Давоми нимсолаи якуми соли 2023 аз ҷониби Кумитаи давлатии идораи замин ва геодезии Ҷумҳурии Тоҷикистон ва мақомоти он дар маҳал 7803 ҳолати вайронкунии қонунгузории замин ошкор ва барои бартараф намудани ҳолатҳои ошкоргардида 7000 дастур дода шуд.

Дар ин бора Ориф Хоҷазода, раиси Кумитаи давлатии идораи замин ва геодезии Ҷумҳурии Тоҷикистон зимни нишасти матбуотии ин ниҳод маълумот дод.

“Дар баробари ин нисбати 6548 ҳолат парвандаи маъмурӣ тартиб дода шуда, ба маблағи 3 миллиону 678 ҳазору 27 сомонӣ қарорҳои ҷаримабандӣ қабул гардид, ки аз ин 2 миллиону 825 ҳазору 67 сомонӣ ба суратҳисоби махсуси Кумита ворид карда шудааст”-гуфт Ориф Хоҷазода.

Ҳамчунин қайд карда шуд, ки ҳангоми гузаронидани корҳои назоратӣ 2 қарори ғайриқонунӣ қабулнамудаи раиси ноҳияи Ёвон вобаста ба замин ошкор гардидааст.

Ҳошим РАҲМАТУЛЛОЕВ, “ҶТ”