ҶОМЕА
Панҷшанбе 21 Ноябр 2019 11:29
5235
Аз эълон гардидани “Соли рушди сайёҳӣ ва ҳунарҳои мардумӣ” як сол сипарӣ гашт ва мо дар фарҷоми он қарор дорем. Баҳри дар кадом сатҳ сипарӣ гардидани соли 2018, ки аз ҷониби Пешвои муаззами миллат  “Соли рушди сайёҳӣ ва ҳунарҳои мардумӣ” эълон гардида буд бо як савол ба шаҳрвандони касбу кори гуногун муроҷиат намудем.

Санъат Тоҳирзода, коршинос:
- Албатта, эълон гардидани  “Соли 2018- соли рушди сайёҳӣ ва ҳунарҳои мардумӣ” барои эҳёи ҳанарҳои мардумӣ ва рушди бахши сайёҳии кишвар такони хубе шуд, вале ба андешаи ман эҳёи ҳунарҳои мардумӣ ва рушди соҳаи сайёҳӣ кори яксола набуда, аз масъулини соҳа андешидани тадбирҳои ҳамарӯзаро талаб менамояд. Зеро, бо ин роҳ мо метавонем, ҳарчи бештар ҳунарҳои мардумиро эҳё ва сайқал дода, сайёҳони хориҷиро ба мамлакати худ ҷалб намоем. Ташрифи сайёҳон ба Тоҷикистон ба буҷаи давлат, ба ширкатҳои сайёҳӣ, меҳмонхонаву қаҳвахонаҳо даромад оварда, барои ба фурӯш рафтани маҳсулоти ҳунарҳои мардумӣ мусоидат мекунад. Ҳунарҳои дастиву миллии мо ба фурӯш ки рафт, даромад ба оилаҳои ҳунарманд мешавад. Даромади оилаҳои ҳунарманд дар навбати худ ба беҳтар гардидани сатҳи зиндагӣ ва некӯаҳволӣ оварда мерасонад. 

Абдумуминзода  Ситора,директори китобхонаи илмии Донишгоҳи технологии Тоҷикистон:
- Соли 2018, ки “Соли рушди сайёҳӣ ва ҳунарҳои мардумӣ” эълон гардид, ҳунарҳои мардумии манотиқи гуногуни Тоҷикистонро ба мардум муаррифӣ карда тавонист. Илова бар ин имкон дод, ки ҳунарҳои мардумӣ дар расонаҳои ахбор нисбат ба солҳои гузашта беҳтару бештар инъикос гардад. Аҳолии Тоҷикистон нисбат ба ҳунарҳоӣ мардумӣ дар ин сол тасаввуроти бештар пайдо намуданд. Навъҳои ба гӯшаи фаромӯширафтаи ҳунарҳои мардумӣ  низ то андозае эҳё шуданд. Яъне метавон хулоса кард, ки “Соли рушди сайёҳӣ ва ҳунарҳои мардумӣ” дар ташаккули ҳувияти миллӣ ва худшиносии мардуми тоҷик як зина саҳми назаррас гузошт. 

Иброҳимзода Мумина, мудири САҲШ дар шаҳри Кӯлоб:
- “Соли рушди сайёҳӣ ва ҳунарҳои мардумӣ”, ки  иқдоми наҷибу саховатмандонаи бевоситаи Пешвои миллат буд, ба занони хонанишини ҳунарманд бисёр кӯмак расонид. Заноне, ки соҳиби ҳунар ва маҳсулоти қадимаи ҳунармандӣ, аз қабили  бофандагиву нақшдӯзиву шерозбофӣ буданд, бе ягон душворӣ дар ин сол маҳсули дасти хешро пешкаши мардум гардониданд. Яъне соли 2018 барои эҳёи ҳунарҳои аҷдодӣ иқдоми хубе шуд. 

Сайдаҳрор Сайҷалолзода,корманди Кумитаи кор бо ҷавонон ва варзиши назди Ҳукумати Ҷумҳурии Тоҷикистон:
- “Соли рушди сайёҳӣ ва ҳунарҳои мардумӣ” иқдоми неку созандаест, ки барои равнақ ёфтани касбу ҳунарҳои мардумӣ заминаи мусоид фароҳам овард. Дар асл ҳунар ва сайёҳӣ пайванди якдигар буда, бо мақсади муаррифии фарҳанги тоҷикон ва баланд бардоштани сатҳи некӯаҳволии мардуми шарифи кишвар роҳандозӣ гардидаанд. Дар ин радиф, анъана ва ҳунарҳои миллӣ чун таҷассумгари симои маънавии халқ, муттаҳидсозанда ва пайвандгари таърихи гузаштаву муосир мақоми арзандаро касб намудааст.
Дар ин сол ҳунарҳои қадимаи миллии тоҷикон аз нав эҳё карда шуд. Бахшида ба эълон гардидани соли 2018 “Соли рушди сайёҳи ва ҳунарҳои мардумӣ” чорабиниҳои рангоранги фарҳангию фароғатӣ ва оммавӣ таҳти унвони “Ҷавонон – муаррифгари фарҳанги миллӣ ва эҳёгарони ҳунарҳои мардумӣ” баргузор шуданд, ки дар онҳо дастовези ҳунармандони кишвар ба намоиш гузошта шуданд.

Фарзонаи Абдураҳим,омӯзгор:
- Соли 2018 бо пешниҳоди Асосгузори сулҳу ваҳдати миллӣ Пешвои миллат муҳтарам Эмомалӣ Раҳмон дар ҷумҳурӣ “Соли рушди сайёҳӣ ва ҳунарҳои мардумӣ” эълон гашт, тӯли як сол натиҷаҳои неку хотирмонеро дар роҳи рушди сайёҳӣ ва эҳёи ҳунарҳои мардумии милати тоҷик  ба бор овард. Ҷониби аз ҳама муҳим ва самарабахши эълон гаштани ин сол замина гузоштан ва зинда гардонидани ҳунарҳои мардумии бобоёну гузаштагони пурифтихорамон буд. Умед дорем, ки бо анҷоми соли 2018 таваҷҷуҳи Ҳукумати Ҷумҳурии Тоҷикистон нисбат ба ин соҳаҳои муҳим маҳдуд нашуда, балки аз ин дида мутарақитар мегардад.  Бо шарофати соҳибистиқлол гардидани Ҷумҳурии Тоҷикистон масъалаҳои худшиносии миллӣ, фарҳанги миллӣ, рисолати давлатдорӣ, шаҳрдорӣ ва шаҳрсозӣ, эҳёи суннатҳои таърихӣ, фарҳанги қадимаи ниёгон, санъати амалии халқӣ, кашидадузӣ, чакандузӣ, меъморӣ, кулолгарӣ хусусан санъати заргарӣ эҳё гардида, ривоҷ ёфта истодааст.
Воқеан, иқдоми шоистаи Сарвари давлат яъне ихтисос додани соли 2018 ҳамчун “Соли рушди сайёҳӣ ва ҳунарҳои мардумӣ” роҳи ҷомеаро барои расидан ба зиндагии арзанда равшан намуд. Умед аст, ки рушди соҳаи сайёҳӣ ва ҳунарҳои мардумӣ омили асосии пешрафти иқтисодиёди миллӣ хоҳад гашт.

Холиқназар Ҷумъаев, рӯзноманигор:
- Ба назари банда бо эълон кардани “Соли рушди сайёҳӣ ва ҳунарҳои мардумӣ” соли равон дар рушди соҳаи сайёҳӣ ва ҳунарҳои мардумӣ як таҳавулоти бузург ва як таккони чашмрасе ба амал омад. Таҳаввулоте, ки солҳои қаблӣ дида намешуд. Албатта ин пешрафт омилҳои гуногуни худро дорад. Нахуст ин ки эълони “Соли рушди сайёҳӣ ва ҳунарҳои мардумӣ” аз тарафи Пешвои миллат дар тамоми манотиқи кишвар дастгирӣ ёфт ва заминаи асосиро барои рушди соҳа муҳайё намуд. Дуввум дар ин сол бинобар ба даст овардани имтиёзҳои зиёд, соҳибкорон тавонистанд, дар баробари васеъ намудани доираи фаъолияти ширкатҳои сайёҳиашон ширкатҳои нав кушода, як базаи пурқуввати дорои инфрасохтори хубро ба вуҷуд оранд, роҳхатҳои нави сайёҳӣ бо нархҳои нисбатан арзонтар боз намоянд. Ин худ боиси он гардид, ки шумораи сайёҳон нисбат ба солҳои қаблӣ як баробар бештар шавад. Сеюм бо зиёд шудани шумораи ширкатҳои навтаъсиси сайёҳӣ рақобат дар ин соҳа бештар шуд. Банда, худ тобистони соли равон бо сайёҳон ҳамроҳ шуда, зиёда аз 10 рӯз дар кӯҳҳои сарбафалаккашида, кӯлҳо ва манзараҳои гуногун сайёҳат карда, як тадқиқоти журналистӣ роҷеъ ба мавзӯи мазкур анҷом додам. Бо чашмони худ назора кардам, ки воқеан пешраф дар ин соҳа хеле хуб ба назар мерасад, ки ин хеле хуб аст. Дар ин ҷабҳа саҳми ҳама мақомоти ҳукуматӣ аз ҷумла Кумитаи ҷавонон ва варзиш ҳам ба чашм мерасад. Моро зарур аст, ки бо ба итмом расидани “Соли рушди сайёҳӣ ва ҳунарҳои мардумӣ” ба ин мавзуъ хотима надиҳем ва дар оянда базаи ба вуҷудовардаро равнақ диҳем. Алъон Тоҷикистон барои пешбурди ин соҳа ҳама шароитро дорад, танҳо бояд босамар истифода барем. Зеро кишвари биҳиштосои моро, ки биҳишти рӯи замин ҳам меноманд, омодаанд, ки миллионҳо сайёҳони ҷаҳон зиёрат кунанд, аз таърих, тамаддун ва ҳунарҳои мардумии он огоҳ шаванд. Аз суҳбат бо сайёҳони зиёде дарёфтам, ки чунин табиати зеборо онҳо дар кам кишваре дучор омадаанд. Пас мо бояд ин табиатро боз ҳам зенботар нигоҳ дорем ва ҷалби сайёҳонро ба кишвар бештар гардонем ва ба Асосгузори сулҳу ваҳдат, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои эълони “Соли рушди сайёҳӣ ва ҳунарҳои мардумӣ” сипосгузорӣ намоем. 

Гулаҳмадзода Зулфиқор, раиси Кумитаи иҷроияи ҲХДТ дар ноҳияи Шоҳмансур:
 - Имсол, ки вобаста ба рушди сайёҳӣ ва эҳёи ҳунарҳои мардумӣ буд, омаду рафти сайёҳони хориҷӣ бештар гашт ва ҳунарҳои мардумӣ ҳам рушду нумӯ ёфтанд. Ватани мо сарзамини сайёҳӣ ва миллати тоҷик аз қадим миллати ҳунарманд мебошад. Мо бар онем, ки бо Роҳбари оқилу дурандешамон Ватани азизамон Тоҷикистон боз ҳам шукуфон мегардад. 

Таҳияи Мӯниса ДОДОВА ва Меҳрубон ИМОМОВА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1

Ноябр 2019 c.