳои аввал дар мулки бегона барои ҳар кас мушкил аст. Хусусан, ҳангоми муошират бо атрофиён. Дар ибтидо шахсан худам ҳангоми муошират душворӣ мекашидам. Синну солам, ки хурд буд, дарҳол забонро аз худ намудам. Дар кӯтоҳтарин муддат бе душворӣ бо ҳамсабақонам гуфтугӯ мекардам. Ба он ҷавонони тоҷик, ки мехоҳанд дар хориҷи кишвар таҳсилро идома диҳанд, маслиҳати ман чунин аст, ки ҳарчи бештар забонҳоро омӯхта, забондон шаванд. Бахусус, забони русӣ ва англисӣ, ки дар кишварҳои пасошӯравӣ муошират маҳз бо ин забонҳо сурат мегирад”, - гуфт Дилафрӯз.

Баъди хатми мактаби миёна дар Амрико ӯ таҳсилашро дар Донишгоҳи Ҷорҷ Мейсон дар риштаи таҳлилу ҳалли низоъҳо ба ҳайси ҳуқуқшинос идома мебахшад. Баъдан дар заминаҳои мудирияти буҳрон, мутахассиси ҳалли низоъҳо, ҳолатҳои буҳронӣ ва таъсири тағйирёбии иқлим ба тамоми ҷабҳаҳои зиндагии инсонҳо таҳсил ва омӯзиш кардааст.

Пас аз хатми донишгоҳ дар USAID аввалин бор шуда, дар Вашингтон кори худро оғоз кард. Баъдан бошад, муддати фаъолияти ӯро дида, Бунёди Оқохон (AKF) дар ИМА ба кор даъват мекунад, ки Дилафрӯз инро мепазирад.

Бо мурури замон ӯ дар яке аз бонуфузтарин бурсияи ҳукумати ИМА “Presidential leadership scholars” ба кор шуруъ намуд. Ин бурсия дар ИМА хеле бонуфуз аст, ки роҳи соҳибонашро барои рушд ҳам дар сиёсат ва ҳам дар ҷомеа хеле ҳамвор мекунад.

Дилафрӯз дар баробари кору фаъолият карданаш, узви раёсати созмони !People Tajikistan in America” мебошад. Ӯ донандаи забонҳои тоҷикӣ, англисӣ, фаронсавӣ ва русӣ мебошад.

Хабари хуши ба дастаи Ҷо Байден, раисҷумҳури тозаинтихоби ИМА ба кор даъват шудани як тоҷикдухтар аз рӯзи аввал дар сархати шабакаҳои иҷтимоӣ қарор дорад. Ва албатта тоҷикистониён хушнуд гардиданду аҳсану офаринаш гуфтанд. Дар шабакаҳои иҷтимоӣ бисёр суолҳо пайдо шуданд, ки ин бону кист ва чӣ гуна ба дастаи президенти Амрико роҳ ёфтааст?

Дилафрӯз тариқи саҳифааш дар шабакаи иҷтимоии Инстаграм аз ин хусус посух додааст, ки барои ба ин мансаб расидан, ҷаҳду талошҳои зиёд кардааст. Ва ҳамеша дар набард будааст, то муваффақ гардад. “Ман ба ҳайси мушовири аршади сиёсии барномарезӣ ва сиёсатгузорӣ ва омӯзиши USAID ба ҳукумати Байден-Ҳаррис пайвастам. Ин як фурсате аст, пеш аз ҳама ба¬рои дидгоҳҳои гуногун. Ман дар мансаби нав савганд ёд кардам ва ба кор оғоз намудам”, - иброз доштааст ӯ дар шабакаи Инстаграм.

Мансабе, ки бонуи тоҷик ба он расидааст, як мансаби хеле баланд ба ҳисоб меравад. Хусусан роҳи вайро барои расидан ба мансабҳои калонтар дар сиёсати ИМА ҳамвор месозад.
  
Хоникбоева ҳамчунин дар саҳифааш навиштааст: “Барои ман ин кор комилан шахсист. Мо ба танҳоӣ наметавонем, ба натиҷае бирасем. Ман рӯйи шонаҳои падару модар, ёру дӯстон, наздиконам ва ҷомеаи худ истодаам. Ман имрӯз хушбахтам, ки инсонҳои беҳтарине мисли волидайнам ва ҳамватанон дорам, ки до¬имо аз онҳо маслиҳату машварат мегирам. Ман хушнудам, ки кормандони муъҷизакори USAID- ро пуштибонӣ мекунам”.

Ин тоҷикдухтар аз рӯзҳои аввали дар Амрико будан, дар чорабиниҳо ва вақтҳои фароғат бо ҳамсабақону дӯстонаш аз урфу одат, рӯзгори мардумҳои кишварҳои якдигар пурсон шуда, бо ин васила ҷаҳонбинии худро боз васеътар месозад.

Дилафрӯз ба ин муваффақияти бузург бо талоши зиёд ва таҳсили намунавии худ ноил гаштааст. Ба ӯ дар иҷрои вазифаи нав будбориҳо хоҳонем ва шодем, ки боз як иртиботе бо тоҷикони Амрико пайдо намудем ва умед дорем, сафи чунин ҷавонон зиёд хоҳад шуд.