Имрӯз - 28-уми апрел дастаи мунтахаби футзали Тоҷикистон дар Ҷоми Осиё-2024 дар Тайланд дар бозӣ барои ҷойи сеюм аз тими миллии Узбекистон аз рӯи силсилаи пеналти бо ҳисоби 1:3 шикаст хӯрда (замони асосӣ – 5:5), аз медалҳои биринҷии мусобиқа маҳрум шуд.

Нимаи аввали бозӣ бо пирӯзии тими миллии Узбекистон бо ҳисоби 2:1 ба поён расид. Дар нимаи дуюм футзалбозони узбек се гол (яктоаш аз пеналти) ва бозигарони тоҷик чаҳор гол заданд.

Замони асосии бозӣ бо ҳисоби мусовии 5:5 хотима ёфт. Ғолибро силсилаи пеналти муайян кард. Дар иҷрои ин кор бозигарони узбек маҳорати хуб нишон дода, бо ҳисоби 3:1 пирӯз шуданд.

Дар ҳамин рӯз тими миллии футзали Эрон дар Ҷоми Осиё-2024 бо пирӯзӣ бар мунтахаби Тайланд барои сездаҳумин бор қаҳрамони футзали Осиё шуд.

Дар даври финалӣ Эрон мизбони мусобиқот Тайландро бо ҳисоби 4-1 шикаст дода, бо ҳамин дар таърихи худ бо 13 қаҳрамонӣ, 2 ноибқаҳрамонӣ ва 2 мақоми сеюм, пурифтихортарин тим дар миёни миллатҳои Осиё шуд.

Мунтахаби Тоҷикистон, ки бори дувоздаҳум дар таърихи худ дар марҳилаи ниҳоии Ҷоми Осиё ширкат варзид, аввалин маротиба барои медалҳои биринҷии қаҳрамонии Осиё мубориза бурд, инчунин бори аввал соҳиби роҳхат ба қаҳрамонии ҷаҳон шуд.

Президенти Федератсияи футболи Тоҷикистон Рустами Эмомалӣ барои дастовардҳои тими миллии футзали кишвар дар Ҷоми Осиё-2024 ба маблағи 100 ҳазор доллар - каме зиёдтар аз 1 миллион сомонӣ ҷоизаи молӣ ҷудо кард.