7-уми октябр дар заминаи супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати баланд бардоштани донишҳои соҳавии мураббиёну варзишгарон дар самти психологияи варзишӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз ҷониби Муассисаи давлатии “Маркази такмили ихтисоси кормандони соҳаи тарбияи ҷисмонӣ ва варзиш” таҳти унвони “Нақши психологияи варзишӣ дар ҳавасмандсозӣ ва идоракунии варзишгарон: роҳҳои беҳтар кардани натиҷаҳои варзишӣ” семинар - тренинги омӯзишӣ оғоз гардид.

Дар ин бора маркази таҳлил ва иттилооти Кумитаи кор бо ҷавонон ва варзиши назди Ҳукумати кишвар хабар додааст.

Бино ба иттилои манбаъ, семинар - тренинги омӯзишӣ бо ҷалби мутахассиси хориҷӣ гузаронида шуда, он то 10-уми октябри соли ҷорӣ идома меёбад ва дар охир иштирокчиён бо сертификат сарфароз гардонида хоҳанд шуд.

Чорабиниро Шабнам Раҳимзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ифтитоҳ намуда, иброз дошт, ки семинар барои варзишгарон ва мураббиён имкони хубест, то донишу таҷрибаи худро дар соҳаи психологияи варзишӣ ғанӣ сохта, усулҳои муосири баланд бардоштани натиҷаҳои варзиширо омӯзанд.
Таъкид шуд, ки равоншиносӣ воситаи муассири ҳавасмандсозӣ ва идоракунии варзишгарон аст, ки барои ноил шудан ба натиҷаҳои олӣ кӯмак мекунад. Аз ин лиҳоз, дар баробари омодагии ҷисмонӣ, омодагии равонӣ низ нақши ҳалкунанда дар музаффарияти варзишгарон мебозад.

Тибқи итилоъ аз ҷониби МД “Маркази такмили ихтисоси кормандони соҳаи тарбияи ҷисмонӣ ва варзиш” барои дар сатҳи баланди омӯзишиву ташкилӣ ба роҳ мондани чорабинии мазкур мутахассиси сатҳи байналмилалӣ, ҷоизадори Бозиҳои олимпӣ дар соли 2000-ум аз намуди варзиши Таэквондо, психологи соҳибтаҷриба, мураббии психологияи варзишии чандин варзишгарони муваффақи ҷаҳон Наталия Иванова аз Федератсияи Русия даъват гардидааст, то ин ки ӯ бо таҷрибаи зиёда аз 42-солаи хеш дар соҳаи психологияи варзишӣ мутахассисони моро ба роҳҳои нави идоракунии равонии варзишгарон ошно созад.

Шаҳбози Искандар, директори МД “Маркази такмили ихтисоси кормандони соҳаи тарбияи ҷисмонӣ ва варзиш” зимни баромади худ қайд кард, ки семинари мазкур аз 10 модули омӯзишӣ иборат буда, имконият медиҳад, ки мураббиён ва варзишгарон дар самтҳои гуногуни психологияи варзишӣ дониши худро такмил диҳанд. Ин ташаббус ҳамчунин барои нишон додани дастгирии пайвастаи Ҳукумати Ҷумҳурии Тоҷикистон ба рушди соҳаи варзиш дар кишвар буда, мо умедворӣ аз он мекунем, ки семинар ба ҳадафи аслии худ, беҳтар намудани натиҷаҳои варзишӣ тавассути ҳавасмандсозӣ ва идоракунии равонӣ комилан мерасад.

Ба гуфти масъулин, соли равон аз ҷониби МД “Маркази такмили ихтисоси кормандони соҳаи тарбияи ҷисмонӣ ва варзиш” ин маротибаи 5-ум аст, ки аз хориҷи кишвар мутахассисони сатҳи байналмилалӣ ҷиҳати омӯзонидани мураббиёну масъулини соҳа ва такмили донишҳои соҳавӣ даъват карда мешаванд.