Соҳаи тарбияи ҷисмонӣ ва варзиш яке аз самтҳои афзалиятноки  сиёсати иҷтимоии Ҳукумати кишвар ба ҳисоб рафта, маҳз он ба таъмини оммавияти варзиш, таҳкими тарзи ҳаёти солим ва мусоидат ба омодакунии варзишгарони касбӣ барои иштирок дар мусобиқаҳои сатҳи ҷаҳонӣ ба ҳисоб меравад. Тарбияи ҷисмонӣ дар баробари таблиғу ташвиқи тарзи ҳаёти солим, инчунин яке аз воситаҳои беҳтарини таҳкими дӯстӣ ва ҳамкорӣ на танҳо миёни варзишгарон, балки тамоми инсонҳо ва кишварҳои ҷаҳон ба ҳисоб рафта, ба ҳамдигар муаррифӣ намудани давлату миллатҳои гуногун, наздик гардондани халқу миллатҳо ва ҳамкориҳои мутақобилан судманди кишварҳои мухталифи ҷаҳонро ба миён меорад. Ба ҳамин мақсад чанде пеш аз ҷониби Ҳукумати Ҷумуҳурии Тоҷикистон қарори дахлдор вобаста ба қабул намудани “Барномаи маҷмӯии рушди тарбияи ҷисмонӣ ва варзиш дар Ҷумҳурии Тоҷикистон барои солҳои 2017-2021” ба тавсиб расоднида шуд. 

Барномаи мазкур дурнамо, самтҳои асосии фаъолият, афзалиятҳо, вазифаҳо ва тартиби амалисозии сиёсати давлатӣ дар соҳаи тарбияи ҷисмонӣ ва варзишро муайян менамояд. Он дар давраи амалишавиаш ҷиҳати ҳалли масъалаҳои омодагии захираҳои варзишӣ ва омода намудани варзишгарон барои иштирок дар мусобиқаҳои сатҳи байналмилалӣ метавонад нақши асосӣ дошта бошад.

Барномаи мазкур фарогири масъалаҳои рушди инфрасохтор ва хизматрасонии тарбияи ҷисмонӣ ва варзиш, мустаҳкам ва рушди базаи моддию техникӣ барои таъмини сифати ҷараёни машқӣ-варзишӣ дар муассисаҳои варзишӣ, мактаб-интернатҳои варзишӣ, дастаҳои мунтахаби шаҳрҳо, вилоятҳо ва ҷиҳозонидани онҳо бо лавозимоти варзишии босифат, омода ва таъмини иштироки варзишгарони ҷумҳурӣ дар мусобиқаҳои байналмилалӣ, аз ҷумла бозиҳои Осиё ва олимпӣ, рушди илмии варзиши миллӣ, тайёр намудан ва такмили ихтисоси кормандони соҳаи тарбияи ҷисмонӣ пешбинӣ гардидааст. 
Барномаи мазкур инчунин метавонад дар рушди тарбияи ҷисмонӣ ва варзиш, пайдо намудани наврасону ҷавонони болаёқат, рушди инфрасохтори соҳаи варзиш, вусъат додани оммавияти тарбияи ҷисмонӣ ва варзиш, ташкили клуб ва бахшҳои варзишӣ дар заминаи соҳаи маориф, воситаи асосӣ байни мақомоти ваколатдор бо дигар ниҳодҳоро фароҳам гардонад.

Ҳамчунин, дар доираи барномаи мазкур дар оянда ба санадҳои меъёрии ҳуқуқӣ барои озод намудани ғолибон ва ҷоизадорони мусобиқаҳои бонуфузи байналмилалӣ (бозиҳои олимпӣ, Осиё, Чемпионати ҷаҳон ва Осиё, шоҳҷоиза ва шоҳҷомҳои ҷаҳон) аз пардохти маблағи таҳсили шартновӣ ва ҳангоми гирифтани таҳсилоти дуюми олӣ, дар заминаи яке аз мактабҳои маҳорати олии варзишӣ таъсис додани маркази тайёрии дастаҳои мунтахаби ҷумҳурӣ, таъсис додани тахассуси махсус оид ба омода намудани табибон ва ғайраҳо пешбинӣ шудаанд.