Дар Ҷумҳурии Тоҷикистон шумораи умумии нафақагирони маъюб 159 ҳазору 679 нафарро ташкил медиҳад, ки нисбат ба ҳамин давраи соли гузашта 1,4% зиёд гардидааст.

Дар ин бора Дилмурод Давлатзода, директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон 22 июл зимни нишасти хабарӣ иттилоъ дод.

Ӯ зикр кард, ки 20,97 фоизи нафақагиронро нафақагирони маъюб ташкил медиҳад, ки нисбат ба ҳамин давраи соли гузашта теъдоди онҳо 2273 нафар ё ин ки 1,4 фоиз зиёд гардидааст.

- Барои пардохти нафақа ба нафақагирони маъюбиятдошта дар як моҳ 52,3 млн. сомонӣ маблағ пардохт карда мешавад, ки ҳисоби миёнаи нафақаи онҳо ба 372, 69 сомонӣ баробар аст,-гуфт ӯ.

Ҳамзамон дар нишаст зикр гирдид, ки аз шумораи умумии маъюбон 17 ҳазору 165 нафарашон маъюбони гурӯҳи якум, 76 ҳазору 792 нафарашон маъюбони гурӯҳи дуюм ва 33 ҳазору 275 нафарашонро маъюбони гурӯҳи сеюм ташкил медиҳанд. Шумораи маъюбони аз овони кӯдакӣ то 18-сола дар кишвар 32 ҳазору 447 нафарро ташкил дода, ҳисоби миёнаи нафақаи онҳо ба 307,98 сомонӣ баробар аст.

Дар Ҷумҳурии Тоҷикистон теъдоди умумии нафақагирон ба ҳолати 1-уми июли соли ҷорӣ 761 ҳазору 312 нафарро ташкил медиҳад, ки нисбат ба ҳамин давраи соли гузашта 16 ҳазору 527 нафар ё 2,2 фоиз афзоиш ёфтааст.