Варзишгарони тоҷик дар Чемпионати Осиё оид ба гӯштин (тарзи озод ва юнонӣ-римӣ), ки аз 13-ум то 18-уми апрел дар шаҳри Алмаатои Қазоқистон доир шуд, соҳиби як медал ва 4 мақоми ифтихорӣ гардиданд.

Дар рӯзи аввали чемпионат узви дастаи мунтахаби Тоҷикистон оид ба гӯштини юнонӣ-римӣ Далер Ризозода барандаи медали нуқра гардид.

Ӯ дар вазни 77 кг қувваозмоӣ намуда, бо шикаст додани ҳарифони худ то даври финалӣ роҳ ёфт. Вале бо сабаби лат бардоштан натавонист дар финал неру санҷад. Аз ин рӯ, бо қарори доварон дар даври ниҳоӣ рақиби эронии ӯ Пижмон Султонмурод мақоми аввал ва намояндаи мо мақоми дуюмро касб намуд.

Дар ин равия, яъне гӯштини юнонӣ-римӣ се варзишгари дигарамон - Асламҷон Азизов дар вазни 55 кг, Тоҳирҷон Охунов дар вазни 87 кг ва Муслиҳиддин Уроқов дар вазни 72 кг ҷои панҷумро ишғол намуданд.

Дар гӯштини тарзи озод аз варзишгарони мо Баҳодур Қодиров натиҷаи беҳтарро нишон дода, дар вазни 86 кг мақоми панҷумро соҳиб гашт.

Исфандиёр АМАКҶОНОВ, "ҶТ"