Нимаи дуюми рӯзи 2-юми октябр аз тарафи Муассисаи давлатии рӯзномаи “Ҷавонони Тоҷикистон” ба Донишгоҳи давлатии Хуҷанд ба номи академик Бобоҷон Ғафуров 6 нусха китоби “Пири дилҷавон”, ки бахшида ба 90-солагии рӯзнома ба табъ расидааст, тақдим карда шуд.

Китоби мазкурро муовини ректори донишгоҳ оид ба таълим, доктори илмҳои география, профессор Раҳимов Абдулфаттоҳ Иброҳимович бо хушнудӣ пазируфта, аз ин иқдоми наҷиби рӯзномаи “Ҷавонони Тоҷикистон” изҳори хушнудӣ намуд.

Раҳимов Абдулфаттоҳ нашри китоби "Пири дилҷавон"-ро китоби арзанда унвон намуда, зикр кард, рӯзномаи “Ҷавонони Тоҷикистон” қариб як аср мешавад, ки барои тарбияи насли ҷавон хизмат карда истодааст. Ӯ гуфт: "Яке аз хонандагони доимии “Ҷавонони Тоҷикистон" мебошам ва китоби мазкур туҳфаи арзанда аз тарафи МД рӯзномаи "Ҷавонони Тоҷикистон” ба донишгоҳ мебошад. Ҳамзамон китоби мазкур барои донишҷӯён ва устодони риштаи журналистикаи донишгоҳ як дастурамалӣ арзанда хоҳад буд".

Ёдовар мешавем, ки дар китоби “Пири дилҷавон” хотироти 33 сармуҳаррири рӯзномаи “Ҷавонони Тоҷикистон”, ҳамзамон андешаҳои кормандони собиқу имрӯзи рӯзнома дарҷ гардидааст.