Дар сиёсат занҳое ҳастанд, ки кору пайкорашон барои ҳазорон нафар чун дастурамал хизмат мекунад. Фаъолияти кории Руқия Қурбонова барои занони ҷавони сиёсатмадор имрӯз ҳамин нақшро мебозад. Ӯ аз котиби комсомол то муовини сарвазири Тоҷикистон кор кардааст. Зимни суҳбат бо мо дар бораи фаъолияташ дар Комитети комсомолу Дастгоҳи иҷроияи Президенти кишвар ва саҳми занони тоҷик дар сиёсат сухан гуфт, ки фишурдаашро пешкаши Шумо мегардонем.

- Як муддат корманди масъули Комитети комсомол будед. Оё таҷрибаи фаъолият дар ин ташкилот минбаъд ба ташаккули шахсияти Шумо таъсире гузоштааст?

- Албатта, таъсири бузург гузоштааст. Ман соли 1978 Донишгоҳи омӯзгории Тоҷикистон ба номи Садриддин Айнӣ (пешина Институти педагогии ба номи Шевченко)-ро хатм кардаам. Баъди хатми донишгоҳ ба зодгоҳам - шаҳри Норак баргашта, фаъолияти худро дар мактаби таҳсилоти миёнаи умумии №9 ба ҳайси муаллимаи забон ва адабиёти рус оғоз кардам. Дар мактаб ҳамагӣ 8 моҳ фаъолият кардам. Дар яке аз конференсияҳои омӯзгорон ба ман ҳамчун омӯзгори ҷавон сухан доданд, ки дар бораи омӯзиши забони русӣ дар мактабҳои миёнаи Тоҷикистон сухаронӣ кардам. Дар ҳамон толор котиби якуми Комитети комсомолии шаҳри Норак Рустам Қурбонов иштирок доштанд. Он замон Комитети комсомол ҷои кори холӣ доштааст, яъне ҷои котиби сеюми комсомол холӣ будааст. Ӯ ба ман пешниҳоди кор карда, барои мувофиқа маро ба Комитети марказӣ равон карданд. Ман бо як шавқи зиёд ва ифтихор бо кокулҳои дароз ва дар тан либоси атлас ба Комитети марказӣ рафтам. Дар ҳамин ҳол як зан, корманди комитет, ба ман нигоҳ карда, бо тааҷҷуб бо забони русӣ гуфт: “Худоё, ба кӣ монанд аст? Магар ӯ ба ҳайси котиби комсомол фаъолият карда метавонад?” Ростӣ, аз чунин рафтор хафа шудам, чун он замон мо кам либоси аврупоӣ мепӯшидем. Хуллас, маро ба кор қабул карданд.

Ба Норак баргашта, корро оғоз кардам. Чун зодаи ин диёр будам, бо мардуми он ҷо тез забон ёфтам. Ҳамеша маслиҳатгари ман падарам буданд. Он кас муддати муайян раиси Кумитаи иҷроияи шаҳр буданд. Ман низ аз таҷриба ва маслиҳатҳои падарам хуб истифода мебурдам. Ҳамеша мегуфтанд: “Духтарам, дар зиндагӣ ҳар кор шуданаш мумкин, муҳим ту бояд ҷасур ва масъулиятшинос бошӣ. Агар бо дарки масъулият ва адолат амал намоӣ, ҳамеша корат пеш меравад”. Баъди муддати муайян маро котиби дуюми комсомол таъин карданд. Он замон ҷавононро барои таҷрибаомӯзӣ ба Кумитаи марказӣ мебурданд. Ба ман муяссар шуд, ба ҳайси инструктори Комитети марказии комсомол - шуъбаи ташкилӣ фаъолит намоям. Ҳамзамон, нозири вилояти Ленинобод (ҳоло Суғд)будам. Баъдан мактаби олии партиявии шаҳри Тошкандро хатм кардам. Фаъолият дар комсомол дар ташаккули ман ҳамчун сиёсатмадор таъсири бузург гузошт.

Баъди пош хӯрдани Иттиҳоди Шӯравӣ дар НБО-и “Роғун” фаъолият мекардам. Соли 1995 бо розигии Президенти кишвар муовини аввали раиси шаҳри Роғун таъин гардидам. Ҳама он вазифаҳое, ки фаъолият кардам, сар аз ҳукумати шаҳри Роғун, шуъбаи тандурустӣ оид ба масъалаҳои занон дар Дастгоҳи иҷроияи Президент, Кумитаи кор бо занон ва оилаи назди Ҳукумати Ҷумҳурии Тоҷикистон ва муовини сарвазири кишвар ва дигар зинаҳои роҳбарӣ аз ман масъулияти бузургро талаб мекард.

Гарчанде кор дар Кумитаи кор бо занон ва оилаи назди Ҳукумати Ҷумҳурии Тоҷикистон душвор буд, аммо кӯшиш мекардам, зимни фаъолияти кориам бо истифода аз тамоми неруи ақлонии худ занони кишварро муттаҳид намоям. Ҳар гоҳе, ки ягон мушкили занони тоҷикро баррасӣ менамудем, дарҳол ба ёдам суханони Президенти кишвар муҳтарам Эмомалӣ Раҳмон меомад. Замони ба вазифа таъин намудан он кас гуфта буданд: “Ман шуморо барои муттаҳидсозии тамоми занони ҷумҳурӣ ба ин вазифа таъин кардам”.

Тавре зикр кардам, фаъолият дар Комитети комсомол дар ташаккули минбаъдаи ман таъсири мусбати худро гузошт, аммо рушд ёфтани ман ҳамчун сиёсатмадор ва шахсият маҳз ба даврони истиқлолияти кишвар рост меояд. Боре рӯзноманигоре аз ман суол кард: “Дипломатияро аз кӣ омӯхтед?” Гуфта будам ва имрӯз ҳам мегӯям, ки ман дипломатияро то андозае аз падар, лекин мактаби бузурги дипломатия, роҳбарӣ, мактаби бузурги инсондӯстӣ, мактаби бузурги масъулият доштан, ҳисси баланди ватандӯстӣ доштанро аз Президенти кишвар омӯхтаам. 20 соли фаъолияти корӣ бо Роҳбари давлат дар сатҳҳои гуногун, аз муовини раиси шаҳри Роғун то муовини сарвазири кишвар барои ман як масъулияти бузург ва боиси ифтихор буд.

- Ба назари Шумо барои фаъоли ҷомеаи шаҳрвандӣ ва шахсияти ташаккулдиҳандаи афкори омма будан ҷавонон бояд ба кадом омилҳо мутаваҷҷеҳ бошанд?

- Пеш аз ҳама ба омӯхтани илму дониш ва тарбияи хуб аз ҳамон давраи мактабӣ мутаваҷҷеҳ бошанд. Баъдан дар донишгоҳ таҳсили худро хуб ба роҳ монанд, то мутахассиси соҳаи интихобкардаи хеш бошанд. Бояд мутолиаро зиёд ва маърифатнокиро баланд намуда, манфиати давлату миллатро дар ҷои аввал гузоранд. Ба назарам ҷавонон бояд ба чунин омилҳо таваҷҷуҳи хоса дошта бошанд.

- Шумо як муддат раиси Кумитаи кор бо занон ва оилаи назди Ҳукумати Ҷумҳурии Тоҷикистон будед. Тибқи омор ҷудошавии оилаҳои ҷавон дар кишвар дар ҳоли афзоиш аст. Ба назари Шумо чаро имрӯз пошхӯрии оилаҳои ҷавон зиёд аст ва кадом тадбирҳоро бояд андешид, то ин мушкил ҳалли худро ёбад?

- Ман фикр мекунам, пеш аз ҳама падару модарон гунаҳкор ҳастанд, чун аксарият фарзандонашонро маҷбур мекунанд, то духтари дилхоҳи худашонро бо писарашон хонадор кунанд. Ҳолати дигар ин дахолат намудани волидон ба ҳаёти ҷавонон аст. Албатта, худи ҷавонон низ гунаҳкоранд, чунки бе омодагӣ ба ҳаёти мустақилона қадам мемонанд. Оиладорӣ ҳам барои духтар ва ҳам барои писар масъулияти бузург аст. Масъулиятро ки бар дӯш гирифтӣ, бояд то охир онро иҷро намоӣ. Хушдоман ва хусур бояд келинро ҳамчун духтар қабул кунанд, ки ин ҳолат дар оилаҳои тоҷик кам дида мешавад. Барои пешгирии пошхӯрии оилаҳои ҷавон пеш аз ҳама бояд ақли солимро истифода бурд. Кумитаи кор бо занон ва оила, Кумитаи кор бо ҷавонон ва варзиш, мақомотҳои иҷроияи маҳаллӣ бояд бо ҷавонон корҳои фаҳмондадиҳӣ гузаронанд, нозукиҳои оилаву оиладориро омӯзонанд, то ҷудошавии оилаҳо кам гардад.

- Сиёсатмадор то чӣ андоза метавонад дар оиладорӣ муваффақ бошад?

- Оиладор будан ва ҳамзамон бо кори давлатӣ машғул шудан, албатта душвор аст, аммо ман кӯшиш мекардам, то вазифаи ҳамсарӣ ва модарии худро иҷро кунам. Талош мекардам, кам ҳам бошад, вақти худро барои ҳамсару фарзандонам ва корҳои хона ҷудо кунам. Рӯзҳои истироҳат барои фарзандонам шириниҳо мепухтам, якҷоя дарс тайёр мекардем. Пеш аз ҳама муҳаббати самимӣ дар оилаи мо пойдор буд. Фикр мекунам, маҳз ҳамин муҳаббат ва якдигарфаҳмии шавҳарам буд, ки оилаи ман то имрӯз пойдор монд. Шукр, ки шавҳарам маро дар тамоми кору фаъолият ва қарору тасмимҳоям дастгирӣ мекарданд.

- Ба ҷавонони тоҷик чӣ гуфтанӣ доред?

- Ҷавонони имрӯза имконият-ҳои зиёд доранд. Ҳукумати Ҷумҳурии Тоҷикистон барои дастгирии ҷавонон тадбирҳои назаррас андешида истодааст. Қабули барномаҳо дар сатҳи давлатӣ барои дастгирии ҷавонон, таъин шудани онҳо ба вазифаҳои гуногуни давлатӣ аз чунин тадбирҳост. Аз қадамҳои нахустинашон ба сиёсат муҳтарам Эмомалӣ Раҳмон рӯ ба ҷавонон овардаанд, чунки ҷавонон ояндаи миллатанд. Ба ҳамин хотир, ба ҷавонон гуфтаниам, ки аз имконоти васеи имрӯза истифода баранд ва барои рушди Тоҷикистони азиз саҳмгузор бошанд.

- Ташаккур барои суҳбати самимӣ.

- Саломат бошед. Ба аҳли эҷоди “Ҷавонони Тоҷикистон” муваффақиятҳо таманно дорам.