Кумитаи кор бо ҷавонон ва варзиши назди Ҳукумати ҷумҳурӣ тасмим гирифтааст, ки маъруфтарин чеҳраҳои варзиши солро, ки дар мусобиқаву чемпионатҳои дохиливу байналмилалӣ дар “Соли ҷавонон” сазовори ҷойҳои ифтихорӣ шудаанд, бо ташкил намудани саёҳат ба тамоми шаҳру навоҳии кишвар барад ва наврасону ҷавонони дурдасттарин ноҳияву ҷамоати кишвар варзишгарони идеалии худро аз наздик бубинанд ва бо ӯ ҳамсуҳбат шавад.

Ин иқдом аз ҷиҳати дигар ба хотири фароғату баланд бардоштани руҳияи худи варзишгарон роҳандозӣ шудааст. Чунончи 28 октябри соли ҷорӣ зиёда аз 60 нафар ситораҳои варзиши тоҷик ба ҳам омада, зери унвони “Сайёҳати варзишгарон ба шаҳру ноҳияҳои кишвар”, ба ноҳияи Варзоб сафар намуданд.

Пеш аз оғози сафар Назарзода Ризо, муовини якуми раиси Кумитаи кор бо ҷавонон ва варзиш бо варзишгарон ҳамсуҳбат шуда, иқдоми мазкурро василаи хуби тарғиби варзиш ва муаррифии варзишгарони кишвар ба наврасону ҷавонони шаҳру ноҳияҳои кишвар арзёбӣ намуд: “Муҳтарам варзишгарон ва парчамбардорони Ватан. Бо шарофати Истиқлолияти кишвар ва дастгириҳои бевоситаи Пешвои миллат, муҳтарам Эмомалӣ Раҳмон варзиши тоҷик имрӯз ба таври бесобиқа рушд намудаистодааст. Боиси ифтихор ва сарфарозист, ки бо заҳмату машаққатҳои шумо – варзишгарон, давоми даҳ моҳи соли 2017 350 маротиба Парчами кишвар дар мусобиқаҳои байналмилалӣ парафшон гардида, миллату давлатамон баҳри оламиён муаррифӣ гардидааст. Варзишгарон баъди сарбозон дуюмин табақаи ҷомеа мебошанд, ки барои ҳимояву шарафи Ватан ҷонбозиҳо ва машаққатҳои зиёд мекашанд. Иқдоми мазкур имкон медиҳад, ки дар баробари истироҳати шумо, варзиш низ миёни насли наврас тарғиб гардад. Зеро ҳар яки шумо бо дастоварду корнамоиятон барои насли наврас намунаи ибратед ва барои онҳо имкон даст медиҳад, ки бо шумо аз наздик суҳбат намоянд”.

Сокинону варзишгарони ноҳияи Варзоб дар назди бинои ҳукумати ноҳия баҳри истиқболи варзишгарони кишвар фазои идона ташкил намуда, бо самимияти хосса онҳоро пешвоз гирифтанд. Баъди суҳбату аксгириҳои зиёди сокинон бо варзишгарон Савзаалӣ Назирзода, раиси ноҳияи Варзоб ташрифи варзишгаронро ба ноҳия хайрамақдам гуфта, бо онҳо суҳбат орост. “Ниёгони мо барои беҳдошти саломатию нерӯи ҷисмонӣ ва дифои марзу бум аз услулҳои муҳими варзиш, ба монанди давидану шиноварӣ, бузкашию ҷавгонбозӣ, шамшерзанӣ истифода менамуданд. Варзиш дар ҳайёти инсон ҳамчун мактаби муҳими ҷаҳонфаҳмию тарғиби арзишҳои олии инсонӣ, аз қабили дӯстию бародарӣ, сулҳу осоиштагӣ, эҳтиром ба миллатҳои гуногун хизмат мекунад. Дар баробари варзишгарони ҷумҳурӣ дар мусобиқаҳои сатҳи байналмилалӣ саҳми варзишгарони ноҳияи Варзоб низ калон аст. Давоми “Соли ҷавонон” варзишгарони ноҳия аз мусобиқаҳои сатҳи ҷумҳурӣ ва берун аз он 72 медали тилло, 76 медали нуқра ва 69 медали биринҷӣ ба даст овардаанд, ки ин аз рушди варзиш ва тарғиби тарзи ҳайёти солим дар ноҳия дарак медиҳад,- афзуд Савзаали Назирзода.

Баъди мулоқот бо раиси ноҳия варзишгарони кишвар аз Маҷмааи лижаронию сайёҳии “Сафед-дара” дидан намуданд. Иқдоми мазкур барои варзишгарон шароит фароҳам овард, ки онҳо аз имкониятҳои муҳайёшуда дар маҷмааи мазкур аз наздик ошно шаванд. Чунки зимни суҳбат бо варзишгарон маълум гардид, ки аксари онҳо бори аввал ба “Сафед-дара” омадаанд.

Носир Бозор, сардори Раёсати тарбияи ҷисмонӣ ва рушди варзиши Кумитаи кор бо ҷавонон ва варзиши назди Ҳукумати кишвар иқдоми мазкурро барои варзишгарони кишвар беҳтарин арзёбӣ намуда, василаи хуби фароғату сайёҳат ва тарғиби варзиш дар сартосари мамлакат тавсиф намуд: “Иқдоми мазкур аз ҷониби Раёсати тарбияи ҷисмонӣ ва рушди варзиш пешниҳод гардид, ки роҳбарияти Кумитаи кор бо ҷавонон ва варзиши кишвар ин иқдомро хуб дастгирӣ намуданд. Ин иқдом дар охири “Соли ҷавонон” махсус барои варзишгарони кишвар роҳандозӣ шуд, ки ин аввалин сафари ситораҳои варзиши кишвар ба ноҳияи Варзоб ва наздикшавии онҳо бо сокинону варзишгарони наврас мебошад. Имрӯз аз чеҳраи ҳар як варзишгари иштирокчӣ пай бурдан мумкин аст, ки онҳо дар баробари фароғат худро яке аз табаққаҳои муҳим ва арзанда дар ҷомеа ҳис мекунанд. Зеро он наврасоне, ки солҳои зиёд орзуи аз наздик дидани ин чеҳраҳои варзишро доштанд, онҳоро имрӯз гарму самимӣ истиқбол намуданд. Ин иқдом минбаъд низ идома меёбад ва варзишгарон ба дигар шаҳру ноҳияҳои ҷумҳурӣ сафар намуда, бо наврасону ҷавононе, ки аз ҳунарнамоию паҳлавонии онҳо ифтихор мекунанду дар зиндагӣ онҳоро идеал интихоб намудаанд, суҳбату вохӯриҳо анҷом медиҳанд”.

Баъди дидан намудан аз Маҷмааи лижаронию сайёҳии “Сафед-дара” барои варзишгарон дар ошхонаи “Чинор” ҳунармандони бахши фарҳанги ноҳияи Варзоб барномаи консертии фарҳангию фароғатӣ ташкил карданд ва варзишгарон рақсу бозӣ намуданд.

Сипас, давоми рӯз варзишгарон аз Осорхонаи миллӣ дидан намуданд ва ба бозёфтҳои таърихию корнамоиҳои нобиғаҳои миллати тоҷик ошноӣ пайдо намуда, андешаи худро оиди сайёҳати якрӯза чунин иброз доштанд:

Акмалиддин Каримов: “Бори аввал аст, ки мо дар чунин иқдоми хуб ва саривақтӣ иштирок мекунем. Мо - варзишгарон, ки давоми рӯз ду маротиба тамрин менамоем, ин гуна сайёҳатҳо барои омода шудан аз ҷиҳати рӯҳӣ барои мо муфид аст. Аз ҳама муҳим барои ман ин вохӯрӣ бо наврвсон писанд буд, ки давомдиҳандаи кори мо мебошанд. Дар чеҳараи ҳар яки онҳо мо шодию хурсандиро медидем, ки бо идеалҳои худ суҳбат мекарданд. Ин иқдом шавқу ҳаваси наврасонеро, ки оянда муаррифгари миллатанд, дучанд мегардонад”.

Шаҳризода Ҷабборова: “Иқдоми мазкур шахсан барои ман хотирмон буд. Мехоҳам, чунин сафарҳо бо иштироки варзишгарон бештар бошад, зеро айёми хурдсолӣ орзуи бо чеҳраҳои варзиш, ки бароям намуна буданд, рӯ ба рӯ шудану бо онҳо суҳбат намудан даст намедод. Имрӯз аз ҳама зиёд мо хурсандии наврасонро мушоҳида намудем, ки бисёр таъсирбахш буд ва мо бори дигар ҳис намудем, ки мардуми мо варзиш ва варзишгарро дӯст медоранд”.

Хушқадам Хусравов: “Ин сафар дар ҳайёти варзишии ман бо рӯйдоду бардоштҳои наҷиб хотирмон хоҳад буд. Зеро мо – варзишгарон якдигарро қариб, ки берун аз тамрину ғарқи хайёлҳои мусобиқот намебинем. Имрӯз мо якдигарро бо чеҳраҳои болида, дар як фазои фарҳангӣ ёфтем. Имрӯзҳо азбаски мо дар машқҳои дастаҷамъии пеш аз чемпионати ҷаҳон қарор дорем, ки он моҳи ноябр дар давлати Русия баргузор мегардад, ин иқдом барои руҳан омода шудани мо нақши калон мегузорад. Сайёҳат як рӯз ҳам бошад, мо бо таассуроти зиёд баргаштем. Ин фурсатро истифода намуда, миннатдории худро ба ташкилкунандагони чорабинии мазкур мерасонам ва хоҳиш мекунам, ки чунин чорабиниҳо зиёд гарданду дигар ҳамкасбони мо, ки ба хотири парафшонии Парчами кишвар машаққатҳои зиёд мекашанд, як рӯз ҳам бошад, фароғат кунанду хастагии худро бартараф намоянд”.

Беҳрӯз Хоҷазода: “Ман хурсанд аз он ҳастам, ки ҳампешагони ман саёҳатро аз ноҳияи ман, зодгоҳи ман оғоз карданд. Давоми рӯз ман яке аз хушбахтаринҳо худро ҳис мекардам, зеро ман то ҳадди имкон тавонистам, зодгоҳамро ба варзишгарон муаррифӣ намоям. Наврасону сокинони ноҳияи мо, ки аксар орзуи дидани чеҳраҳои варзиши кишварро доштанд, хусусан наврасон ҳамеша аз ман мепурсиданд, ки ин ё он варзишгарро ҳангоми тамринҳо мебинам ва ё бо онҳо гӯштин мегирам? Ин саёҳат сабаб гардид, то наврасон, ки баъди мо ифтихори ноҳия ва Ватани азизамон мешаванд, бо идеалҳои худ аз наздик шинос шаванд. Имрӯз, ки мо – варзишгарон дар ҳар қадам ғамхориҳои Ҳукумати кишварро дар самти варзиш эҳсос мекунем, кӯшиш менамоем, ки дар мусобиқаҳои дар пеш истода сазовори ин ғамхориҳо бошем”.