ҶОМЕА
Шанбе 22 Июн 2024 10:31
7950
Ба озмуни "ҶТ"

Албатта, ҳар як гӯшаи диёри нозанин бароямон азиз аст. Дар баробари ин пешравиву ободиҳои солҳои охири пойтахтамон бешак дили ҳар нафарро тасхир менамоянд. Имрӯз симои Душанбе ба куллӣ тағйир ёфта, бо талошҳои раиси созандаву ташаббускор Рустами Эмомалӣ пойтахтамон ба як гӯшаи зебо табдил ёфтааст. Дар ҳар як гӯшаву канори он ҳамарӯза корҳои ободониву созандагӣ идома доранд. Иншооти муосир бо усули замонавӣ, марказу хиёбонҳои бо тарҳи нав бунёдшуда ва боз навгониҳои зиёди дигар воқеан Душанбеи азизамонро ба шаҳри диданиву дилрабо мубаддал намудааст. Ва албатта, ин ҳама ободкориҳо имкон додааст, то Душанбе на танҳо миёни кишварҳои ҳамсоя, балки дар байни кишварҳои ИДМ ва мамлакатҳои хориҷи дур шуҳрату эътибори зиёдеро соҳиб гардад.

Бешубҳа, шаҳри дилорои Душанбе таваҷҷуҳи сайёҳон ва донишмандону муаррихони зиёдеро ба худ ҷалб кардааст. Ҳамарӯза аз ин шаҳр ҳазорон меҳмонону сайёҳон дидан мекунанд. Шаҳри Душанбе нигинест дар минтақа. Соли 2021 ба зиммаи пойтахти азизамон рисолати дигари бузурге илова гашт: Душанбе пойтахти фарҳангии ИДМ дар соли 2021 эълон гардид. Падидаи бузурги дигар он аст, ки сол ба сол робитаҳои иқтисодиву тиҷоратии Душанбе бо шаҳрҳои бузурги кишварҳои дуру наздик афзун гашта истодааст ва имрӯз Душанбе бо шаҳрҳои бузург робитаи бародаршаҳрӣ дорад.

Дар баробари ин ҳама, чун омӯзгори муассисаи соҳаи варзиш моро навгониҳои рӯзафзуни соҳаи варзиш дар пойтахт бешак рӯҳбаланд намудааст. Тавре шоҳид будем, 21 июли соли 2020 дар шафати мавзеи бисёр хушманзараи Лучоби пойтахт маҷмааи боҳашамати замонавии варзишӣ ба истифода дода шуд ва ин минтақаи шаҳрро бешак метавон як шаҳраки варзишгарон ном бурд. Илова бар ин, имрӯз майдону толорҳои варзишӣ дар ҳар як гӯшаи пойтахт бунёд ёфта на танҳо ҳусни шаҳрро боз ҳам зебо гардонидаанд, балки ба ҷойи дӯстдоштании хурду калон, бахусус ҷавонон мубаддал гаштаанд.

Дар баробари ин, пойтахтамон имрӯз боз рисолати бузурги дигареро ба зимма дорад. Он дар рушду камолоти насли навраси кишвар, илму ҳунаромӯзии ҳазорон нафар ҷавонон нақши шоиста дорад. Нафарони солхӯрда пайваста ёдовар мешаванд, ки солҳои пеш дар пойтахт ҳамагӣ 5 ё 6 мактаби олӣ фаъолият дошт. Имрӯз чӣ? Шумораи онҳо ба маротиб афзун гаштаасту ҳар ҷавони болаёқат имкон дорад, дар дилхоҳ соҳа таҳсил намояд. Дар баробари муассисаҳои олӣ, даҳҳо коллеҷу омӯзишгоҳҳо имрӯз дар пойтахт ҷавононро ҳамчун мутахассис дар соҳаҳои гуногун омода месозанд. Умуман, барои таҳсилу касбомӯзӣ, фароғати насли ҷавон дар пойтахти азизамон монеае мавҷуд нест. Имрӯз боргоҳҳои олии пойтахтро ҷавонон бо касбу ихтисосҳои гуногун хатм менамоянд, яъне Душанбе чун хонаи умед ҷавононеро, ки ташнаи илму ҳунаранд, ба оғӯш гирифтаву ба камол мерасонад. Боз кам нестанд сафи ҷавононе, ки баъди хатми муассисаҳои таълимӣ тақдири минбаъдаи худро ба ин шаҳри зебо мепайванданд. Пас, бо такя ба гуфтаҳои боло иштибоҳе намешавад, агар гӯем, ки имрӯз Душанбешаҳр чун хонаи умеди ҷавонон ва макони илму ҳунаромӯзӣ барои насли ҷавон рисолати худро ба таври шоиста иҷро намуда истодааст. Бешубҳа, тадбирҳои зиёде, ки дар асоси роҳнамоиҳои Пешвои муаззами миллат муҳтарам Эмомалӣ Раҳмон дар Душанбе роҳандозӣ гашта истодааст, барои насли ҷавони имрӯза аст. Бунёди майдону иншоотҳои зиёди варзишӣ, китобхонаву боғу дигар иншоотҳои фароғатӣ ин ҳама пеш аз ҳама барои насли ҷавон аст, то онҳо вақти худро беҳуда нагузаронида, ба варзиш, китобхониву дигар машғулиятҳои зарурӣ пайваста шуғл варзанд.

Воқеан, ҳамагон огаҳем, ки дар пойтахти азизамон бевосита бо иқдоми раиси шаҳр нақшаи ба “Шаҳри сабз” табдил додани Душанбе роҳандозӣ гардидааст. Дар ин маврид мебояд зикр сохт, ки ҷойи зисту таҳсилу кор бешак хонаи дуюм маҳсуб меёбад. Дар идома бо ифтихор зикр намуданиам, ки бисёр донишҷӯён, ҷавонони касбу кори гуногуни пойтахтамон ин нуктаро дуруст дарк намудаанд. Аз ҷумла, бисёр вақт ҳангоми шанбегиву ҳашарҳо мо шоҳиди иштироки фаъолонаи донишҷӯён дар макони таҳсилашон, дар гӯшаҳои гуногуни пойтахтамон мегардем, ки албатта ин амали онҳо намуна барои дигар ҳамсолонашон аст.

Ба сокинону меҳмонони пойтахт, аз ҷумла ба ҷавонон гуфтаниам, ки дар баробари илмомӯзиву касбомӯзӣ имрӯз мо рисолати дигареро низ ба дӯш дорем: бо ҳамон неруи бузурги ҷавонмардӣ саҳме гузоштан дар ободонии пойтахти азизамон. Мо бояд бо шукргузорӣ аз сулҳу субот, ваҳдати миллӣ, сиёсати Сарвари давлат ҳар яке чун узви ҷомеа дар навбати аввал бо амалу рафтори шоиста, бо ҳамон фарҳанги волои тоҷикона дар ободии пойтахт худро масъул донем.

Муродмад ОЙДӮСТОВ,
муовини декани факултаи сайёҳию кӯҳии ДТҶТ
ба номи С. Раҳимов

Эзоҳи худро нависед



Рамзҳо дар расм