Дар доираи рубрикаи “Дар меҳмонии “Ҷавонони тасмим гирифтем, бо Мавзуна Чориева, аввалин зане, ки дар риштаи варзиши муштзанӣ медали Бозиҳои олимпиро ба даст Тоҷикистон овардааст, суҳбате дошта бошем. Мавзуна Чориева дорандаи медалҳои  Бозиҳои олимпии Лондон 2012 ва Чемпионати ҷаҳон буда, устоди варзиши дараҷаи байналмилалӣ мебошад.

Муҳайё Саидмуродова: Барои Мавзуна варзиш, яъне чӣ?

- Варзиш барои ман зиндагӣ аст. Аз давраҳои хурдиам хуб ёд дорам, ки вақте ҳамсолонам лухтакбозӣ мекарданд, ман дар даст дастпушак худ ба худ ба муштзанӣ машғул мешудам. Ҳамеша дар фикри он будам, ки кадоме аз муштзанҳои маъруфи ҷаҳон ба мисли Муҳаммад Алӣ, Майкл Тайсон ва дигарон ғолиб мегарданд. Кӣ чӣ гуна қувваозмоӣ мекунад? Маҳорати кӣ чӣ гуна аст? Ин суолҳое буданд, ки ҳамеша гирди сари ман давр мезаданд. Ҳастии ман варзиш аст.
 
Бинёмин Қосимов: Аз чандсолагӣ ба варзиш шуғл меварзед?

- Ростӣ замони шуруъ намуданро дар соҳаи варзиш ёд надорам. Танҳо ҳаминро медонам аввалин мусобиқае, ки дар он баромад кардам бо писарон дар риштаи муштзанӣ дар вазни 21 кило буд. Лекин аз сини 4-солагӣ ман дар риштаи гӯштини тарзи озод низ тамрин мекардам. 
  
Дилором Ғафурова: Чӣ чиз тавонист як духтари деҳотиро Чориева кунад?

- Розӣ будан аз пешаву танҳо ба пеш ҳаракат карданҳо тавонист маро то ин зинаҳо расонад. Агар аз пешаам розӣ намебудаму ба таври бояд пайи иҷрои рисолати варзишӣ намегаштам, шояд имрӯз Чориева намебудам. 

Малоҳат Холмуродова: Оё касби худро ба фарзандонатон тавсия медиҳед?

- Вазифаи ҳар як зан дар зиндагӣ пеш аз ҳама тарбияи дурусти фарзандон ва ба камол расонидани онҳост. Аз ин рӯ ман ба фарзандам таълиму тарбияро меомӯзонам, на ин ки касбро. Интихоби касб аз ҳар фард майлу рағбати худро талаб мекунад. Агар фарзанди ман тамоман соҳаи варзишро написандад, ман чӣ тавр метавонам, ки ӯро маҷбур кунам, то ҳамин касбро интихоб кунад. Чи тавре ки ман ба хоҳиши худам ва мувофиқи завқам варзишро интихоб намудам, фарзанди ман низ дар интихоби касб озод аст. 

Сафарбек Насриддинов: Чаро ба мисли Шумо, то имрӯз зани тоҷик дар ин риштаи варзиш дар бозиҳои сатҳи ҷаҳонӣ ширкат надоранд. Оё шогирдоне надоред, ки шумо ва тоҷиконро дар арсаи ҷаҳонӣ муаррифӣ кунад?

- Ҳоло ман чандин шогирд дорам, ки бовар аст, онҳо оянда дар муобиқаҳои олимпӣ дастболо мегарданд. Ба ғайр аз ин имрӯз чандин ҷавондухтарони дигар низ ҳастанд, ки дар самти варзиш дар баробари ман қарор доранд. Аз ҷумла, Шоира Зулқайнарова, Сумая Қосимова, Идимо Холова ва чандин занони дигаре, ки дар бокси ҷаҳонӣ мақоми худро соҳибанд. 

Розиқов Бахтовар: Оё то кунун тамрин мекунед ва ният доред, ки оянда дар мусобиқаҳои байналмилалӣ ширкат варзед?

- Аз соли 2015 бокси касбиро бас кардаму аз он то андозае дур шудам. Лекин то кунун барои саломатии худ аз варзиш даст накашидаам. 

Икроми Носир: Варзиш Шуморо то куҷо хушбахт кард?

- Аз хурдӣ орзу доштам, ки дар се мусобиқа: Осиё, ҷаҳон, олимпиада ғолиб гардам. Хушбахтона, ба орзуҳоям расидам. 

Раҷабалӣ Мирзоев: Шуҳрат тавонист Мавзунаро дигар кунад?

- Ман ҳамоне, ки қабл аз дастовардҳои варзишиам будам, ҳамонам. Муваффақияти ман нишони болобаланд шудани ман нест. Агар чандин маротибаи дигар ҳам дар зинаҳо ғолиб шавам, ман ҳамон Мавзуна мемонам. 

Беҳрӯз Қаюмов: Магар дар зиндагиатон ҳолате рух додааст, ки ҳини моҷарои оилавӣ аз усули варзишиатон истифода бурда бошед?

- Варзишгар буданам маънои онро надорад, ки ман дар зиндагӣ бояд “зӯр” бошам. Ман ҳеҷ вақт аз хотир намебарорам, ки касе бошам ва ё набошам дар ҳаёти оилавӣ зан ҳастам. Вазифаву уҳдадориҳои занро низ дар оила ба хубӣ дарк мекунам. Фаромуш набояд кард, ки варзиш пеш аз ҳама инсонро тарбия медиҳад. 

Лутфия Орифова: Аз рӯи шуниди мо Шумо дар Донишкадаи идоракунии давлатии назди Президенти Ҷумҳурии Тоҷикистон таҳсил мекунед. Аз ин рӯ мехостем фаҳмем, ки Шумо аз рӯи кадом ихтисос таҳсил доред ва дар оянда  бо кадом касб фаъолият хоҳед кард?

- Ман то ҳол Донишкадаи тарбияи ҷисмонӣ ва Академияи милитсияро хатм намудам. Ҳоло бошад, дар бахши идоракунии ДИДНПҶТ таҳсил мекунам. Оянда мехоҳам аз рӯи ихтисосам дар самти варзиш фаъолият кунам. 
  
Баҳруллои Маҳмадшариф: Мехостам Мавзуна Чориева ягон лаҳзаи хотирмонро аз замоне, ки нав ба тамрин машғул гардида буданд, қисса кунад?

- Дар ҳаёти ман лаҳзаҳои хотирмон хело зиёданд. Лекин ҳеҷ аз ёдам намеравад, ки то синфи 5 ҳамсолонам намедонистанд, ки духтарам. Ҳамеша бо либосҳои мардона ба мактаб мерафтам. Рӯзе роҳбари синфамон ба ман таъкид намуд, ки минбаъд либосҳои духтарона ба бар кунам. Вақте ки ман якумин бор бо либосҳои занона ба мактаб рафтам, аллакай ҳамсабақҳоям пай бурданд, ки ман духтарам ва маро масхара карданд. Аз ҳамон рӯз ман дигар либосҳои духтарона намепушидам. Новобаста аз оне ки муаллимон доимо таъкид мекарданд.
 
Икром Маҷидов: Қабл аз иштирок дар Бозиҳои олимпии Лондон-2012 барои пирӯз шудан то чӣ андоза Шумо аз худ боварӣ доштед?

- Қабл аз олимпиада бисёр тамрин мекардам. Ҳатто аз вазни худам болотар ҳам қувваозмоӣ менамудам. Наметавонам гӯям, ки комилан аз худ боварӣ доштам, ки яқинан дар ин мусобиқа дастболо мегардам, вале заҳмату талоши ман гувоҳӣ медоданд, ки беподош намемонам. Агар ҳар шахс аз сидқи дил хоҳад, ки кореро ба сомон расонад ва аз рӯи хостааш амал кунад, яқин аст, ки аз уҳдаи он мебарояд. 

Манучеҳри Валӣ: Агар Мавзуна Чориева имкони аз сари нав интихоб кардани касбро медошт, оё боз касби муштзаниро интихоб мекарданд ё...?

- Албатта боз ҳамин касби худро интихоб мекардам. То ҳол модарам аз муваффақ гаштанам дар ҳаёт меболад, ҳамон хурсандии модарам, атрофиёнам ва номи неки худ дар ҷомеа хоҳу нохоҳ маро водор месозад, ки ман боз соҳаи варзишро интихоб кунам.

Авазов Шералӣ: Шудааст, ҳолатҳое, ки Шумо аз касби интихобнамудаатон пушаймон гардида бошед?

- Аз вақте ки худро мешиносам бо риштаи муштзанӣ машғулам. Гӯё ки ин касб як ҷузъи ҷудонопазири ҳаёти ман гардидааст. Ман аз муштзаниву “муштхӯрӣ” ҳаловат мебарам. 

Таманнои Саидумар: Оё боре наздикони Шумо барои интихоби касбатон монеа шудаанд?

- Ба ҷуз аз падару модар дигар ҳама аз касби интихобнамудаи ман норозӣ буданд. Касоне, ки маро мешинохтанд ҳамагӣ зид буданд. Буданд ҳолатҳое, ки мардум маро бо тамасхур менигаристанд, бо ангушт нишон медоданд ва ба қавли онҳо ин касб зебандаи зан нест.  Намехостанд, ки дар ин самт ман кор кунам, вале ман танҳо бо дуои волидон ба ин касб рахт бастам. 

Акобир Шарипов: Шумо ҳамчун як зан ҷалби бонувонро дар соҳаи варзиш имрӯз чӣ гуна баҳогузорӣ мекунед?

- Замоне, ки мо хурд будем, толорҳои варзишӣ он қадар шароити хуб надоштанд. Аз ин сабаб барои машқу тамрини занону духтарон волидон он қадар розӣ набуданд. Чун имрӯз бо дастгирии бевоситаи Ҳукумати кишвар шароиту имконот дар соҳаи варзиш беҳтар гардидааст. Аз ин рӯ падару модарон дигар на он қадар монеаи духтарони худ мегарданд. Занон на танҳо бояд барои иштирок дар мусобиқаҳо ҷалб карда шаванд, бояд онҳо пеш аз ҳама барои саломатии хеш ба тамрин машғул гарданд. Зеро саломатии ҷомеа дар дасти зан аст. Агар зан ҷисман солим бошад, фарзанди он низ сиҳату саломат мегардад. Дигар  ин ки имрӯз ҷалби бонувон дар соҳаи варзиш хуб аст. Аз соли 2012 то инҷониб садҳо “Мавзуна”-и дигар ба майдони варзиш омадааст, ки онҳо низ метавонанд, дар оянда номи худ ва миллату давлати худро дар арсаи ҷаҳонӣ муаррифӣ намоянд.  

“Ҷавонони Тоҷикистон”: Тавсияи Шумо ба варзишгарон? 

-Варзиш ин ҳавову ҳавас нест, ки ҳар ки хоҳад интихоб кунад. Пеш аз ҳама барои муваффақ гардидан дар ин самт шахсро мебояд аз сидқи дил варзишро дӯст дорад. Ҳамеша тамрин ва масъулият ҳис кунад. Варзишгаронро мебояд аз тамоми он шароиту имконоте, ки аз ҷониби роҳбарияти давлат ба роҳ монда шудааст, истифода баранд. Ва барои устувор гардонидани мавқеи худ ҳеҷ гоҳ бояд варзишгар дилозурда нагардад. Дар сурате, ки мағлуб мегардад, дилшикаста нашуда, баръакс бештар заҳмат кашад, ки минбаъд пирӯз шавад.