Бонуи ҷавон ва модаре, ки ба танҳоӣ дар тарбияи фарзанд машғул аст, бо хушнудӣ мегӯяд, аз ин ки бо интернет сару кор дорад, аз зиндагиаш розӣ аст.
“Зиндагии ман дар шабакаҳои иҷтимоӣ паси сар мешавад. Аз субҳ то бегоҳ аксу наворҳои зиёде дар шабакаҳои тикток, фейсбук ва инстаграм барои обуначиёнам мегузорам. Дар ин саҳифаҳо зиёда аз 10 ҳазор обуначӣ дораму бо гузоштани навору аксҳоям шумораи онҳо зиёд шуда истодааст. Бештар аз пахши мустақим истифода мебарам ва фикр мекунам, ки зиндагиам ранги дигар мегирад,”-мегӯяд ин ҷавонзан.

Ин ҳамсуҳбати мо изҳор медорад, ки наздикону пайвандонаш низ ба аксгузориву нашр кардани ҳаёти шахсиаш зид нестанд, зеро вай аллакай мустақил аст.

Дар замони муосир, ки ҷавонон ҳаёти худро бидуни интернет тасаввур карда наметавонанд, ба монанди ин ҷавонзан бонувони зиёде ҳастанд, ки барои идома додани зиндагии хуши худ ба шабакаҳои иҷтимоӣ рӯ меоранд.

Мушкил дар он аст, ки ин гурӯҳи ҷавонон вақти худро дар шабакаҳои интернетӣ гузаронида, алоқаашонро аз гирду атрофи худ мебуранд ва ба шабакаҳои иҷтимоӣ як навъ вобастагӣ пайдо мекунанд.

Мутахассисон ба инанд, ки ин вобастагӣ шахсро ба бемориҳои ҷисмонӣ ва равонӣ гирифтор менамояд. Дар ин баробар дар ҷомеаҳои суннатӣ бошад, “ҷилва кардан” дар шабакаҳои иҷтимоӣ метавонад, паёмадҳои дигаре ҳам ба мисли аз ҳам пош хӯрдани оилаҳо дошта бошад.

Равоншинос Алиаҳмад Ёраҳмадов мегӯяд, ки ҷавонон дар интернет он аксу наворҳоеро ҷустуҷӯ менамоянд, ки қобили қабули худи онҳо бошад ва ниёзҳояшонро бароварда тавонад. Ба қавли ӯ бо вуҷуди он ки дар ҳоли ҳозир идора намудани ҷавонон аз ҷониби оилаҳо душвор шуда истодааст, аммо бояд назоратро дар ин самт ҷиддӣ гирифт, то ба ин васила аз пош хӯрдани оилаҳо ҳам пешгирӣ кунем.

Ҷомеашиносон низ бар ин назаранд, ки сабаби ҷудошавии оилаҳои ҷавон ин зиёд истифода бурдани шабакаҳои интернетӣ мебошад.
Аз рӯйи омори Кумитаи кор бо занон ва оилаи назди Ҳукумати Ҷумҳурии Тоҷикистон дар соли 2021 дар Ҷумҳурии Тоҷикистон шумораи бекор намудани ақди никоҳ ба 13741 адад расида, 14814 кӯдак дар тарбияи яке аз волидон гузошта шудааст.

Сангин Гулов, устоди ДМТ ин нуктаро чунин шарҳ дод, ки баъзеҳо дониставу баъзеҳо надониста аз ин амал кор мегиранд:

- Барои як лаҳзаи муар-рифӣ, барои худнамоишдиҳӣ ин корро мекунанду аз фардои он лаҳзае андеша намекунанд. Андешаи эҳтимолияти истифодаи расму маълумоти шахсиашонро аз ҷониби шахсони ғайр намекунанд. Ҳамчунин фикр намекунанд, ки ин амал метавонад, сарнавишти онҳоро ба самти манфӣ тағйир диҳад. Зеро ҷомеаи мо ҷомеаи шарқист, арзишҳои ахлоқӣ дар ин ҷомеа нақши муассире доранд. Ба хотири коҳе (шуҳрати лаҳзаинае) тақдири худро ба бозӣ гузоштан хуб нест,- иброз намуд номбурда.

Бояд гуфт, ки интернет яке аз беҳтарин дастоварди инсоният аст. Ва бояд донем, интернет танҳо василаи фароғату вақтгузаронӣ не, балки як василаи дастёбӣ ба илму дониши муосир аст. Бояд мо имкониятҳои интернетро барои боло бурдани донишу ҷаҳонбиниамон истифода барем.

Хеле хуб мешуд, ки ҷавондухтарони мо даст аз тақлиду талқин гирифта, меъ-ёри истифодабарии интернет-ро риоя намуда, масъулияти оиладории хешро ҳис намоянд ва шабакаҳои иҷтимоиро ба манфиат истифода намоянд. Интихоби мо - ҷавонон дар шабакаҳои интернетӣ хеле фарох аст ва аз ин имконият истифода намуда, аз гурӯҳҳое, ки ба илму фарҳанг ва маърифат равона гардидаанд, барои пешрафти худ донише гирем. Ҷомеаи имрӯзаи мо ба оилаи солим ниёз дорад, пас занони мо бояд фарзанди солимро ба воя расонанд, то дар оянда ба халқу кишвари худ хизмат расонанд.

Таҳмина ЮСУФОВА, коромӯзӣ “ҶТ”