1–уми июн дар ҳошияи Конфронси байналмилалии сатҳи баланд оид ба ҳифзи пиряхҳо бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Кумитаи ҳифзи муҳити зисти назди Ҳукумати Ҷумҳурии Тоҷикистон ва Ассотсиатсияи дав ва марафонҳои Тоҷикистон бо ҷалби меҳмонони хориҷӣ дар мавзеи хушбоду ҳавои Маҷмааи лижаронии “Сафеддара” “Дави экологӣ барои пиряхҳо” (“Eco-Run For Glacier”) доир гардид.

Иштирокчиёни дав субҳи 1-уми июн аз назди Театри давлатии академии опера ва балети ба номи Садриддин Айнӣ бо микроавтобусҳо ба роҳ баромада, бо тамошои манзараҳои дидании дараи Варзоб ба Маҷмааи сайёҳии “Сафеддара” раҳсипор шуданд. Дар маҷмааи мазкур иштирокдорони конфронс дар чорабинии варзишии “Дави экологӣ барои пиряхҳо” ширкат намуданд.

Дар маросими ифтитоҳии чорабинӣ Дилрабо Мансурӣ, муовини Сарвазири Ҷумҳурии Тоҷикистон, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дигарон иштирок ва суханронӣ намуданд.

Дар суханронии худ Дилрабо Мансурӣ, муовини Сарвазири Ҷумҳурии Тоҷикистон иброз дошт, ки баргузории чунин чорабинӣ ва мусобиқот барои ташвиқи тарзи ҳаёти солим, таҳкими дӯстии халқҳо ва баланд бардоштани нуфузи Тоҷикистон дар арсаи байналмилалӣ аҳамияти хосса дорад.

Масъулин ҳадафи асосии давро ҷалби таваҷҷуҳи ҷомеаи ҷаҳонӣ ба масъалаҳои обшавии пиряхҳо, ҳифзи муҳити зист ва тағйирёбии иқлим маънидод карданд.

Дави экологӣ дар баландии 2700 метр аз сатҳи баҳр, аз рӯи ду масофа 5 км ва 1,6 км доир шуда, ғолибон бо медал ва дигар туҳфаҳои хотиравӣ сарфароз гардонида шуданд.

Ҳ. РАҲМАТУЛЛОЕВ, “ҶТ”