13-уми январ Меҳроҷ Камолов варзишгари муваффақи тоҷик аз Чемпионати кушод оид ба ҷиу-ҷитсу, ки дар шаҳри Гуанчжои Ҷумҳурии Мардумии Чин доир гардид, бо 4 медали тилло ба Ватан баргашт.

Ӯро дар фурудгоҳи байналмилалии Душанбе Раҷабалӣ Турсунзода, президенти Федератсияи миллии ҷиу-ҷитсуи кишвар, дӯстону наздикон ва ҳаводорону хабарнигорон пешвоз гирифтанд.

Чемпионати мазкур аз 6-ум то 8-уми январи соли ҷорӣ баргузор гардида, Меҳроҷ дар ду вазн - 80 кг аз намуди ҷиу-ҷитсу ва 82 кг аз намуди Гран- При баромад намуда, дар ду вазни мазкур соҳиби 4 медали тилло шуд.

Ҳангоми пешвозгирӣ Раҷабалӣ Турсунзода, президенти Федератсияи миллии ҷиу-ҷитсу суханронӣ карда, иброз дошт, ки иштироки чунин варзишгарони бомаҳорати кишвар дар чорабиниҳои гуногуни варзишии ҷаҳонию сазовори ҷойҳои ифтихорӣ гардидани онҳо боиси ифтихор аст.

“Ин ғалаба боиси сарфарозии кулли ҷавонон ва варзишгарони кишвар аст, ки як варзишгари ҷавони мо тавонист, обрӯву нуфузи кишвари моро миёни давлатҳои ҷаҳон баланд бардорад”, - гуфт Р. Турсунзода.

Ҳошим РАҲМАТУЛЛОЕВ, "ҶТ"