ВАРЗИШ
Якшанбе 16 Июн 2019 08:41
5548
Дар оила миёни ҳафт бародар ягона нафаре буд, ки роҳи варзишро интихоб кард. Аз овони хурдӣ орзуи варзишгар шуданро дар дил мепарварид. Дар аввал ба намуди муҳорибаҳои тан ба тан машғул шуда, баъдан ба бокс пайваст.

Шоира Зулқайнарова, ҳаводорони худро аз соли 2015 ёфт. Вақте ӯ дар ин сол медали биринҷии мусобиқаи Осиё ва Ҷоми ҷаҳонро ба даст овард. Тариқи ВАО ба мардум дуюмин бонуи муштзан дар кишвар, баъди Мавзуна Чориева муаррифӣ гашт.

Шоира чанде пеш дар мусобиқаи байналмилалӣ ба хотираи қаҳрамони Иттиҳоди Шӯравӣ Д. Шопоков, ки 20-24 феврал дар шаҳри Бишкеки Ҷумҳурии Қирғизистон шуда гузашт, ширкат намуда бо медали тилло ба ватан баргашт. “Тибқи нишондои натиҷаҳои бадастовардааш умед аст, ки дар Бозиҳои тобистонаи олимпии Токио-2020 Мавзунаи дуюм кашф мегардад”- мегуянд мутахассисони кишвар.

Бахшида ба муваффақиятҳои пай дар пай ва баҳонаи иди бонувон мо бо Шоира Зулқайнарова суҳбате доштем, ки дар зер фишурдаашоро пешкаши хонанда мегардонем.

- Аввалан, Шуморо бо ғолибият табрик менамоем.

- Ташаккур! Боиси хурсандист, ки имрӯз намояндагони ВАО ва дигар дӯстдорони варзиш рақобатҳои моро пайгирӣ менамоянд. Ман ҳамеша барои нигоҳ доштани нангу номуси миллати тоҷик ва баланд бардоштани Парчами давлати хеш дар мусобиқаҳои байналмилалӣ талош меварзам. Кӯшиш менамоям, ки ливои Тоҷикистони соҳибистиқлол ҳамеша боло бошаду дар фазои дохилу хориҷи кишвар Суруди миллиамон баланд гардад.

- Лутфан, мегуфтед, ки дар ҳоли ҳозир тавваҷҷуҳ ба занони варзишгар чӣ гуна аст?

- Хушбахтона, сол то сол дар ҷумҳурӣ шарту шароити занони варзишгар хуб шуда истодааст. Шумораи ҷавондухтарон низ дар толорҳо зиёд шудааст. Вақте ман бори нахуст ба толори бокс рафтам тани танҳо миёни писарон тамрин мекардам ва имрӯзҳо мебинем, ки шумораи бонувони муштзан зиёд гардидааст. Ҳукумати кишвар низ барои руҳбаланд намудани занон дар варзиш чораҳорои заруриро дида истодааст.

- Барои то ин дараҷа расидани Шумо саҳми кӣ ё киҳо назаррас аст?

- Барои то ин зинаҳо расиданам саҳми падарам ва бародаронам бузург аст. Онҳо дар ин роҳ маро ҳамеша кӯмак мекунанд.

- Як зан-модар дар самти варзиш то кадом андоза муваффақ буда метавонад?

- Албатта, бонуе, ки ба дунёи варзиш ворид мешавад нисбат ба дигар занҳо дар худ бисёр дигаргуниҳоро мебинад. Аввал, тани солим. Дуюм, бисёр оромиро ҳис мекунад. Сеюм, худро ҳимоя карда метавонад ва дигар хислатҳое, ки дар давраи варзишиаш ба ӯ мепайвандад. Агар ҳар як инсон новобаста аз ҷинс варзишро дӯст дораду аз сидқи дил ба он бипайвандад, фикр мекунам ҳамеша муваффақ мешавад.

- Муштзан будани як занро чӣ гуна арзёбӣ мекунед?

- Бокс варзиши сангин аст. Ҳар инсон наметавонад дар ин роҳ муваффақ гардад. Хоҳи ки дар ин роҳ қаҳрамон гардӣ, аз ҳама чиз мегузарӣ. Дугонаҳоро тарк мекунӣ, сайру гашт рафтанро фаромӯш мекунӣ ва бо тамоми муҳаббат ба варзиши интихобкардаат мепардозӣ. Дар як рӯз ду маротиба тамрин мекунӣ. Имрӯз ҷавондухтарон бо дили гарм ба бокс машғуланд. Гуфта метавонем, ки ҳамин гуна рафтан гирад, дар солҳои наздик аз миёни бонувони тоҷик қаҳрамонҳои олимпӣ мебарояд. Чандин Мавзунаҳои дигар сабзида истодаанд, ки дар оянда муаррифгари миллату давлат мешаванд.

- Чуноне, ки мушоҳида мешавад, пас аз Мавзуна Шумо пайроҳаи ӯро тай намуда истодаед. Мухлисони бокс аз Бозиҳои тобистонаи Олимпии Токио-2020 чӣ натиҷаро интизор шаванд?

- Қаҳрамони Бозиҳои олимпӣ шудан ин орзуи ҳар як варзишгар аст. Ман аз соли 2019 саркарда, барои роҳхати Бозиҳои тобистонаи олимпии Токио-2020 талош карда истодаам. Кӯшиш мекунам тамоми қувваамро барои роҳ ёфтан ба Бозиҳои тобистонаи Олимпии Токио-2020 истифода бурда, Парчами давлати хешро боло бардорам.

- Муоширату муносибати отрофиён ва онҳое, ки Шуморо ҳамчун вазишгар мешиносанд дар кӯчаю хиёбонҳо чӣ гуна аст?

- Баъди дастовардҳоям дар ин ришта Ҳукумати кишвар ин дастоварди маро қадр кард ва ҳамчун як духтари варзишгар маро шинохтанд. Дар кӯча ҳама мебинад Шоира - муштзани тоҷик мегуянд, албатта ки ин як ифтихор аст.

- Чӣ нақшаҳо доред?

- Тайёрии ҳамаҷонибаи мо барои роҳхат гирифтан ба олимпиада мебошад. Дар моҳи март чемпионати кишвар мешавад. Инчунин, барои ба даст овардани холҳои олимпӣ дар чемпионати Осиё (моҳи июн дар Тайланд) ва дар сурати дарёфти роҳхат, дар Чемпионати ҷаҳон (7-21 сентябр дар ш. Екатеринбурги Руссия) иштирок хоҳам кард. Кӯшиш мекунам роҳхат ба даст орам.

- Мо ҳам ба ин бовар ҳастем, ки Шумо роҳхат ба Бозиҳои тобистонаи Олимпии Токио-2020-ро ба даст меоред ва дар варзиши мо, хусусан бокс таҳавулоти ҷадиде хоҳед кард. Чун фардо иди Шумо-бонувон аст, чӣ таманниёте ба бонувони кишвар доред?

- Ташаккури зиёд. Аслан, бояд бигӯям, ки ман пагоҳ ду идро ҷашн мегирам: иди модарон ва зодрӯзи худам. Тамоми бонувони кишвари азизам Тоҷикистони соҳибистиқлолро ба рӯзи идашон самимона табрик намуда, барояшон беҳтарин хушиҳои зиндагиро орзу дорам...

Суҳабти мо бо се нуқта анҷом ёфт. Дар ҳар калимаву ҷумлаи ин варзишгари далеру шӯҷоъ ифтихор аз ватандорию ватанпарастӣ ҷӯш мезанад. Пас, ду ид- рӯзи Модар ва зодрӯзи ин бонуи ҷасур муборак бошад...

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Июн 2019 c.