Бо ташаббуси Донишгоҳи давлатии Хоруғ (ДДХ) ба номи Моёншо Назаршоев дар якҷоягӣ бо Мақомоти иҷроияи ҳокимияти давлатии Вилояти Мухтори Кӯҳистони Бадахшон ва Ситоди байниидоравии таъмини амният ва тартиботи ҷамъиятӣ дар вилоят зери унвони “Терроризм ва экстремизм: таҳдид ба амнияти кишварҳои ҷаҳон” конференсияи илмӣ – амалӣ баргузор гардид.

Дар он муовини якуми раиси вилоят Алишер Мирзонаботов, Мамадқул Меликов, сардори Раёсати Кумитаи давлатии амнияти миллӣ дар ВМКБ, ректори ДДХ, профессор Шермамад Ҷонмамадов, намояндагони ҷомеаи шаҳрвандӣ, олимону зиёиён, аҳли маориф, рӯҳониёну ҷавонон ва дигар табақаҳои ҷомеа иштирок доштанд.

Ректори донишгоҳ Ш. Ҷонмамадов зимни баромади хеш қайд намуд, ки теъдоде аз ҷавонони дар кишварҳои исломӣ таҳсил карда, чунин мепиндоранд, ки ҷомеа аз асосҳои исломӣ дур шудааст ва ба талаботи воқеии ислом ҷавобгӯ нест.

- Шаҳрвандонро бо роҳҳои гуногун ба сафи гурӯҳҳои тарғибгарони бо ном Давлати исломии Ироқу Шом ҷалб менамоянд. Ҳамзамон дар байни ҷавонон намояндагони дигар ақидаи радикалӣ дошта низ мавҷуданд, ки арзишҳои исломиро чун василаи ақидаҳои худ истифода мебаранд. Ташкилотҳои ғайрирасмие фаъол гаштаанд, ки аз номи ислом ҳарф мезананд, вале дар асл татбиқгарони барномаҳои қувваҳои муайяне мебошанд, ки барои ноором намудани авзои ҷомеа талош менамоянд. Такя намудани ин қувваҳо ба арзишҳои исломӣ аз он сабаб аст, ки дин муқаддасоти динӣ дар ҷомеаи Тоҷикистон нақши муҳим мебозад. Аз ин рӯ, мо аҳли зиё ва бахусус маорифчиёнро зарур аст, ки ин раванди ҷамъиятиро бо таҳлилҳои илмӣ ва ҳасосияти миллӣ дар алоқамандӣ бо асосҳои сиёсӣ, иқтисодӣ ва иҷтимоии ҷомеа баҳои дуруст диҳем ва роҳу равиши инкишофи ҷомеаро дар меҳвари андешаи миллӣ муайян намоем, - афзуд Ш.Ҷонмамадов.

Дар конфронс ҳамчунин мавзӯъҳои “Фаъолияти мақомоти ваколатдори давлатӣ дар самти пешгирӣ ва мубориза бо ҷиноятҳои террористӣ – экстремистӣ”, “Бознигарии назарияҳои каломӣ ва илоҳиётшиносӣ, заминаи пешгирии ифротгароӣ ва терроризмӣ динӣ”, “Таҳсилот ҳамчун омили пешгирии ифротгароӣ” ва ғайра мавриди баҳсу муҳокима қарор гирифтанд.