Ҳангоми гузаронидани тадқиқоти сотсиологии ташкилоти “Имконият”-и ҷамъияти маъюбони шаҳри Душанбе роҳбари он Ҳамроев Фирӯз чунин иброз намуд: “Бо зиёд шудани аҳолии Тоҷикистон шумораи маъюбон ва дигар шахсони эҳтиёҷманд меафзояд ва зарурати дастгирӣ ва баланд бардоштани сатҳи хизматрасониҳо пайдо мешавад. Масъалаи муҳими замони муосир барои баланд бардоштани сатҳи дониши маъюбон ва дигар шахсони эҳтиёҷманд оид ба ҳуқуқҳо, имтиёзҳо хизматрасониҳои иҷтимоӣ мебошад. Ҳарчанд дар ноҳияҳо марказҳои давлатии ёрии ҳуқуқии ройгон таъсис дода шудааст, аммо то ҳол сатҳи донишҳои ҳуқуқии маъюбон хеле паст аст. Ҷамъияти маъюбони шаҳри Душанбе - “Имконият”, ки ба ҳифзи ҳуқуқ ва манфиатҳои шахсони дорои имконияташон маҳдуд машғул аст, дар доираи “Барномаи волоияти қонун ва дастрасӣ ба адолат” бо мақсади омӯзиши сатҳи ахбороти маъюбон оид ба ҳуқуқҳо ва имтиёзҳои худ, инчунин муайян намудани сатҳ ва дастрасии хисматрасониҳои давлатӣ ба шахсони имконияташон маҳдуд тадқиқоти сотсиологӣ гузаронид”.

Барои гузаронидани тадқиқот 7 минтақаи тадқиқотӣ: шаҳри Душанбе ва 6 НТМ интихоб гардид. Дар рафти тадқиқот тахминан 350 нафар шахсони имконияташон маҳдуди шаҳру деҳоти минтақаҳои интихобшудаи Тоҷикистон пурсиши сотсиологӣ гузаронида шуд. Дар шаҳри Душанбе 113 нафар, н. Рӯдакӣ 44 нафар, н. Файзобод 41 нафар, ш. Ҳисор 39 нафар, ш. Ваҳдат 39 нафар, ш. Турсунзода 38 нафар, н. Варзоб 34 нафарро ташкил дод.

Дар пурсиши сотсиологӣ ҷавонони синну соли гунонун иштирок намуданд. Пурсишшавандагон аз синни 16-25 сола 21,6%, 26-30 сола 15%, 31-40 21,0%, 41- 50 сола 13, 8% -ро ташкил намуданд. Дар тадқиқот мусоҳибони сатҳи таҳсилоти гуногун иштирок намуданд: 19,8% мусоҳибон маълумоти олӣ, 11,5 % маълумоти олии нопурра, 8,6% маълумоти миёнаи касбӣ, 14,7% маълумоти миёнаи умумӣ буданд. Аз нишондиҳандаи охирин маълум мегардад, ки аз шаш як ҳиссаи маъюбон ба таҳсил фаро гирифта нашуданд.