ВАРЗИШ
Шанбе 22 Июн 2024 10:09
7954
Саргузаште, ки Меҳронаро ба варзиш овард

Одатан ҳамасола дар арафаи таҷлили ҷашни байналмилалии Наврӯз дар тамоми гӯшаву канори кишвар ҳамчун анъана баргузории мусобиқаҳои гӯштингирӣ аз намуди гӯштини миллӣ ҷараён гирифта, мухлисону ҳаводорони зиёдеро ба ҳам меорад. Ин мусобиқаҳо чеҳраҳои наву муваффақро ба мардум ошно менамоянд. Тайи чанд соли охир дар майдонҳои гӯштингирии кишвар маҳорати нотакрору ҳунарнамоии беҳамтои бонуварзишгарони тоҷик ба мушоҳида мерасад, ки бисёриҳоро дар ҳайрат гузоштаанд. Аз ҷумла, яке аз чунин бонуварзишгари муваффақе, ки тайи чанд рӯзи охир ситораи фазои интернетии тоҷик гардидааст, Меҳрона Маҳмадзода мебошад, ки ҳамагӣ 16 сол дорад. Бо ӯ суҳбат намудем.

- Меҳрона, аввалан шуморо барои ҳамаи он натиҷаҳое, ки тайи чанд рӯзи охир ба даст овардед, табрик мегӯям. Лутфан мегуфтед, ки кадом сабабҳо шуморо вориди майдони гӯштин намуд, шавқ ё чизи дигар?

- Ташаккури зиёд. То он даме, ки ба варзиш машғул гардидам, ҳеҷ шавқе ба ин соҳа надоштам ва гӯштингир шуданро низ ҳатто боре ҳам ба гӯшаи хаёлам намеовардам. Аммо ҳамааш яку якбора шуд. Мо дар оила се духтар ва як писар ҳастем. Бародарам, ки ҳоло дар синфи ҳафтум таҳсил мекунад, дар оилаамон аз ҳама хурдӣ аст ва замоне, ки падарам хост ӯро ба мактаби варзишии гӯштингирӣ барад, маро таъкид кард, ки минбаъд ӯро ҳамроҳӣ намоям. Ҳар боре ки бародарам Абдулвоҷибро то толори варзишиашон ҳамроҳӣ мекардаму пасон гирифта меовардам, шавқу завқи варзишгар шуданро дар худам низ эҳсос намудам ва ҳамин тавр пас аз як муддат ман ҳам тамринро оғоз кардам.

- Оё интихоби ин соҳа, ки заҳмати зиёдро металабад, бароятон мушкил нест?

- Ҳеҷ роҳи муваффақият бе мушкилӣ нест. Барои муваффақ шудан, бояд заҳмат бикашӣ. Вале ман шукр мекунам, ки ҳарчанд аз аввалин қадамҳои гузоштаам дар ин роҳ шаш сол сипарӣ мегардад, вале то ҳол аз интихобам пушаймон нагардидаам ва боварӣ дорам, ки мушкиле нест, ки садди роҳи муваффақият шавад.

- Сабқат бо мардон бароятон мушкилӣ намеорад?

- Аз соли 2016 инҷониб қариб дар ҳар як мусобиқаи гӯштингирӣ иштирок намуда истодааму бештари рақибонам ҷавонписарон ҳастанд. Бонуварзишгароне, ки бароям ҳамчун рақиб маҳсуб мешаванд, аз мусобиқаҳои расмӣ сар карда, то сабқатҳои гӯштини наврӯзиву сатҳи ҷумҳурияӣ хеле кам, ҳатто ангуштшуморанд. Аз ин хотир, илоҷи дигар нест ва аллакай одат низ кардаам.

- То имрӯз боре дар мусобиқаҳои сатҳи шаҳрӣ ва ё ҷумҳуриявӣ иштирок кардаед?

- Бале, то соли 2019 каму беш дар ҷашну маросимҳое, ки маъракаҳои гӯштин доир мешуд, ҳунарнамоӣ мекардам. Аммо аз соли 2019 бори аввал дар мусобиқаи шаҳрӣ аз намуди ҷудо дар вазни 50 кг иштирок намуда, сазовори ҷойи аввал гардидам. Дар аввал ҳеҷ аз худ боварӣ надоштам, зеро ҳама рақибонам писарон буданд, вале хушбахтона ҳама ҳарифонамро бо натиҷаи ҳалол мағлуб сохтам. Соли 2021 низ дар мусобиқаи ҷумҳуриявии Ҷоми Имрон, ки дар шаҳри Душанбе баргузор шуд, дар вазни 55 кг ғолиби мусобиқа гардидам. Дар ин сабқат танҳо як ҳарифи духтар доштам, ки хушбахтона ӯро ҳам мағлуб сохтаму мақоми аввал насибам шуд.

- Назари пайвандону дӯстон дар интихоби касбатон чӣ гуна аст?

- Волидон ва хешу ақрабоям дар интихоби ман зид нестанд, баръакс бештар ташвиқам мекунанд.

- То ҳол аз ҳамсинфон ва ё писарони “беодоб” нисбататон беэҳтиромӣ шудааст, ки онҳоро ба қавле сари як ҳалук карда бошед?

- То ҳол ба чунин саҳна дучор нашудаам ва дуо мекунам, ки нашавам. Дар мактаб низ касе нисбатам рафтори баду ноҷо намекунад. Ҳамсинфонам ҳама муносибати хуб доранд. Дар умум ҳар нафаре, ки маро мешиносад, хоҳ писар бошад ва ё духтар барои ҷуръати гӯштингирӣ дар майдонҳои бузург маро аҳсан мегӯяду барои ғолибиятҳо табрик мекунад.

- Ҳоло, ки қадамҳои нахустини худро дар сабқатҳои бузург мегузоред, оё то ин дам ягон мусобиқае буд, ки бароятон хотирмон бошад?

- Наврӯзи имсоларо бо ҳама мусобиқаҳояш метавон хотирмон гуфт, зеро ягон мағлубият надоштам. Дар маҷмӯъ, дар мусобиқаи гӯштини деҳаи Себистони Данғара, деҳаи Қизилқалъаи ноҳияи Хуросон, ноҳияи Темурмалик ва деҳаҳои Сангчашма, Гачак ва Латабандаки шаҳри Ҳисор ҳунарнамоӣ кардам ва бештар аз 20 ҳарифи худро бо усулҳои ҳалол мағлуб сохтам. Аз ҳама хотирмонаш деҳаи Сангчашма буд, ки пайдарпай 10 ҳарифи худро, ки ҳама писарон буданд, мағлуб намудам.

- Оянда чӣ нақшаҳо доред? Оё гӯштинро тарк кардан мехоҳед?

- На, аслан! Мехоҳам тамринҳоямро идома дода, заҳмат бикашаму номбардори Тоҷикистони азизам гардам. Ҳамчунин мақсад дорам, пас аз хатми мактаби миёна роҳи варзишро идома дода, ба ягон донишгоҳи ҳарбӣ дохил шавам.

Қиёмиддин МАҲМАДҶОНОВ, “ҶТ”

Эзоҳи худро нависед



Рамзҳо дар расм