Оид ба мактуби кушодаи мураббии ҷудои Федератсияи Руссия В. Н. Елчанинов ба унвони Президенти Ҷумурии Тоҷикистон, Асосгузори сулҳу ваҳдати миллӣ, Пешвои миллат, Ҷаноби Олӣ, муҳтарам Эмомалӣ Раҳмон.

Ман ҳамчун мураббӣ ва падари Устопириён Комроншоҳ ба ин мактуби кушода чунин посух медиҳам:

Комроншоҳро ман аз 3-солагиаш ба варзиш ҷалб намуда, то ин дам 5 карат чемпиони ҷаҳон оид ба самбо, 2 карат чемпиони ҷаҳон оид ба намуди кураш, ҳамчунин ҷоизадори Универсиада ва ғолиби Ҷоми Аврупо оид ба ҷудо намудам.

Дар баробари ин, Комроншоҳ ҳамчун дастпарвар дар мактабҳои варзишии давлатӣ машқ карда, мурабиёнаш аз ҳисоби давлат маош мегирифтанд.

Зимни вохурии Президенти кишвар Эмомалӣ Раҳмон бо варзишгарон оид ба ба даст овардани медали тиллои Олимпиадаи соли 2016 ваъда дода будам. Дар ин замина кӯшиш намуда истодаам, ки бо ягон мутахассиси хуби хориҷӣ ҳамкорӣ намоям. Гарчанде дар ҷумҳурӣ низ мураббиёни хуби ҷудо ҳастанд, аммо мо бо мураббӣ В. Елчанинов ҳамкорӣ намудем, зеро ӯ дар самти варзиши ҷудо таҷрибаи кофӣ дорад. Ӯ соли 2008 Расул Боқиевро соҳиби медали олимпӣ гардонида буд.

Ҳангоми бастани шартномаи дутарафа моҳонаи В. Елчанинов аз ҳисоби мо ва сарпарастон пардохт карда мешуд. Дар асоси шартнома В. Елчанинов танҳо бо Комроншоҳи Устопириён машқварзӣ менамуд на ба фаъолияти сохторҳои варзишии кишвар дахолат мекард. Баҳо додани Елчанинов ба сохторҳои варзишии ҷумҳурӣ ва дар матбуот нашр кардани номаи саркушода асоси воқеӣ надошта, берун аз шартнома мебошад.

Ин буд, ки пеш аз Олимпиадаи Лондон сохторҳои варзишӣ ҳамкориро бо ӯ қатъ намуданд.

Мо борҳо дар суҳбат ӯро хотиррасон кардем, ки танҳо ҳуқуқи баҳодиҳии баромади Комроншоҳро дар мусобиқаҳо дораду бас, на ҳуқуқи баҳодиҳӣ ба сохторҳои варзишии кишварро, зеро сармураббии ҷудои ҷумҳурӣ дигар шахси масъул ва ҷавобдиҳанда ҳаст.

Дар давоми соли 2015 Комроншоҳ бо В. Елчанинов дар бисёр мусобиҳаҳо иштирок намуд ва холҳои заруриро барои иштирок дар Олимпиада-2016 ба даст оварданд.

Иштироки Комроншоҳ тӯли 4 моҳи охир бе ӯ асоси воқеӣ надорад. Танҳо дар охири моҳи декабр онҳо дар як қатор мусобиқаҳо, ки дар қитъаи Осиё, аз ҷумла дар Синдаои Чин, Чеҷиуи Кореяи Ҷанубӣ, Токиои Ҷопон баргузор гардид, иштирок намуданд.

Аз 4-уми январи соли 2016 бо дастгирии раиси вилояти Суғд, муҳтарам Абдураҳмон Қодирӣ онҳо якҷоя дар Аврупо, Австрия, Кубаз, Дюселдолфи Олмон то охири моҳи феврал қарор доштанд. Аз 1 то 28 марти соли 2016 дар шаҳри Масква дар машқҳои дастаҷамъӣ иштироки онҳо дар назар дошта шудааст.

Мувофиқи барнома аз 1 то 12 апрели соли 2016 машқҳои дастаҷамъӣ дар шаҳри Тошканд мегузаранд. Аз 13 то 17 апрел дар Чемпионати Осиё иштирок мекунанд, ки аз ҳисоби Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон мебошад.

Барои анҷоми ин чорабиниҳо аз ҳисоби буҷети давлатӣ қариб 200000 (дусад ҳазор) сомонӣ ҷудо гардидааст.

Аз 20 апрели соли 2016 то 11 май дар шаҳри Масква тайёрӣ дида, баъд дар Гранприи шаҳри Алмаато аз ҳисоби Кумитаи миллии олимпии кишвар иштирок менамояд.

Тайи 2 моҳи охири пеш аз Олимпиада дар шаҳрҳои Хуҷанд, Шаҳристон, Тошканд тайёрӣ дида, 10 июли соли 2016 ба давлати Аргентина, ки ба давлати Бразилия ҳамсоя ва боду ҳавои якхела доранд, сафар мекунанд. Мақсад мутобиқ шудан ба макони баргузории Олимпиада мебошад.

Ҳамаи ин хароҷотро Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Кумитаи миллии олимпӣ, Федератсияи ҷудои ҷумҳурӣ, ҳукумати вилояти Суғд ва Федератсияи самбои вилояти Суғд ба нақша гирифтаанд.

Мо дастгирии ҳамарӯзаи Ҳукумати ҷумҳуриро ҳис мекунем ва тамоми қувваю неруи худро барои баланд бардоштани Парчами Тоҷикистони азиз сарф менамоем. Мақсад аз нашр намудани чунин нома ба манфиати кӣ буд ё паси ин кор киҳо қарор доранд, номаълум аст. Мо як мақсад дорем, ки он ҳам амалӣ намудани ваъдаи ба Пешвои миллат дода ва боло бардоштани Парчами кишвари азизамон мебошад!

У. УСТОПИРОВ,
Мурабби шоистаи варзиши Тоҷикистон