Имрӯз аз мусобиқаи бошукӯҳи Бозиҳои олимпӣ, ки дар шаҳри Парижи Фаронса ҷараён дорад се рӯз сипарӣ мешавад. Тоҷикистонро дар ин мусобиқаи сатҳи ҷаҳонӣ 14 тан варзишгар намояндагӣ мекунад. То ба ин лаҳза кишварамонро дар ин мусобиқа 4 варзишгар муаррифӣ карданд.

Аз миёни варзишгарони мо Баҳодур Усмонов пеш аз ҳама дар Бозиҳои олимпӣ баромад кард. Рақобати ин муштзани бомаҳорат кишвар ба 27-уми июл рост омада, ҳарифи ӯ дар марҳилаи аввал ё худ даври 1/16-ниҳоӣ Радослав Росанови булғористони ба шумор мерафт. Дар рақобати мазкур Баҳодур Усмонов натавонист ба муқобили ҳарифи худ пирӯзӣ ба даст оварад. Ӯ бо ҳисоби 0 бар 5 мусобиқаро ба ҳарифи худ бохт ва ҳамин тавр Бозиҳои олимпӣ Париж - 2024 барояш хотима ёфт.

Эмомалӣ Нуралӣ ҷудокори умедбахши тоҷик пас аз Баҳодур Усмонов Тоҷикистон дар Бозиҳои олимпӣ баромад кард. Ин варзишгари номошнои кишвар рақобатҳоро дар вазни худ хеле хуб оғоз кард. Ӯ тавонист дар рӯзи дуюми Бозиҳои олимпӣ то ба марҳилаи чаҳорякниҳоӣ роҳ ёбад. Эмомалӣ дар даври якум озод буд ва дар марҳилаи дуюм бо имтиёзи вазарӣ дар вақти тиллоӣ муқобили намояндаи Исроил - Брауч Шмаилов ғалаба ба даст оварда, роҳи худро ба даври чаҳорякниҳоӣ ҳамвор сохт. Дар даври чаҳорякниҳоӣ Эмомалӣ бо қаҳрамони олимпӣ ва ҷаҳон Ҳифуми Абеи ҷопонӣ рӯ ба рӯ шуд. Дар ин мубориза Эмомалӣ муқобили Абе хеле хуб рақобат кард, аммо дар лаҳзаҳои охири мусобиқа дасти ӯ осебӣ ҷиддӣ бардошт ва натавонист рақобатро идома диҳад. Эмомалии Нуралӣ бинобар сабаби осеб дар даври тасаллобахш рақобатро муқобили Бунчич Страҳинҷаи сербӣ идома дода натавонист ва бо ҳамин силсилаи рақобатҳои Эмомалӣ Нуралӣ низ дар Бозиҳои олимпӣ Париж - 2024 бе натиҷа анҷом ёфт.

Хушбахтона аз риштаи бокс варзишгари дигари бомаҳорати мо Давлат Болтаев рақобатҳоро дар Бозиҳои олимпӣ бо муваффақият ва пирӯзӣ оғоз кард. Болтаев дар даври аввал муқобили Георгий Кушиташвилии гурҷӣ мубориза бурда, бо қарори доварон бо ҳисоби 3 бар 2 пирӯзӣ ба даст оварда, ба марҳилаи чаҳорякниҳоӣ роҳ ёфт. Рақобати дигари ин варзишгари мо рӯзи 2-юми август баргузор хоҳад гашт, ки дар сурати пирӯзӣ Давлат Болтаев ба марҳилаи ниманиҳоӣ роҳ ёфта, аллакай нишони биринҷии Бозиҳои олимпиро дар ихтиёр хоҳад дошт.

Имрӯз ҷудокори дигари мо Беҳрӯз Хоҷазода низ аввалин рақобати худро дар Бозиҳои олимпӣ баргузор карда, мувоҷеҳи шикаст шуд. Паҳлавони тоҷик Беҳрӯз Хоҷазода аз Артур Маргелидони канадагӣ дар вақти тиллоӣ мағлуб шуд. Маргелидон варзишгари моро дар ҳолати "осаикоми" нигоҳ дошта, роҳи худро ба даври баъди ҳамвор сохт ва Хоҷазодаро аз идомаи рақобатҳо дар Бозиҳои олимпӣ Париж- 2024 маҳрум гардонид.

Ҳамакнун рақобатҳои дигари парчамбардорони кишварро мунтазир гашта, ба ҳамаи онҳо пирӯзӣ ва муваффақият таманно мекунем.

Қайд кардан ба маврид аст, ки варзишгароне, ки дар Бозиҳои олимпии Париж-2024 сазовори зинаҳои ифтихорӣ мегарданд, аз ҷониби раиси шаҳри Душанбе бо хонаҳои 3, 2 ва 1 ҳуҷрадор дар пойтахти мамлакат сарфароз гардонида шуда, дар баробари ин, ба медалдорони Бозиҳои олимпӣ Ҷоизаи Президенти Ҷумҳурии Тоҷикистон тақдим мегардад. Барои медали тилло – 300 000 сомонӣ, медали нуқра – 250 000 ва медали биринҷӣ 200 000 сомонӣ. Ҳамчунин тибқи Қарори Ҳукумати Ҷумҳурии Тоҷикистон аз 29 апрели соли 2023 ба ғолибон ва ҷоизадорони Бозиҳои олимпӣ, паралимпӣ ва сурдолимпӣ то охири умр ҳар моҳ маош дода мешавад.