Ҷудочиёни тоҷик дар Ҷоми кушоди Осиё оид ба гӯштини ҷудо миёни наврасон ва ҷавонон (Cadets & Juniors Asian Judo Cup Almaty 2023), ки 7-9 апрел дар шаҳри Алмаатои Қазоқистон доир гардид, иштирок карда, ба хазинаи варзишии кишвар 5 медал ворид намуданд.

Дар ин мусобиқа Тоҷикистонро 13 варзишгар намояндагӣ карданд. Рӯзи аввали мусобиқа барои ҷудокорони тоҷик бобарор оғоз гардида, дар ин рӯз наврасони кишвар - Лоиқ Қутбиддинов (-55кг), Ворис Назаров (-66кг) ва Аминҷон Абдуҷалилзода (-73кг) ба гирифтани се медали биринҷӣ даст ёфтанд. Дар рӯзи дуюми мусобиқа бошад, ҷудокорони мо арзанда баромад намуданд, вале медале соҳиб нашуданд.

Дар рӯзи сеюми Ҷоми кушодаи Осиё ҷавонон баромад намуданд, ки ҷудокорони тоҷик дурахшиши назаррас доштанд. Аз ҷумла, Иброҳимҷон Элмуродов миёни сангинвазнҳо тавонист, то ба финал роҳ ёбад. Ӯ дар финал ҷудокори мизбон Нурсултан Кабланро мағлуб намуда, сазовори нишони тилло гардид.

Ҳамчунин, ҷудокори дигари кишвар Муҳаммадҷон Абдуҷалилзода зери вазни то 81кг дар рақобат барои нишони биринҷии мусобиқа бо Йегор Ракови қазоқ нерусанҷӣ карда, ғолибият ба даст овард ва нишони Абдуҷалилзода чаҳорумин нишони биринҷии ҷудокорони тоҷик дар мусобиқи мазкур мебошад.

Ёдовар мешавем, ки мусобиқаи Ҷоми Осиё миёни наврасон ва ҷавонон имсол тибқи қоидаҳои Федератсияи байналмилалии ҷудо (IJF) аз рӯи 16 вазн миёни наврасон (8 вазн – писарон, 8 вазн - духтарон) ва 14 вазн миёни ҷавонон (7 вазн – писарон, 7 вазн - духтарон) сурат гирифта, дар он беш аз 400 варзишгар аз Қазоқистон, Узбекистон, Тоҷикистон, Туркманистон, Қирғизистон, Юнон, Ҳонконг, Гурҷистон, Муғулистон ва Иёлоти Муттаҳидаи Амрико иштирок намуданд.

Дар Ҷоми Осиё ба ҷуз аз медал, ғолибону ҷоизадорони мусобиқа соҳиби имтиёзҳо дар рейтинг ё радабандии ҷаҳонӣ гардиданд, ки ин имтиёзҳо роҳи варзишгаронро ба олимпиада ҳамвор месозад. Аз ҷумла, ғолиби мусобиқа 100 имтиёз, ҷоизадори нуқра 60 ва ҷоизадори биринҷӣ 40 имтиёз мегиранд.

Боёд гуфт, ки дастоварди ҷудокорони наврас ва ҷавони кишвар дар мусобиқаи Ҷоми Осиёии имсола нисбат ба солҳои қабл натиҷаноктар буд. Чун пас аз ба симати президенти Федератсияи ҷудои Тоҷикистон таъин гардидани Исмоили Маҳмадзоир дар олами ҷудои кишвар тағйироти куллӣ ба амал омад.

Роҳбари ҷавони федератсия барои беҳбудии ҷудокорони кишвар мутахассисони ҷопониро даъват намудааст ва дар оянда қарор аст, гӯштингирони бомаҳорат баҳри такмили ҳунари хеш ба хориҷи кишвар фиристода шаванд, ки ин ҳама иқдом метавонад, дар оянда боиси боз ҳам рушди ҷудои кишвар шавад.

Яҳё МАҲМАДНАБИЕВ, “ҶТ”