Имрӯз муштзани номовари тоҷик, дорандаи медали биринҷии Чемпионати ҷаҳонии бокс Баҳодур Усмонов ба Ватан баргашта, пазироии ӯ дар Фурудгоҳи байналмилалии Душанбе ба тантанаи ҳақиқӣ мубаддал гашт.

Барои пешвози варзишгар баробари наздикону пайвандон, инчунин, Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ҳаводорони риштаи варзиши бокси кишвар сарҷамъ омаданд.

Пас аз пешвози ботантанаи қаҳрамон, Абдулло Раҳмонзода, раиси Кумитаи кор бо ҷавонон ва варзиш суханронӣ намуда, қайд кард, ки “медали биринҷии Баҳодур Усмонов аз Чемпионати ҷаҳонии бокс як падидаи таърихӣ дар олами бокси тоҷик мебошад. Зеро Баҳодур дуввумин варзишгарест, ки соҳиби чунин ҷоиза аз мусобиқаи бонуфуз мегардад”.

Ёдовар бояд шуд, ки Баҳодур Усмонов дар Чемпионати ҷаҳон оид ба бокс дар шаҳри Тошканд, ки аз 3-юм то 14-уми май шуда гузашт, зери вазни 63,5 кг баромад намуда, соҳиби нишони биринҷӣ гардид.

Баҳодур дар даври нимниҳоии Чемпионати ҷаҳон оид ба бокс бо Чинзориг Баатарсух аз Муғулистон сабқат кард. Рақобати ин ду муштзани соҳибтаҷриба сахту сангин сипарӣ шуд. Дар натиҷа бо қарори якдилонаи доварон бо ҳисоби 1 бар 4 ғолибият насиби муштзани муғул гардид. Ин боис шуд, ки муштзани мо ба финали мусобиқа роҳ наёбад.

Пас аз ин нокомӣ Баҳодур соҳиби нишони биринҷӣ ва 50 ҳазор доллари амрикоии Чемпионати ҷаҳон оид ба бокс шуд ва тавонист, ки рӯйдоди ҷадидеро дар таърихи бокси меҳан рақам занад.

Ӯ пас аз 12 сол барои Тоҷикистон медали биринҷии Чемпионати ҷаҳон оид ба боксро овард.

Қобили зикр аст, ки 12 сол пеш муштзани тоҷик Анвар Юнусов дар вазни то 56 кг дар Чемпионати ҷаҳон оид ба бокс дар Боку бо мағлуб кардани муштзани кубагӣ соҳиби нишони биринҷӣ шуда буд.

Баҳодур то соҳиб шудан ба ин дастоварди муҳими таърихӣ муштзанони ботаҷриба, ҳамсони Алекс Исенди аз Танзания, Муҳаммад Алкасба аз Урдун, Нодир Абдулзақ аз Марокаш ва Хунатип Пудничиро мағлуб намуд.

Яҳё МАҲМАДНАБИЕВ, “ҶТ”