Бо ҳадафи тақвият бахшидани ҳамкориҳои судманд бо ҷомеа, тарбияи ҷавонон дар рӯҳияи худшиносиву худогоҳӣ, арҷгузорӣ ба арзишҳои миллӣ, роҳнамун кардани наслҳо ба фаъолиятҳои созанда ва пешгирии ҳама гуна ҷинояткориҳо сардори Раёсати Вазорати корҳои дохилӣ дар Вилояти Мухтори Кӯҳистони Бадахшон Назарзода Шариф Раҳмон дар Донишгоҳи давлатии Хоруғ бо ҷавонони вилояту дигар минтақаҳои Тоҷикистон ва омӯзгорони онҳо мулоқот намуд.

Зимни мулоқот сардори раёсати ВКД махсус қайд кард, ки мақомоти корҳои дохилӣ танҳо бо фаъолиятҳои марбутаи ин ниҳод маҳдуд нашуда, рисолати кормандони он ҳамзамон тарбияи ҳуқуқии шаҳрвандон, муайян намудани сабабу омилҳои ҷиноятсодиркунӣ ва рафъи камбудиҳо дар ин самт мебошад.

- Волоияти қонун барои ҳамаи мо як асту риояи қонуният ҳатмӣ мебошад. Агар фард барои ҷиноятсодиркунӣ ҷавоб нагӯяд, пас, ҳуқуқу манфиатҳои шахсии дигар аъзоёни ҷомеаро поймол месозад. Вақте ки шахс доғдор шуд, оила носолим мегардад ва албатта ин омил бевосита ба носолимии ҷомеа оварда мерасонад. Аз ин рӯ, ҷавононро мебояд то ба илмомӯзӣ, корҳои шоиставу писандида ҷалб шаванду аз ҳар гуна адами қонуният дар амон бошанд, - тавзеҳ дод, Назарзода Шариф Раҳмон.

Дар идома таъкид гардид, ки таҳдидҳои нави замон, шиддат гирифтани манфиатҳои геосиёсии давлатҳои абарқудрат, авҷи муноқишаҳои мусаллаҳона дар кишварҳои гуногуни сайёра, аз ҷавонони Тоҷикистон зиракии комили сиёсӣ талаб намуда, дар ин вазъ ҳифзи Истиқлолу озодӣ ва суботу оромии сартосарии Ватан аз вазифаҳои аввала ба шумор меравад.
Барои ин, ҷавононро зарур аст, ки бо азми қавию иродаи устувор бедории сиёсиро сармашқи кору фаъолияти ҳаррӯзаи хеш қарор дода, нагузоранд, то ваҳдату ягонагии миллату давлат аз тарафи иғвогарону террористон, экстремистон ва ҷинояткорону хоинони Ватан халалдор гардад.

Дар охири мулоқот баъзе ҷавонони фаъол аз тарафи роҳбарияти РВКД бо сипосномаю мукофот қадрдонӣ шуданд.

Машҳур ИМОМНАЗАРОВ, “ҶТ”