Ваколатдор оид ба ҳуқуқи инсон ва кӯдак дар Ҷумҳурии Тоҷикистон бо занону кӯдаконе, ки аз минтақаҳои ҷангзадаи кишварҳои Сурияву Ироқ ба кишвар баргардонида шуданд, мулоқот намудааст.

Дар ин бора 26 июл Умед Бобозода, ваколатдор оид ба ҳуқуқи инсон зимни нишасти хабарӣ ба рӯзноманигорон иттилоъ дод.

Ӯ зикр кард, ғайр аз оне, ки дар назди раёсати Дастгоҳи иҷроияи Ҳукумати Ҷумҳурии Тоҷикистон гурӯҳи корӣ амал мекунад, онҳо низ рафта бо ин занону кӯдакон ҳамсуҳбат шудаанд.

- Ба масъалаҳои боздид, дар минтақае ки занону кӯдакон будубош доранд, мо бевосита бо занону кӯдакон аз наздик суҳбат кардем ва гуфта метавонем, ки оянда низ мо бо онҳо суҳбату мулоқотҳо дошта бошем, - гуфт ваколатдор оид ба ҳуқуқи инсон.

Ҳамзамон зикр гардид, ки айни замон онҳо дар ноҳияи Айнӣ дар муассисаи давлатии ислоҳотӣ дар марҳилаи муайян қарор доранд ва бо онҳо корҳои муайяне анҷом дода мешавад.

Бояд зикр намуд, ки Ҷумҳурии Тоҷикистон дар се давра шаҳрвандонашро аз минтақаҳои ҷангзадаи Сурияву Ироқ ба Тоҷикистон баргардонд. Солҳои 2019, 2022 ва 2023. Дар давраи аввал 84 нафар, дар давраи дуюм 146 нафар ва дар давраи сеюм 104 нафар баргардонида шуданд.