Дар шаҳри Тошканди Узбекистон аз 30 апрел то 14 май баргузории Чемпионати ҷаҳон оид ба бокс миёни мардҳо дар назар аст. Дар ин бора Ассотсиатсияи байналмилалии бокс (IBA) хабар медиҳад.

Мувофиқи иттилои манбаъ дар мусобиқаи мазкур 640 варзишгар аз 140 давлат номнавис шудаанд. Сабқатҳо дар 13 категорияи вазнӣ сурат мегирад.

Кишвари моро дар ин чемпионат 13 варзишагар намояндагӣ хоҳанд кард. Ба ҳайати тими мо варзишгарон аз қабили Шафиев Меҳрон дар вазни - 48кг, Ҳамидов Меҳроб- 51кг, Зоидов Меҳроҷ - 54кг, Воҳидов Асрор - 57кг, Муродзода Абубакр -60кг, Усмонов Баҳодур -63,5кг, Аҳадов Расул - 67кг, Маҳкамов Довуд - 71кг, Салимов Некрӯз -75кг, Негматуллоев Шаббос - 80кг, Каримов Парвиз - 86кг, Болтаев Давлат - 92кг, Аброриддинов Муҳаммад +92кг шомиланд.

Тавре Федератсияи бокси Тоҷикистон иттилоъ медиҳад, дастаи мунтахабро дар ин сафар Шаббос Негматуллоев, ноиби президенти федератсия, Алӣ Бобоҷонов, сармураббӣ, Хуршед Ҷӯраев, Рустам Музафаров ва Мирзо Шамсиев, мураббиён ҳамроҳӣ мекунанд.

Фонди умумии ҷоизаҳо дар чемпионати мазкур 5,2 миллион долларро ташкил медиҳад. Ғолибон дар ҳамаи вазнҳо 200 000 доллари ИМА, барандагони медали нуқра 100 000 ва барандагони медали биринҷӣ 50 000 доллари ИМА дарёфт хоҳанд кард.

Ҳошим РАҲМАТУЛЛОЕВ, “ҶТ”