ҶОМЕА
Ҷумъа 04 Декабр 2020 04:06
6948
Бештари одамон намедонанд, ки кам хӯрдани об барои баданашон кадом мушкилеро пеш меорад. Оре, нӯшидани об фавоиди зиёде дорад, ки чанде аз онҳоро номбар мекунем:

АФЗОИШИ ЭНЕРГИЯИ БАДАН

Мо аксар вақт, бе он ки коре анҷом дода бошем, эҳсоси хастагӣ мекунем. Мутахассисон яке аз сабабҳои чунин хастагиро дар камбуди оби бадан медонанд. Об оксиген ва дигар маводи ғизоиро ба ҳуҷайраҳо интиқол медиҳад ва норасоии он боиси гуруснагии ҳуҷайраҳо мегардад. Агар бадани инсон ба андозаи кофӣ пуроб бошад, қалби ӯ низ маҷбур намешавад, барои расонидани хун ба нуқоти мухталифи бадан бо шиддати бештаре кор кунад. Ва кори муътадили қалб умри узвҳоро дароз мекунад.

ҲИФЗИ ТАНОСУБИ АНДОМ

Агар нафаре мехоҳад, аз вазни барзиёд раҳоӣ ёбад, бояд бидонад, ки об боиси афзоиши метаболизми бадан мешавад ва инсони пуроб худашро сер ҳис мекунад. Бинобар ин, саъй кунед, ба ҷои истеъмоли нӯшокиҳои газдор об бинӯшед. Агар касе як истакон оби ях бинӯшад, бадани ӯ бояд ин обро гарм кунад. Дар натиҷа, бадан миқдоре аз ин гармии заруриро аз ҳисоби сӯзонидани чарбиҳо ба даст меорад.

КОҲИШИ СТРЕСС

85 %-и бофтаҳои мағзиро об ташкил медиҳад. Ҳангоми ташнагӣ бадан ва мағз барои анҷоми фаъолиятҳояшон ба фишор ва стресс мувоҷеҳ мешаванд. Барои коҳиш додани сатҳи стресс мутахассисон тавсия медиҳанд, ки ҳамеша ҳангоми кор як шиша об рӯи миз дошта бошем ва ҳангоми варзиш низ каме об бо худ гирем.

ПЕШГИРӢ АЗ КАШИДАШАВИИ МУШАКҲО

Нӯшидани об боис мешавад, ки мушакҳо камтар дучори гирифтагӣ шаванд. Инчунин, об ба оксигенрасонии кофӣ ва поксозии мушакҳо аз заҳрҳо кӯмак мекунад. Ҳангоме ки бадани мо оби кофӣ дошта бошад, метавонад бо қудрати бештар ва муддати зиёдтар корҳои баданиро анҷом диҳад.

ТАРОВАТИ ПӮСТ

Ҳангоми камбуди об дар пӯсти инсон чину ожангҳо бештар мешаванд. Нӯшидани об боиси фарбеҳ шудани ҳуҷайраҳои пӯстӣ ва коҳиши чину ҷавон кардани пӯст мешавад. Ҳамчунин, оби кофӣ ба ҷараёни хун дар пӯст мусоидат мекунад ва пӯстро аз нопокиҳо тоза намуда, таровату ғизонокии бештари онро таъмин месозад.

БЕҲБУДИ КОРИ МЕЪДАВУ РӮДА

Мутахассисон мегӯянд, об ба фаъолияти меъдаву рӯда низ таъсири зиёди мусбат дорад. Маҳз об боиси ҳаракати муътадили хӯроки истеъмолшуда дар дохили меъдаву рӯдаҳо мегардад. Ҳамчунин, узвҳои ҳозима баъзе аз маводи маъданиро танҳо ба воситаи молекулаҳои об метавонад ҷазб кунанд.

КОҲИШИ ХАТАРИ МУБТАЛОӢ БА САНГҲОИ ГУРДА ВА МАСОНА

Бо кам нӯшидани об, хатари мубтало шудан ба сангҳои роҳи пешобгузар афзоиш меёбад. Об боиси тунук кардани намакҳо ва маводи маъдании дар роҳи пешобгузар мавҷудбуда мегардад ва ҳамзамон ба ташкили кристалҳои сангҳои роҳи пешобгузар монеъ мешавад. Сангҳои гурда ва масона ҳангоми пешобхориҷкунии тунук наметавонанд шакл бигиранд. Бинобар ин, хатари мубтало шудан ба ин бемориҳои дарднок коҳиш меёбад.

ТАВСИЯҲО

Ба таъкиди мутахассисон мунтазам нӯшидани об асари шифобахшии онро дар бадан боло мебарад ва беҳтарин замони об хӯрданро низ тавсия медиҳанд. Масалан субҳ, баъди аз хоб бедор шудан, ду истакон об ба фаъол кардани узвҳои дохилӣ кӯмак мекунад. Як истакон об ним соат қабл аз ғизо хӯрдан, ба ҳазми роҳати он кӯмак мекунад. Як истакон об қабл аз гирифтани ҳаммом фишори хунро дар бадан коҳиш медиҳад.

Таҳияи Ш. ЭШОНОВА,
“ҶТ”





Эзоҳи худро нависед



Рамзҳо дар расм