Дастаи яккачини ҷавонони Тоҷикистон дар бозии чорякниҳоии Чемпионати Осиё-2018 аз дастаи Кореяи Ҷанубӣ бо ҳисоби 0:1 мағлуб ва аз идомаи ширкат дар ин мусобиқа маҳрум гашт.

Вохӯрии ду мунтахаб имрӯз, 29-уми октябр, дар варзишгоҳи “Патриот Сандрабага”-и шаҳри Бекаси Ҷумҳурии Индонезия ҷараён гирифт.

Дар қисим аввали рақобат кореягиҳо бартариро ба даст гирифта, бо голи задаи Ҷеон Сеҷин ба даври ниманиҳоӣ роҳ ёфтанд. Ҷеон дар дақиқаи 44-ум ҳимоятгарони рақибро ба ғафлат гузошта, тӯбро вориди дарвозаи Шоҳрух Қирғизбоев намуд.

Ҳарчанд шогирдони Мубин Эргашев дар қисми дуюми дидор идораи тӯбро ба даст гирифта бошанд ҳам, комёб шуда натавонистанд.

Ду бозии дигари чорякниҳоии чемпионати Осиё-2018 миёни ҷавонони то 19-сола 28-уми октябр доир шуд. Дар он дастаи Ҷопон мизбони мусобиқа тими Индонезияро бо ҳисоби 2:0 мағлуб кард.

Дар дидори дигар мунтахаби 19-солаҳои Қатар бо ҳамсолони худ дастаи Тайланд вориди майдони сабз шуданд. Қисми асосии бозӣ бо ҳисоби 3-3 хотима ёфт. Дар вақти иловагӣ мунтахаби ҷавонони Қатар ба дарвозаи ҳариф чор голи дигар ворид карда, ҳисобро 7-3 ба фоидаи худ анҷом доданд.

Бозии охирини чорякниҳоии мусобиқа имрӯз, 29-уми октябр, мёни дастаҳои мунтахаби ҷавонони Арабистони Саудӣ ва Австралия баргузор мешавад. Пас аз маълум гардидани иштирокчии чоруми даври ниманиҳоии чемпионати Осиё-2018, рӯзи 1-уми ноябр дастаи Қатар бо Кореяи Ҷанубӣ ва Ҷопон бо ғолиби ҷуфти Арабистони Саудӣ/Австралия вориди сабқат мегарданд.

Ёдовар мешавем, ки чемпионати Осиё-2018, миёни ҷавонони то 19-сола, аз 18-уми октябр то 4-уми ноябр дар ҷумҳурии Индонезия баргузор мегирад. Чор дастаи беҳтарини мусобиқа ба Ҷоми ҷаҳон-2019, ки дар Лаҳистон мегузарад, роҳхат мегиранд. Ҳоло дастаҳои мунтахаби Қатар, Кореяи Ҷанубӣ ва Ҷопон соҳиби роҳхат шудаанд. Барои роҳхати чорум дастаҳои мунтахаби ҷавонони Арабистони Саудӣ ва Австралия мубориза мебаранд.