Суҳбат бо Муҳаммадхуҷа Ёқубове, ки бо 17 пирӯзӣ то имрӯз шикастнопазир аст

Қаҳрамоне, ки мо дар борааш менависем, дар рақобатҳои бокси касбӣ миёни ҳарифон то имрӯз шикастнопазир аст. Нафаре, ки дар арсаи ҷаҳон Тоҷикистонро муаррифӣ мекунаду бо тахаллуси “Шер” машҳур гаштааст. Чеҳрае, ки бо ғурури тоҷикӣ ҳар пирӯзии худро бо болои сар намудани Парчами кишварамон истиқбол мегираду аз тоҷик буданаш ифтихор мекунад.

Ӯ Муҳаммадхӯҷа Ёқубов аст. Дастпарвари мактаби бокси шаҳри Исфара. Номбурда аз даҳсолагиаш ба варзиши бокс рӯ оварда, имрӯзҳо дар арсаи байналмилалӣ шинохтаву машҳур гардидааст. Ёқубов бори нахуст дар бокси касбӣ соли 2015 аз худ дарак дод. Ӯ то имрӯз камарбандҳои WBS, WBA, IBF ва WBO-ро ба даст овардааст. Муҳаммадхӯҷа Ёқубов 27-уми марти соли равон дар шаҳри Екатеринбурги Русия дар намуди бокси касбӣ бар ҳарифи худ Лунга Стемала аз Африқои ҷанубӣ пирӯз омада, камарбанди “WBS International”-ро ба номи худ сабт кард ва бо 17-умин ғолибияти бидуни бохташ ба Ватан баргашт. Бо Муҳаммадхӯҷа атрофи зиндагӣ ва фаъолияти варзишиаш суҳбат оростем, ки пешкаши хонанда мегардад.

- Дар оғози суҳбат бо камарбанди “WBS International” ба Тоҷикистон ташриф оварданатонро табрик мегӯям. Баъдан, ба ин навъи мушкили варзиш пайвастанатонро пурсидан мехостам...

-Ташаккур! Боварию самимияти мардум бар души мо, варзишгарон масъулияти бештарро зам мекунад. Аз ин рӯ, ин дастоварди на танҳо ман, балки мардуми Тоҷикистон аст.

Албатта ҳама намуди варзиш ба худ мушкилиҳо дорад. Танҳо аз иродаи варзишгар вобаста аст, ки ба тамоми мушкилиҳо тоб оварда, барои расидан ба мақсади дар пеш гузошта ҷаҳду талош мекунад. Аз хурдсолӣ ба варзиш шавқу ҳавас доштам ва бо дастгириҳои падарам ба ин навъи варзиш рӯ оварда, аввалин нозукиҳои ин касбро аз мактаби бокси шаҳри Исфара омӯхта, зери тамрини устодони соҳибтаҷриба камол ёфтам. То замони ба бокси касбӣ қадам гузоштанам, зери роҳбарии мураббии аввалинам Дадабек Фатуллоев машқу тамрин намудаам. Аз соли 2015 инҷониб бо мураббии варзидаи рус Владимир Видов усули касбии боксро меомӯзам. Ният дорам, дар ояндаи наздик баҳри бештар сайқал додани маҳорати муштзанӣ бо устоди номдори амрикоӣ Фреди Роуч тамрини варзишии худро шурӯъ намоям.

- Аз оғози карйераи варзишиатон, яъне аз соли 2015 бо лақаби “Шер” ба майдон мебароед. Чӣгуна ин тахаллус ба номи шумо пайванд шуд?

- Дуруст аст, ки бештари варзишгарони ҷаҳон ба худ тахаллусе доранду ҳамагон онҳоро бо ҳамон тахаллус мешиносанд ва эътироф менамоянд. Аммо ман то имрӯз лақаберо ба худ напазируфтаам. Аслан лақаби “Шер” аз ҷониби мухлисон ба ман дода шудааст. Аз даврае, ки дар Русия тамрин ва фаъолияти худро оғоз намудам, маро бо лақабҳои “Шер” ё “Шери тоҷик” садо мекарданд ва ҳамин сабаб гардиду мухлисон ба ман лақаби “Шер”-ро гузоштанд. Бошад, ин фикри онҳост, лек мехоҳам маро на бо лақаб, балки бо номи аслиам шиносанд ва эътироф кунанд.

- 17:0 шуморае, ки дар корномаи шумо сабт шудааст. Яъне 17 муҳорибаи бидуни бохт. Чӣ масъулиятеро зам мекунад ба шумо ин нишондод?

- Шояд ин шумора барои дигарон ҳайратовар бошад. Лек барои ман ҳоло ин кам аст, оғози кор аст. Мехоҳам шумораи бурдҳоямро зиёд намоям. Бинобар ин кӯшиш менамоям, бо талошу масъулияти худ ва дастгириҳои устодону ҳамватанон ҳамаи муҳорибаҳоямро бе мағлубият анҷом диҳам.

- Варзишро пешгӯӣ кардан душвор аст, вале шумо ин нишондоди бидуни бохтро то кадом шумора расониданиед?

- Бале, инро пешгӯӣ кардан душвор аст. Лек мехоҳам ба мисли муштзанҳои маъруфи ҷаҳон рекорд гузорам, яъне нишондиҳандаи бидуни бохтро то 50 расонам.

- Дар баробари шумо нафароне ҳастанд, ки тоҷиканду аз дигар давлатҳо ҳунарнамоӣ мекунанд. Шумо бо Парчами миллиамон ба майдон мебароед, ки боиси ифтихори мост. Буданд даъватҳо, ки аз номи дигар кишвар баромад кунед? Агар ҳа, чӣ шуморо боздошт?

- Аслан ҳар нафаре, ки хориҷ аз кишвар кору фаъолият менамояд, ин маънои онро надорад, ки ӯ аллакай хориҷӣ асту аз номи он миллат ҳунарнамоӣ мекунад. Баръакс, бояд берун аз кишвар ҳисси ватандӯстӣ зиёд гардида, ҳар нафари ватандӯст дар фикри муаррифӣ намудани миллати хеш бошад. Барои ман низ бо Парчами Тоҷикистон рӯи майдон баромадан ифтихор аст. Дар мавриди аз номи дигар давлат баромад намудан, то ҳол пешниҳоде нест ва агар шавад ҳам, қабул нахоҳам кард.

- Аз омода шудан ба мусобиқаҳо дар хориҷ нисбат ба Ватан чӣ бартариятҳоро мебинед? Ба муштзанҳои мо чӣ намерасад?

- Солҳое, ки ман машқу тамринро шурӯъ намудам, толорҳои варзишӣ камшумор буданду аз таҷҳизотҳои варзишӣ танқисӣ мекашидем. Имрӯз тавре мушоҳида менамоем, таваҷҷуҳи Ҳукумати мамлакат ба соҳаи варзиш зиёд гардида, толорҳои зиёди варишӣ бо таҷҳизотҳои наву замонавӣ дастраси мардум мебошад.
Мо умед дорем, сатҳи иқтисодии мамлакат боз боло рафта, шароити аз ин ҳам беҳтаре баҳри варзишгарон фароҳам мегардад. Дар Ватан мо устодони зиёди ботаҷриба дорем. Сафи муштзанҳои номии кишвар низ рӯз аз рӯз зиёд гардида истодааст. Бо боварии комил гуфта метавонам, ки ояндаи бокси тоҷик дурахшон аст.

- Аз таҷрибае, ки дар бокси касбӣ доред, оё тасмим гирифтаед, ки мактаби бокси худро дар Ватан таъсис диҳеду ба омода намудани варзишгарони тоҷик камари ҳиммат бандед?

- Бале, мехоҳам баъди ҷамъбасти фаъолияти варзишии худ ба Ватан баргардам ва ҳамчун мураббӣ дар намуди бокси касбӣ он усулҳои варзишие, ки аз бокси ҷаҳонӣ омӯхтам, ба варзишгарони мамлакат омӯзонида, онҳоро ба мусобиқаҳои байналмилалӣ омода намоям.

- Дар зиндагӣ ва ё аниқтараш дар фаъолияти варзишиатон киро идеали худ меҳисобед?

- Албатта, ман корномаҳои устодони худ ва варзишгарони ҷаҳониро эътироф менамоям, вале ҳеҷ нафарро идеал намеҳисобам. Аслан, дар фаъолияти варзишӣ кӯшиш мекунам, мактаби худро ба насли баъдӣ боқӣ гузорам.

- Дар корномаи варзишиатон кадом муҳориба зиёдтар хотирмон аст?

- Соли 2018 буд. Сенздаҳумин муҳориба бо рақиби мексикоӣ Эмануел Лопес бароям зиёд писанд омад, зеро дар ин муҳориба худро тамоман озод ҳис кардам. Чунки ҳамаҷиҳата омода будам. Инчунин дастгириву кафкӯбиҳои зиёди мухлисонро дар ин муҳориба ҳеҷ наметавон фаромӯш кард.

- Тавре огаҳем, шумо 9-уми апрели соли равон дар вохӯрии Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон бо сокинони шаҳри Исфара ҳузур доштед. Сарвари давлат аз корнамоии шумо ҳарф заданд ва аҳсан хонданд. Шумо аз ин вохурӣ чӣ таассуроте бардоштед?

- Ин яке аз орзуҳои деринтизори ман буд, ки амалӣ гардид. Ман ин лаҳзаро мунтазир будам ва ҳамеша мегуфтам, боре мешуда бошад, ки бо Сарвари худ рубарӯ шаваму сӯҳбат кунам. Билохира, ин хостанҳову интизорӣ кашиданҳо самараи нек ба бор оварду бо Пешвои миллат вохӯрӣ намудам. Ин эҳсосотро ба забон гуфта наметавонам. Як бор тасаввур кунед. Вақте Сарвари давлат миёни ҳама номи шуморо мегиранду ба наздашон даъват мекунанд. Ҳамон лаҳза маро ҳаяҷон фаро гирифту аз хурсандӣ ашки шодӣ рехтам. Ва хеле шод гаштам, ки Пешвои миллат ҳамаи рақобатҳои маро тамошо мекардаанду мухлисӣ менамуданд. Ин суҳбат масъулияти маро дучанд намуд. Кӯшиш мекунам, ба ин боварӣ сазовор бошаму ҳамеша Парчами кишварро дар арсаи байналмилалӣ баланд бардорам.

- Айни замон ба чӣ корҳо машғулед?

- Тибқи қоидаҳои варзишӣ барои ҳар варзишгар пас аз муҳорибаҳои зиёд истироҳат лозим аст. Айни замон дар ҳавои софу дилфиреби Ватан истироҳат мекунам. Мехоҳам истироҳатро дар гӯшаву канори мамлакат ва назди пайвандон гузаронам.

- Нақшаҳои шумо дар оянда?

- Тибқи нақша пас аз истироҳат барои тайёрӣ ба муҳорибаи оянда, ки қарор аст моҳи август ё сентябр баргузор шавад, бояд ба Амрико сафар намоям. Бо дастгирии ҳамватанон кӯшиш мекунам, дар он ҷо низ Парчами Тоҷикистонро баланд бардорам.

-Мо ҳам барои фатҳи қуллаҳои баъдӣ ба шумо барор мехоҳем!

-Ташаккур!

Исфандиёр АМАКҶОНОВ, “ҶТ”