Дар натиҷаи тадбирҳои мақсадноки роҳандозишуда ва нақшаҳои мушаххаси корӣ аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо дигар сохторҳои дахлдори соҳавӣ соли 2023 сатҳи ҷинояткорӣ миёни ноболиғону ҷавонон, пошхӯрии оилаҳои ҷавон ва дигар омилҳои номатлуб ба маротиб коҳиш ёфтааст.

Ин нуктаро 12-уми феврал Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни нишасти хабарии Кумитаи мазкур зикр намуд.

Номбурда ҳамзамон иброз дошт, ки мувофиқи маълумотҳои оморӣ соли 2023 дар ҷумҳурӣ аз тарафи ҷавонон ва ё бо иштироки онҳо ҳамагӣ 3020 ҳолати ҷиноят содир карда шудааст, ки нисбат ба ҳамин давраи соли гузашта (2022-3572) 552 ҳолат ё 18,2% кам мебошад. Аз тарафи ноболиғон бошад, дар кишвар 555 адад ҷиноят содир гардидааст, ки нисбат ба соли гузашта (2022-737) 182 ҳолат ё 32,7% кам мебошад.