Дар шаҳри Хоруғ бо иштироки роҳбарияту аъзоёни филиалҳои Иттифоқи ҷавонони Тоҷикистон дар Вилояти Мухтори Кӯҳистони Бадахшон ва донишҷӯёни Донишгоҳи давлатии Хоруғ ба номи Моёншо Назаршоев (ДДХ) анҷумани XIV – и Иттифоқи ҷавонони Тоҷикистон доир гашт.

Пас аз интихоби аъзоёни нави иттифоқ аз шаҳру ноҳияҳои вилоят ва донишгоҳ ҳисоботи муовини раиси филиали иттифоқи ҷавонон дар вилоят Шукрона Хушвахтова шунида шуд.

Номбурда махсус қайд кард, ки иттифоқ маҳз бо ҳадафи таҳким бахшидани иттиҳоду ягонагии ҷавонони кишвар аз тарафи роҳбарияти олии кишвар таъсис дода шудааст:
“Бо назардошти оне, ки имрӯз дар тамоми кишварҳои олам ҷавонон чун неруи бузурги бунёдкор ва пешбарандаи ҳаёт эътироф шудаанд, онҳоро мебояд, то дар ҳаёти иҷтимоӣ – сиёсӣ , фарҳангӣ – маърифатии кишвар ва ҷаҳон нақши муассир гузоранд”.

Дар чорабинӣ инчунин баромади роҳбари филиали иттифоқ дар ДДХ Дидоршоҳ Насриддинов ва ҳисоботи роҳбарони филиалҳои ноҳияҳои Роштқалъаву Шуғнон шунида шуда, сипас масъалаи ҷорӣ оид ба тасдиқи рӯихати иштирокдорони Анҷумани XIV - уми Иттифоқи ҷавонони Тоҷикистон қабул гашт.