17-уми май, дар толори Кумитаи миллии олимпӣ бахшида ба Рӯзи ҷавонони Тоҷикистон Анҷумани IX-уми умумиҷумҳуриявии ташкилотҳои кор бо ҷавонони Ҷумҳурии Тоҷикистон баргузор гардид.

Дар кори анҷуман Назарзода Ризо, муовини аввали раиси Кумитаи кор бо ҷавонон ва варзиш, аъзоёни Шӯро ва Котиботи ИТҶТ ва роҳбарони ташкилотҳои ҷамъиятии кор бо ҷавонони узви ИТҶТ ва намояндагони ВАО ширкат доштанд.

Назарзода Ризо, муовини аввали раиси Кумитаи кор бо ҷавонон ва варзиш зимни суханони ифтитоҳӣ баргузории Анҷумани IX -уми ҷумҳуриявии ташкилотҳои кор бо ҷавонони кишварро идомаи ташаббусҳо ва иқдомҳои созанда оид ба устуворӣ ва рушди ҷараёни идораи демократии ҷомеа хонда, онро мусоидаткунандаи рушди имконоти ҷомеаи шаҳрвандӣ муаррифӣ намуд. Аммо ӯ аз тарзи корбарии иттиҳод изҳори нигаронӣ кард. Ӯ фаъолияти Шӯро ва Котиботи ИТҶТ-ро ғайриқаноатбахш арзёбӣ карда, гуфт, дар замони муосир, ки барои таблиғу корро дар сатҳи баланд анҷом додан, тамоми шароит вуҷуд дорад, аммо дар ҳеҷ куҷое кори ИТҶТ назаррас нест. На дар расонаҳо ва на дар сомонаҳои интернетиву иҷтимоӣ.  

Ӯ ҳамчунин кори ташкилотҳои самти кор бо ҷавононро мавриди интиқод қарор дода, гуфт, дар самти таблиғи сиёсати давлатии кор бо ҷавонон ва варзиш ва рушди сайёҳиву ҳунарҳои мардумӣ фаъолияти ташкилотҳо назаррас нест. Аз ҷумла ишора ба ташкилотҳое, ки дар самти сайёҳиву ҳунармандӣ фаъолият мебаранд, гуфт:

- Шумо метавонистед дар яку ним соли гузашта, ки аз ҷониби давлат имтиёзҳои зиёде дода шуда буд, корҳои бисёреро ба сомон расонед. Натавонистед, бренди “Made in Tajikistan”-ро ба сайёҳони хориҷӣ ба таври бояд муаррифиву дар баробари ин самти молиявии ташкилотҳои худро ғанӣ гардонед.
 
Сипас Раъно Ҷумъаева, котиби ИТҶТ аз фаъолияти иттиҳод дар солҳои 2017-2019 ҳисобот дода, гуфт, ки эродҳои Назарзода Р. қобили қабуланд ва кӯшиш мекунанд, дар фаъолияти минбаъда онҳоро ислоҳу ба низом дароранд.
 
Ҳамчунин роҳбарони якчанд ташкилотҳои ҷамъиятии кор бо ҷавонон, ки дар самти кор бо ҷавонон фаъолият доранд, доир ба пешрафт, мушкилот ва дигар масъалаҳои марбути ташкилотҳои кор бо ҷавонони Тоҷикистон ва самтҳои татбиқи дурусту самараноки сиёсати давлатии ҷавонон маърӯза намуда, гуфтанд, ки барои фаъолияти минбаъдаи эшон дар Тоҷикистон фазои мусоиди корӣ муҳайёст.

Дар қисмати дувуми чорабинӣ аз ҷониби аъзои анҷуман фаъолияти Котиботи ИТҶТ, ки аз рӯи Низомнома ба анҷом расид, мавриди таҳлил қарор гирифта, бо ҳамовозии аксари аъзоён Хусрав Бобобеков котиби нави иттиҳод барои ду соли оянда интихоб гардид.

Мақсад гузошта шуд, ки барои назаррас кардани фаъолияти ИТҶТ дар давоми ду соли минбаъда ташкили омӯзиш ва вохӯриҳо оиди муоширати самаранок ва технологияи иттилоотӣ, гузаронидани омӯзишҳо барои аъзоёни Шӯро ва Котибот дар соҳаҳои идоракунӣ, коммуникатсия, рушди шабакаи шарикӣ, банақшагирии стратегӣ, кор бо платформаҳои ҷамъиятӣ ва интернетӣ, омода намудани лоиҳаҳои дархостӣ, омӯзиши базаи қонунгузорӣ, андозбандӣ, фандрайзинг, рушди захираҳои инсонӣ, сафарбаркунии иҷтимоӣ, идоракунии вақт (тайм менеджмент) ва таъсиси намояндагии ИТҶТ дар сатҳи марказҳои вилоятҳо ва минтақаро ба роҳ хоҳанд монд.

Дар охир ба як қатор ташкилотҳо шаҳодатномаҳои азнавбақайдгирӣ дода шуда, аз ҷониби КҶВ ташкилотҳое, ки фаъолияти назаррас доштанд, бо сипоснома қадрдонӣ гардиданд. 

Ёдовар мешавем, ки дар ИТҶТ 115  ташкилотҳои самти кор бо ҷавонон аъзоянд.