29 октябр, таҳти ин унвон дар маркази маъмурии вилояти Суғд - шаҳри Хуҷанд ҳамоиши ҷавонону аъзоёни ҲХДТ доир гардид.

Дар ин бора Мақомоти иҷроияи ҳокимияти давлатии вилояти Суғд хабар додааст.

Бино ба иттилоъ, чорабинӣ бо ибтикори Кумитаи иҷроияи марказии Ҳизби Халқии Демократии Тоҷикистон дар якҷоягӣ бо КИ ҲХДТ дар вилояти Суғд ва ТҶҶ "Созандагони Ватан" ташкил шуда, дар он беш аз 5000 нафар ҳизбиён, аъзоёни ТҶҶ “Созандагони Ватан”, ҷавонон ва дигар қишри ҷомеа бо шиору овезаҳои ватандӯстона роҳпаймоӣ намуданд.

Дар ҳамоиши тантанавӣ Раҷаббой Аҳмадзода, раиси вилояти Суғд суханронӣ намуда, изҳор дошт, давоми 30 сол аст, ки дар ҳаёти сиёсию иҷтимоӣ ва иқтисодии кишвар нақши Ҳизби Халқии Демократии Тоҷикистон чун ҳизби созандаву бунёдкор назаррас мебошад. Дар ин муддат ба туфайли саъю талошҳои созандаи аъзоёни ҳизб таҳти сарварии Пешвои миллат муҳтарам Эмомалӣ Раҳмон дар мамлакат пойдевори мустаҳками рушди устувори иқтисодиву иҷтимоӣ, демократӣ гузошта шуда, барои ба сафи кишварҳои пешрафтаи ҷаҳон ворид гаштани Тоҷикистон заминаи мусоид фароҳам гардид.

Баъдан, муовини раиси ҲХДТ Асрор Латифзода баромад намуда, қайд намуд, ки дар ҳақиқат Ҳизби Халқии Демократии Тоҷикистон ҳамчун ташкилоти ҷамъиятии сиёсӣ бо диду назари нав ба майдони сиёсат омад ва тавонист худро бо ғояҳои созандаву бунёдкорона ва ватандӯстонаву ватанпарварона ба мардум ба таври арзанда муаррифӣ намояд. Дар тули фаъолияти худ ҲХДТ ҳамчун неруи пешбар дар баланд бардоштани маърифати сиёсӣ, тарғиби дастовардҳои навини соҳибистиқлолӣ, таҳкими ваҳдат ва ягонагии Тоҷикистон, рушди ҷомеаи шаҳрвандӣ нақши бузург бозида, миёни аҳли ҷомеа маҳбубияти хосро соҳиб гардидааст. Муҳимтарин нукта он аст, ки халқ ба ҳизб ҳамчун неруи созанда ва раҳнамо эътимод дорад ва ба он такя мекунад.

Сипас, дар толори Театри мазҳака ва мусиқии ба номи Камоли Хуҷандӣ конференсияи 16-уми ҳисоботӣ - интихоботии Кумитаи иҷроияи ҲХДТ дар вилояти Суғд доир гардид.

Ҷасури ҚИЁМИДДИН, "ҶТ"