ҶОМЕА
Сешанбе 23 Май 2017 01:41
404

Соли 2015 андозаи миёнаи нафақаи меҳнатӣ дар ҷумҳурӣ 230 сомониро ташкил дод. Шумораи нафақагирон бошад, дар ин давра 13 ҳазор нафар афзуд. Айни ҳол шумораи умумии нафақагирон дар ҷумҳурӣ 625461 нафарро ташкил медиҳад.

Тавре Сафаралӣ Наҷмиддинов, директори Агентии суғуртаи иҷтимоӣ ва нафақаи назди Ҳукумати ҷумҳурӣ зимни нишасти матбуотӣ изҳор дошт, буҷети суғуртаи иҷтимоӣ дар соли 2015 афзоиш ёфта, он бо назардошти хароҷоти корхонаю муассисаҳо 2 млрд. 67,4 млн. сомониро ташкил дод.

- Аз ҷониби комиссияи муштараки идораҳои дахлдор 65273 нафар гирандагони нафақаи маъюбӣ аз муоинаи такрории тиббию иҷтимоӣ гузашта, гурӯҳи маъюбии 43563 нафар тасдиқи худро ёфта, аз нав барқарор гардиданд, ки асосан маъюбони модарзод мебошанд. 3542 нафар аз як гурӯҳи маъюбӣ ба гурӯҳи дигар гузаронида шуданд ва нафақаашон аз нав ҳисоб ва таъин гардид. Гурӯҳи маъюбии 13871 нафар тасдиқ нагардида, пардохти нафақаи 10748 нафар қатъ карда шуд, - иброз дошт С. Наҷмиддинов.

Зикр шуд, ки айни ҳол 73,6 дар сади нафақагирон аз кортҳои бонкӣ истифода мебаранд, ки роҳи осону нисбатан манфиатноки фаъолият аст.

- Бо дарназардошти вазъи иҷтимоии аҳолӣ ва беҳтар кардани сатҳу сифати хизматрасонӣ ба қишрҳои ниёзманди ҷомеа ва ба ин васила беҳтар кардани некуаҳволии мардум таҳияи Қонуни Ҷумҳурии Тоҷикистон «Дар бораи таъини нафақаи суғуртавӣ ва давлатӣ» дар таҳрири нав дар назар аст, - гуфт дар хулосаи суҳбат С. Наҷмиддинов. - Қонуни мазкур аз 1 январи соли 2017 мавриди амал қарор хоҳад гирифт.

Эзоҳи худро нависед



Рамзҳо дар расм