Бегоҳии 23-юми май дар майдони шаршараи назди "Наврӯзгоҳ"-и пойтахт Шоу-барномаи фарҳангӣ таҳти унвони "Шарораи ҷавонӣ" бахшида ба Рӯзи ҷавонони Тоҷикистон ва Рӯзи ҷаҳонии футбол баргузор гардид.

Он аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Мақомоти иҷроияи ҳокимияти давлатии шаҳри Душанбе роҳандозӣ шуда, дар қисмати аввали он роҳпаймоӣ бо ҷалби ҷавонони касбу кори гуногун, донишҷӯёну гирандагони Стипендияи президентӣ ва афсарон баргузор гардид.

Сипас, дар ибтидои барномаи фарҳангӣ Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон суханронӣ намуда, ҷавононро қишри ояндасоз ва пешбарандаи кишвар ном бурд.

“Ҳадафи асосии мо - масъулини соҳаи кор бо ҷавонон ва тамоми сохторҳои идеологии кишвар, пеш аз ҳама тарбия намудани насли худшиносу худогоҳ, донишманду созанда, соҳибмаълумоту соҳибкасб ва бо ин роҳ ба вуҷуд овардани заминаи боэътимод барои ҷомеаи ояндаи Тоҷикистон мебошад” - гуфт раиси Кумита.

Дилбар Одилзода, муовини раиси шаҳри Душанбе зимни суханронӣ гуфт, ҷавононро мебояд дар ҷавоб ба он ҳама дастгириҳои арзандае, ки аз ҷониби роҳбарияти давлат нисбати ин қишри ҷомеа карда мешавад, талош намоянд, то дар рушди кишвар саҳмгузор бошанд.

Сипас, дар вазъияти тантанавӣ маросими туҳфасупорӣ ба ғолибони мусобиқаи Дави миллӣ ва марафони велосипедронӣ, ки санаи 19-уми май бахшида ба Рӯзи ҷавонон дар пойтахт гузаронида шуда буд, баргузор гардид.

Баъдан, қисмати фарҳангии Шоу-барномаи "Шарораи ҷавонӣ" оғоз ёфта, сарояндагони шинохтаи кишвар табъи иштирокчиёнро бо сурудҳои дилнишини худ болида гардониданд.