Абубакр Муродзода муштзани умедбахши кишвар дар рӯзи чаҳоруми Чемпионати Осиё миёни муштзанҳои то 22 сола, ки дар шаҳри Остонаи Қазоқистон ҷараён дорад, ба даври нимниҳоӣ роҳ ёфт. Дар ин бора сомонаи тв “Варзиш” хабар медиҳад.

Абубакр барои баромад ба давраи нимниҳоӣ дар вазни 60 кг бар намояндаи Ироқ Қосим Қосимзода неруӯсанҷӣ кард. Дар ин қувваозмоии сахту сангин муштзани тоҷик аз худ маҳорати воло нишон дода, зарбаҳои ҳадафрас дошт. Ҳамин тавр дар ин нерусанҷӣ муштзани мо бо қарори ҷудогонаи доварон бо ҳисоби 3 бар 2 зафар ёфта, ба даври нимниҳоӣ баромад.

Абубакр дар даври аввал бар намояндаи Шри-Ланка Премаратна Ясиду бо қарори якдилонаи доварон бо ҳисоби 5 бар 0 дастболо гардида буд.

Муштзани дигари тоҷик Муинхуҷа Муминов (48 кг) бо мағлуб кардани муштзани қазоқ ба даври нимниҳоии Чемпионати Осиё (U-18) роҳ ёфта буд.

Ёдовар мешавем, ки Чемпионати Осиё оид ба бокс аз 25 апрел то 8 май миёни муштзанони то 18 ва 22 сола байни писарону духтарон дар Қазоқистон баргузор мегардад.

Яҳё МАҲМАДНАБИЕВ, “ҶТ”