Дар Донишгоҳи давлатии Хуҷанд ба номи академик Бобоҷон Ғафуров бахшида ба Рӯзи матбуоти тоҷик таҳти унвони “Аз Бухорои шариф то Нерӯи сухан” маҳфил доир гардид.

Абдулфаттоҳ Раҳимов, муовини ректор оид ба таълим маҳфилро ифтитоҳ бахшида, ҳозиринро аз номи роҳбарияти донишгоҳ бо Рӯзи матбуоти тоҷик шодбош гуфта, сипас доир ба мақом ва мавқеи журналистика дар пойдории сулҳу субот ва рушду нумӯи соҳаҳои хоҷагии халқ ибрози андеша намуданд.

Сипас Илҳоми Ҷамолиён, раиси Иттифоқи журналистони Тоҷикистон дар вилояти Суғд оид ба “Муаммо ва масъалаҳои умдаи журналистикаи муосир” маърӯза намуда, иброз дошт, ки дар ин раванди пурталотуми иттилоотӣ моро зарур аст, ки бо риояи меъёрҳо ва сифати касбии журналистӣ фаъолият намоем. Таваҷҷуҳи худро баҳри мубориза бо зуҳуроти номатлуб равона сохта, ҷомеаро ба сӯйи созандагиву ободонӣ ҳидоят намоем.

Дар интиҳои чорабинӣ барои ҳамкории судманд бо Донишгоҳи давлатии Хуҷанд ба номи академик Бобоҷон Ғафуров кормандони телевизиони “Тоҷикистон”, ТВ “Суғд”, “Азия”, “Танин”, “СМ-1”, намояндагони рӯзномаҳои “Ҷумҳурият”, “Минбари халқ” дар вилоят, намояндагони рӯзномаҳои “Ҳақиқати Суғд”, “Суғд ҳақиқати”, “Согдийская правда” ва дигар рӯзноманигорон бо сипоснома ва туҳфаҳои хотиравӣ қадрдонӣ гардиданд.