Имрӯз, 6-уми сентябр дар толори маҷлисгоҳи КВД КТН “Шарқи озод” даври II озмуни ҷумҳуриявии “ТАРАННУМИ ВАТАН” натиҷагирӣ карда шуд.

Даври II озмуни мазкур бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Муассисаи давлатии рӯзномаи “Ҷавонони Тоҷикистон” ба ифтихори 33-юмин солгарди Истиқлоли давлатӣ аз 7-уми июн то 31-уми августи соли ҷорӣ гузаронида шуда, дар он ҳудуди 155 нафар иштирок намуданд.

Маросими натиҷагирии даври II озмун бо иштироки 10 нафар аъзои комиссия аз ҳафт ниҳод - Иттифоқи нависандагони Тоҷикистон, Вазорати фарҳанги Ҷумҳурии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Донишкадаи давлатии фарҳанг ва санъати Тоҷикистон ба номи М. Турсунзода, Консерваторияи миллии Тоҷикистон ба номи Т. Сатторов, ТМТ “Шаҳнавоз” ва рӯзномаи “Ҷавонони Тоҷикистон” доир шуда, зимни беш аз 40 навори иштирокчиёни фаъоли озмунро мавриди муҳокима қарор доданд ва барои муайян кардани ғолибон аз рӯйи низоми 500 бала кор гирифтанд.

Дар рафти натиҷагирӣ ҳайати ҳакамон барои аниқ кардани иштирокчиёни фаъоли озмун бо истифода аз низоми 500 бала ба ғайр аз натиҷаҳои шабакаи иҷтимоӣ – саҳифаи фейсбукии рӯзнома - “ҶАВОНОНИ ТОҶИКИСТОН” (писандидан (лайк), тамошои видео (просмотр)), инчунин аз рӯйи меъёрҳои “Маҳорати қироат” ва “Мазмуну муҳтаво” баҳогузорӣ карданд.

Қобили қайд аст, ки қабули наворҳо ба даври II озмун то 31 августи соли равон идома кард. Барои фарогирии наворҳои иштирокчиёни озмун бошад, то санаи 5 сентябр имконият дода шуда буд. Ҳамзамон, натиҷаи наворҳои иштирокчиёни даври II озмун аз саҳифаи фейсбукии рӯзнома - “ҶАВОНОНИ ТОҶИКИСТОН” то соати 10:00, санаи 5 сентябр ба инобат гирифта шуданд.

Ёдовар мешавем, ки пас аз баҳогузории ҳайати ҳакамон, маросими ҷамъбастии даври II озмуни ҷумҳуриявии “ТАРАННУМИ ВАТАН” рӯзҳои наздик дар шаҳри Душанбе доир гардида, ғолибони он бо ифтихорномаву туҳфаҳои арзишманд қадрдонӣ хоҳанд шуд.