Зери ҳамин унвон дар Донишгоҳи давлатии Хоруғ ба номи Моёншо Назаршоев бо мақсади таҳлилу баррасии вазъи ҳамсоякишвари Ҷумҳурии исломии Афғонистон мизи гирди байналмилалии онлайнӣ баргузор гардид.

Чорабинӣ дар доираи Барномаи ҳамкории донишгоҳҳо доир ба интиқоли дониш дар Осиёи Марказӣ ва Чин (UNICAC) баргузор шуда, дар он устодону кормандони муассисаҳои олии ҷумҳуриҳои Тоҷикистону Ӯзбекистон, кишвари Испания, намояндагону коршиносони ташкилотҳои байналмилалӣ ва дигар олимону коршиносони дунё масъалаи Афғонистонро мавриди муҳокима қарор доданд.

Ҷаббор Хуҷаназаров, устоди Донишгоҳи давлатии Хоруғ дар маърӯзаи худ оид ба “Сиёсати иртиҷоии “Толибон” нисбати занон” қайд кард, ки “Гарчанде бонувони афғон дар замони ҳокимияти каблӣ аз баъзе ҳуқуқу озодиҳои хеш бархурдор буданду ба имкониятҳои ҳархела дастрасӣ доштанд, аммо баъди сари қудрат омадани гурӯҳи “Толибон” ҳама гуна имкониятҳои иқтисодӣ, иҷтимоӣ, фарҳангӣ, сиёсӣ ва маънавию варзишӣ барояшон маҳдуд карда шуд.

Дар ин росто чанде қабл Президенти Ҷумҳурии Тоҷикистон дар суханронии мубоҳисаҳои умумии Иҷлоси 76-уми Маҷмаи Умумии Созмони Милали Муттаҳид низ ба таври равшан қайд карда буданд, ки “Ба сари қудрат омадани ҳаракати “Толибон”, ки дар феҳристи гурӯҳҳои террористии Шӯрои амнияти Созмони Милали Муттаҳид қарор дорад, раванди бе ин ҳам мураккаби геосиёсии минтақаро боз ҳам печида кардааст. Аз сӯйи ҳаракати “Толибон” иҷро нагардидани ваъдаҳои қаблиашон оид ба ташкили ҳукумати ҳамашумул бо иштироки васеи неруҳои сиёсиву қавмии Афғонистон боиси нигаронии ҷиддӣ гардидааст. Тоҷикистон ҳама гуна зуҳуроти беқонунӣ, куштору ғоратгарӣ ва зулму таъқибро алайҳи мардуми Афғонистон қатъиян маҳкум менамояд. Мутаассифона, созмонҳои ҳомии ҳуқуқи башар нисбат ба поймол гардидани ҳуқуқи дигар қавму миллатҳои сокини Афғонистон ва озодиҳои шаҳрвандони он кишвар, бахусус занону кӯдакон хомӯширо ихтиёр кардаанд ва дар ин маврид сухане ҳам баён намекунанд”.

Бинобар ин, ҷомеаи ҷаҳониро лозим аст, ки дар ин масъалаи доғи давр бетарафиро ихтиёр накарда, чораҳои зарурию бетаъхирро пиёда кунанд”.

Инчунин номзади илмҳои таърих, сиёсатшинос Мамадризо Алимшоев дар мавзӯи хеш “Афғонистон: Таҳдидҳои амниятии кишварҳои Осиёи Миёна” ба саҳми иштирокдорони мизи гирд расонд, ки Роҳбарияти олии мамлакат ва Ҳукумати Ҷумҳурии Тоҷикистон дар ҳамдастӣ бо кишварҳои узви Созмони Амнияти Дастаҷамъӣ, Иттиҳоди Давлатҳои Мустақил, Созмони Ҳамкории Шанхай ва дигар созмону ташкилотҳои бонуфузи олам иқдому ташаббусҳои зиёдеро татбиқ намуда, масъала бештар аз аввала дар меҳвари таваҷҷуҳи Сарвари давлату ниҳодҳои қудратии кишвар қарор дорад”.

Дар идома миёни маърӯзачиёну иштирокдорон табодули афкор сурат гирифт.